މާލޭގައި މީހުން ދިރިއުޅޭ ގެއެއްގެ ކޮޓަރި ތެރޭގައި މަރުވެ ކުނިވެފައި އޮތް މީހާ ގަލޮޅު މޯޗަރީ އަށް ގެންގޮސްފި އެވެ.

ފުލުހުންގެ މީޑިއާ އޮފިޝަލަކު ވިދާޅުވީ މިރޭ އިރު އޮއްސި 6:38 އެހާކަންހާއިރު، ލޮނުޒިޔާރަތް މަގުގައި ހުންނަ ގ. މިޒަމާންގޭގެ ކޮޓަރިއެއްގެ ތެރޭގައި މަރުވެފައި އޮއްވައި ފެނުނީ ސްރީލަންކާގެ ފިރިހެނެއް ކަމަށެވެ. އަދި އެ މައްސަލަ މިހާރު ތަހުގީގު ކުރަމުން ގެންދާ ކަމަށާއި އެކަމާ ބެހޭ މައުލޫމާތު ފަހުން މީޑިއާ އަށް ހިއްސާ ކުރައްވާނެ ކަމަށް ވެސް މީޑިއާ އޮފިޝަލް ވިދާޅުވި އެވެ.

ސަން އަށް އެނގިފައިވާ ގޮތުގައި އެމީހާ ފެނުނު އިރު ހަށިގަނޑުގެ ބޭރުފުށުން އަނިޔާގެ ނިޝާންތައް ފެންނަން ހުއްޓެވެ. އަދި އެމީހާ މަރުވެ ކުނިވެފައި އޮތް ތަނުން ވަސް ދުވާތީ އެގޭގައި ދިރިއުޅޭ މީހުން މިހާރު ވަނީ އެހެން ތަން ތަނަށް ބަދަލު ވެފަ އެވެ. ވަސް މަޑު ކުރެވޭތޯ ފުލުހުން އެގޭތެރޭގައި ވަނީ ކުމުންޒާނިން ދުންވެސް އަޅާފަ އެވެ.

މަރުވެ ކުނިވެފައި އޮއްވައި ފެނުނު ބިދޭސީ މީހާގެ ހަށިގަނޑު މިހާރު ވަނީ މޯޗަރީ އަށް ލައިފަ އެވެ.

މަރުވެފައި އޮތް މީހާ ނެރުމުގެ ތައްޔާރީތައް ފުލުހުން ވާންފަށައިފި. އެގޮތުން ސްޓްރެޗާއެއް މިހާރު ވަނީ ގޭދޮރުމައްޗަށް ގެނެސްފައި. ކުޑަ އިރުކޮޅެއް ތެރޭގައި އެމީހާގެ ހަށިގަނޑު ނެރޭނެ ކަމަށް ފުލުހުން ބުނޭ. އެ މީހާ މަރުވީ ގުދުރަތީ މަރަކުން ކަމެއް ނުވަތަ ވަނީ މީހަކު މަރާލާފައި ކަމެއް އަދި ސާފެއްނުވޭ. އިތުބާރު ހުރި ފަރާތަކުން ބުނީ އެ މީހާގެ ހަށިގަނޑުގެ ބޭރުފުށުން އަނިޔާގެ ނިޝާންތައް ފެންނަން ހުރި ކަމަށް.