05 Jun 2013, 13:07
ދިވެހި ރާއްޖޭގެ ގައުމީ ޔުނިވަސިޓީގައި ސައިންސް ދާއިރާގެ ފެކަލްޓީއެއް އުފެއްދުމަށް ގައުމީ ޔުނިވަސިޓީ އިން ނިންމައިފި އެވެ.
ގައުމީ ޔުނިވަސިޓީ އިން އިއްޔެ ނެރެފައިވާ ނޫސްބަޔާނެއްގައި ބުނެފައި ވަނީ ގައުމީ ޔުނިވަސިޓީގައި ހޯމަ ދުވަހު ބޭއްވި ކައުންސިލް ބައްދަލުވުމުން ނިންމީ ދުނިޔޭގެ ތިމާވެށީގެ ދުވަހުގެ މުނާސަބަތާ ގުޅުވައިގެން ކަމަށެވެ.
ގައުމީ ޔުނިވަސިޓީގެ ނޫސްބަޔާނުގައި ބުނެފައި ވަނީ ސައިންސުގެ ދާއިރާއަކީ ގައުމުގެ ތަރައްގީގައި ވަރަށް މުހިންމު ދާއިރާއެއް ކަމަށާއި ސައިންސް ފެކަލްޓީއެއް އުފެއްދުމުގެ ބޭނުމަކީ އެ ދާއިރާގެ އިލްމާއި ތައުލީމާއި އިލްމާއި ދިރާސާކުރުން އިތުރު ކުރުމަށް ކަމަށެވެ.
"ޔުނިވަސިޓީގެ މަގްސަދާއި އިންސާނާގެ ކިބައިގައި ހުންނަ ކަންތައްތައް ހޯދުމުގެ ޝައުގުން އަމާޒު ހިފައިގެން، މާއްދީ މާހައުލު ބޮޑަށް ދެނެ ގަތުމަށާއި އެ ދެނެގަތުން އިންސާނީ ތަރައްގީ އަށް ބޭނުން ކުރުމަށާއި މުޖުތަމައުގެ ކުރިއެރުން ފަހިކުރުމަކީ ސައިންސް ފެކަލްޓީގެ މަގުސަދެވެ." ޔުނިވަސިޓީގެ ބަޔާނުގައިވެ އެވެ.
އެ ފެކަލްޓީން މަސައްކަތް ކުރާނީ ސައިންސްގެ މައިގަނޑު ދާއިރާތަކުން ރިސާޗާއި އުނގެނުމާއި އީޖާދީ ހަރަކާތްތައް ހިންގުމަށް ކަމަށް ވެސް ގައުމީ ޔުނިވަސިޓީ އިން ބުންޏެވެ.