ނޭޕާލްގެ ވެރިރަށް ކަތަމަންޑޫގެ ދަސަރަތު ސްޓޭޑިއަމްގައި ރާއްޖެގަޑިން މިއަދު ހަވީރު 5:45 ގައި ކުޅުނު އެމެޗުގެ ފުރަތަމަ ލަނޑު މެޗުގެ ފަސް ވަނަ މިނެޓުގައި ކާމިޔާބު ކޮށް ދިނީ އައްސަދުﷲ އަބްދުﷲއެވެ. ލަންކާ ކޮޅަށް ރާއްޖެއިން ޖެހި ދެ ވަނަ ލަނޑު ކާމިޔާބު ކޮށްދިނީ ގައުމީ ކެޕްޓަން އަލީ އަޝްފާގް (ދަނގަޑޭ) އެވެ. އޭނާ ވަނީ މިއަދުގެ މެޗުގައި ޖުމްލަ ހަ ގޯލް ޖަހާ، ދެ ހެޓްރިކް ހަދައިފަ އެވެ. ދެން ގައުމީ ޓީމަށް ލަނޑުތައް ޖަހައި ދިން ކުޅުންތެރިންނަކީ ދެ ވަނަ ހާފުގައި ކުޅެން ނުކުތް ހަސަން އަދުހަމް (ސަޑޭ) އާއި ހަމަ ދެ ވަނަ ހާފުގައި ކުޅެން ނިކުތް އަލީ އުމަރު އަދި އަލީ ފާސިރު ސެންޓޭ އެވެ.

މިއަދުގެ މެޗުގައި ރާއްޖޭގެ ކެޕްޓަން ދަނގަޑޭ ހެދި ދެ ހެޓްރިކާއެކު އޭނަ ވެފައި ވަނީ ސާފް ޗެމްޕިއަންޝިޕް ފުޓްބޯޅަ މުބާރާތުގައި މި ވީހާތަނަށް ދެ ހެޓްރިކް ހެދި ހަމައެކަނި ކުޅުންތެރިއާއަށެވެ. އަދި މިއަދު މެޗުގެ މޮޅު ކުޅުންތެރިޔާގެ މަގާމަށް ވެސް ހޮވުނީ ދަނގަޑޭ އެވެ.

މިއަދުގެ މެޗުން ރާއްޖެއަށް ލިބުނު މޮޅާއެކު، އެ މޮޅުވެފައި ވަނީ ވާދަވެރި ލަންކާއާ ދެކޮޅަށް ގައުމީ ޓީމުން މިހާތަނަށް ނެރުނު އެންމެ ތަފާތު ބޮޑު ނަތީޖާ އެވެ.

މިއަދުގެ މެޗަށްފަހު ސަރަހައްދީ ގައުމުތަކުގެ ކުޅިވަރު ނޫސްތަކުގައި ރާއްޖޭގެ ކެޕްޓަން އަލީ އަޝްފާގު (ދަނގަޑޭ)އަށް ތައުރީފުކޮށް، މިއަދު ލިބުނު ހުރިހާ ވެސް މޮޅަކީ ދަނގަދޭ ޓީމުގައި ހުރުމުން ލިބުނު ކާމިޔާބީއެއް ކަމަށް ބުނެފައިވެ އެވެ.

ލަންކާއާ ދެކޮޅަށް ރާއްޖޭއިން މިއަދު ނިކުތް ފުރަތަމަ 11 ކުޅުންތެރިން.

މުހައްމަދު ޝިފާން،
މުހައްމަދު އާރިފް (ބަކާ)
އަލީ އަޝްފާގް (ދަނގަޑޭ)
އައްސަދުﷲ އަބްދުﷲ
އަލީ ފާސިރު (ސެންޓޭ)
އަހުމަދު ރަޝީދު
އަކުރަމް އަބްދުލް ޤަނީ (އަކޫ)
ޝާފިއު އަހުމަދު
މުހައްމަދު ރަޝީދު (ހޮކޭ)
މުހައްމަދު އުމައިރު
ގޯލްކީޕަރު އިމްރާން މުހައްމަދު

ލަންކާއާ ދެކޮޅަށް ރާއްޖެ މިއަދު ނުކުތްއިރު މި މުބާރާތުގެ ތަށި އެންމެ ފުރަތަމަ ރާއްޖެ ހޯދީ ސެމީފައިނަލުގައި ލަންކާ ބަލިކޮށް، އިންޑިއާގެ މައްޗަށް 1-0 ލަނޑުން ކުރި ހޯދައިގެންނެވެ. އެއީ 2008 އަހަރު އެވެ. ރާއްޖެއާ ލަންކާ އެންމެ ފަހުން ވާދަކޮށްފައި ވަނީ، ބަންގުލަދޭޝްގައި 2009 ވަނަ އަހަރު އޮތް ސާފް ޗެމްޕިއަންޝިޕްގެ ސެމީ ފައިނަލްގައެވެ. އެފަހަރު ރާއްޖެ ވަނީ 5-1 އިން ލަންކާ ބަލިކޮށް މުބާރާތުގެ ފައިނަލުން ޖާގަ ހޯދާފައެވެ.

ސާކް ސަރަހައްދުގައި ބޭއްވޭ އެންމެ ބޮޑު ފުޓްބޯޅަ މުބާރާތުގައި މީގެ ކުރިން މި ދެޓީމު ވާދަ ކުރި މެޗުތަކަށް ބަލާއިރު ރާއްޖެ ވަނީ އެމުބާރާތުގައި ލަންކާއާ ދެކޮޅަށް ކުޅުނު ފަސް މެޗުގެ ތެރެއިން ހަތަރު މެޗުން މޮޅުވެފައެވެ. އަނެއް މެޗު ނިމުނީ ލަނޑެއް ނުޖެހި ދެ ޓީމް އެއްވަރު ވެގެނެވެ.

މީގެ 16 އަހަރު ކުރިން ނޭޕާލްގެ ދަސަރަތު ސްޓޭޑިއަމްގައި ލަންކާއާ ދެކޮޅަށް ރާއްޖެ ކުޅުނު ފުރަތަމަ ސާފް ޗެމްޕިއަންޝިޕްގެ ސެމީ ފައިނަލްގައި އޭރު ސަރަހައްދުގެ އެންމެ ވަރުގަދަ އެއް ޓީމުކަމަށްވާ ލަންކާ 2-1 އިން ބަލިކޮށް ރާއްޖެ ވަނީ އެ ފަހަރު މުބާރާތުގެ ފައިނަލުން ޖާގަ ހޯދައިފަ އެވެ.

މިއަދުގެ މޮޅާއެކު ގްރޫޕް ބީގެ އެއް ވަނަ މަގާމް އޮތް ދިވެހިރާއްޖެ، ދެން ގްރޫޕްގައި މެޗެއް ކުޅޭނީ އަންނަ ބުދަ ދުވަހު ބޫޓާނާ ދެކޮޅާށެވެ.