ސްރީލަންކާއިން ފުރައިގެން ރާއްޖެ އައި "އޮގަސްޓެ ޝައުލްޓެ" ނަމަކަށް ކިޔާ ކޮންޓެއިނާ ބޯޓު، މާލޭ އިރުމަތީ ފަރާތު ފަރަށް އަރާފައި ވަނިކޮށް ތިން ގަޑިއިރުގެ މަސައްކަތައްފަހު، އެ ބޯޓް ފުން ކުރީ ދެ ޓަކު ބޭނުންކޮށްގެން ކަމަށް އެމްއެންޑީއެފުން ބުންޏެވެ.

އެމްއެންޑީއެފްގެ ފަސްޓް ލެފްޓިނެންޓް އަބްދުﷲ އަލީ މިރޭ ވިދާޅުވީ އެ ބޯޓް ފުންކުރީ ޓަކު ބޭނުންކޮށްގެން "ދަމައިގެން" ކަމަށެވެ. ޓަގުގެ އެހީގައި ބޯޓް ފުން ކުރުމުގެ މަސައްކަތްކޮށްފައި ވަނީ ބޯޓްގެ އެޖެންޓުނެވެ.

ދިގުމިނުގައި 210 މީޓަރު، ފުޅާމިނުގައި 30 މީޓަރު ހުންނަ އެ ބޯޓުގެ ދިރިބާކޮޅު ފަރަށް އެއީ ގާދޫކޮލުން ވަދެގެން ހުޅުލެ އާއި މާލެއާ ދެމެދު ކަނޑަށް ވަނުމަށްފަހު އަނބުރާލަން އުޅުމުގެ ތެރޭގަ އެވެ. މިއަދު އިރުއޮއްސި 6:00 ޖަހަން އުޅެނިކޮށް ހިނގި އެ ހާދިސާގައި ބޯޓަށް މާބޮޑު ގެއްލުމެއް ނުވާ ކަމަށް އެމްއެންޑީއެފުން ބުންޏެވެ.

ނަމަވެސް އެ ބޯޓް ފަރަށް އެރުމުން، އެ ސަރަހައްދުގެ ފަރަށް ލިބުނު ގެއްލުން އެމްއެންޑީއެފުން މޮނީޓާ ކުރާނެ ކަމަށާއި އެމްއެންޑީއެފުން އެ މަސައްކަތް ކުރާނީ މާދަމާ ކަމަށް އެމްއެންޑީއެފުން ބުންޏެވެ. ޓްރާސްޕޯޓްގެ އޮފިޝަލަކު ވިދާޅުވީ ވޯޓް ފަރަށް އެރުމުން އެ ސަރަހައްދުގެ ފަރަށް ގެއްލުމެއް ލިބިފައިވާނަމަ ގެއްލުމެއް ލިބޭ ކޮންމެ އަކަމީޓަރަކަށް، 85،000ރ. އިން ޖޫނިމަނާ ކުރާނެ ކަމަށެވެ. ނަމަވެސް އެ ޖޫރިމަނާގެ ފައިސާގެ ކުޑަ ބޮޑުމިން އަޅާ ކިޔޭނީ ފަރުގެ ދިރުމަށް ލިބިފައިވާ ގެއްލުން ބެލުމަށްފަހު ކަމަށް އޭނާ ވިދާޅުވި އެވެ.