12 Dec 2012, 16:51
ހިއުމަން ޓްރެފިކިންއަކީ ކުށެއް ކަމަށާއި އެފަދަ ކުށެއްކޮށްފި މީހެއްގެ އަދަބަކީ ހަތް އަރާއި 10 އަހަރާއި 15 އަހަރަށް ޖަލަށްލުން ކަމަށް ކަނޑައަޅާފައިވާ ބިލެއް ސަރުކާރުން މަޖިލީހަށް ހުށަހަޅައިފި އެވެ.
މިހާތަނަށް ރާއްޖޭގެ ގާނޫނެއްގައި ހިއުމަން ޓްރެފިންއަކީ ކުށެއް ކަމަށް ކަނޑައަޅާފައި ނުވާތީ ހިއުމަން ޓްރެފިކިން އަށް ހާއްސަކޮށްގެން ސަރުކާރުން މަޖިލީހަށް ހުށަހެޅި ބިލަށް ކިޔަނީ "މީހުން ޓްރެފިކް ކުރުން ހުއްޓުވުމުގެ ބިލް" އެވެ. ސަރުކާރުގެ ފަރާތުން އެ ބިލް މަޖިލީހަށް ހުށަހަޅުއްވާފައި ވަނީ ޕީޕީއެމްގެ ޕާލަމެންޓްރީ ގްރޫޕްގެ މެންބަރު މުހައްމަދު މުޖުތާޒެވެ.
ބިލުގައިވާ ގޮތުން މީހަކަށް މުޖުބޫރު ކުރުވައިގެން ރޭވުމަކުން ނުވަތަ މަކަރާއި ހީލަތުން މީހަކު އެއް ގައުމުން އަނެއް ގައުމަށް ބަދަލު ކުރުވުމަށް މަސައްކަތް ކުރާ މީހަކީ ހިއުމަން ޓްރެފިކިންގެ އަމަލެއް ހިންގާ މީހެކެވެ. އަދި އެފަދަ ހީތަލްތެރި ރޭވުމަކުން މީހަކު ރާއްޖޭގެ އެއް ސަރަހައްދަކުން އަނެއް ސަރަހައްދަން ގެންދިއުން ވެސް އެއީ ހިއުމަން ޓްރެފިކިންގެ އަމަލެއްގައި ބައިވެރިވުމެވެ.
އެ ބިލުގައިވާ ގޮތުން ކުޑަކުއްޖަކު ޓްރެފިކް ކުރުމަކީ އެ ކުއްޖާގެ ސިއްހަތަށް ނުވަތަ ސަލާމަތައް ނުރައްކާވެދާނެ ނުވަތަ މަސައްކަތެއް އެ ކުއްޖާ ލައްވައި ކުރުވުން ނުވަތަ އެފަދަ ހިދުމަތެއް އެ ކުއްޖާގެ ފަރާތުން ހޯދުމެވެ.
ހިއުމަން ޓްރެފިކިންގެ އަދަބު ކަނޑައަޅާފައިވާ ބާބުގައި ބުނެފައި ވަނީ އެފަދަ ކުށެއް ކޮށްފި މީހެއްގެ އަދަބަކީ 10 އަހަރު ދުވަހަށް ޖަލަށްލުމެވެ. އަދި ކުޑަކުއްޖަކު ހިއުމަން ޓްރެފިކްކޮށްފި ނަމަ އެފަދަ މީހެއްގެ އަދަބަކީ 15 އަހަރަށް ޖަލަށްލުމެވެ. އަދި ހިއުމަން ޓްރެފިކިންގެ އަމަލެއް ރޭވުމުގައި ބައިވެރިވެއްޖެ ނަމަ ހަތް އަހަރު ދުވަހަށް އެ މީހަކު ޖަލަށް ލެވޭނެ ކަމަށް އެ ބިލުގައިވެ އެވެ.
އަމިއްލަ އަށް ރާވައިގެން މީހަކު ހިއުމަން ޓްރެފިކިންގައި ގެންގުޅެނިކޮށް އެ މީހަކު މަރުވެއްޖެ ނަމަ އެކަން ކުރި މީހަކު 15 އަހަރަށް ޖަލަށްލެވޭނެ ކަމަށާއި ހިއުމަން ޓްރެފިކް ކުރުމުގައި ހަތިޔާރު ބޭނުންކޮށްފި ނަމަ ވެސް 15 އަހަރަށް ޖަލަށްލެވޭނެ ކަމަށް ބިލުގައި ބުނެ އެވެ.
ހިއުމަން ޓްރެފިކިންގެ އަމަލެއް ކުރީ ގާނޫނު ތަފްޒީފު ކުރާ އިދާރާއެއްގެ މުވައްޒަފެއް ނަމަ އޭނާ ވެސް 15 އަހަށް ޖަލަށްލެވޭނެ ކަމަށް ބިލުގައިބުނެ އެވެ.
ހިއުމަން ޓްރެފިކިންގައި އުޅޭ މީހުންނާއި ކުޑަކުދިންނާއި އަންހެނުންނަށް ރައްކާތެރިކަމާއި އެ މީހުން ރާއްޖެ އިން ބޭރަށް ފޮނުވުމުގެ އުސޫލުތައް ވެސް ބިލުގައި ބަޔާންކޮށްފައިވެ އެވެ. އަދި ހިއުމަން ޓްރެފިކިން ހުއްޓުވުމާ ބެހޭ ކަންތައްތައް ވިލަރެސް ކުރާ 14 މެންބަރުންގެ ކޮމެޓީއެއް އުފައްދަންޖެހޭނެ ކަމަށް ވެސް އެ ގާނޫނުގައި ބުނެ އެވެ. އެ ކޮމެޓީ އެކުލެވިގެން ވަނީ މަޖިލީހުގެ މެންބަރަކާއި ސުޕްރީމް ކޯޓްގެ ފަނޑިޔާރަކާއި އެޗްއާރްސީއެމްގެ މެންބަރަކާއި ދާހިލީ ވުޒާރާގެ މުވައްޒަފަކާއި އޭޖީ އޮފީހުގެ ގާނޫނީ ވަކީލަކާއި ޕީޖީ އޮފީހުގެ ގާނޫނީ ވަކީލަކާއި އިމިގްރޭޝަންގެ މުވައްޒަފަކާއި ފޮރިން މިނިސްޓްރީގެ މުވައްޒަފަކާއި ފުލުހުންގެ އޮފިސަރަކާއި ކަސްޓަމްސްގެ އޮފިސަރަކާއި ލޭބާ ރިލޭޝަނުން ކަނޑައަޅާ މުވައްޒަފަކާއި އިސްލާމިކް މިނިސްޓްރީގެ މުވައްޒަފެއްގެ އިތުރުން އަމިއްލަ ޖަމިއްޔާއްގެ މެންބަރެކެވެ.
އެ ކޮމެޓީން ހިއުމަން ޓްރެފިކިން ހުއްޓުވުމަށް ޓަކައި ގައުމީ އެކްޝަން ޕްލޭނެއް އަހަރަކު އެއްފަހަރު ކޮމެޓީން އެކުލަވާލަންވާނެ ކަމަށް ބިލުގައިބުނެ އެވެ. އަދި ކޮމެޓީގެ ރިޕޯޓެއް ކޮންމެ އަހަރު އެއްފަހަރު ރައީސުލްޖުމްހޫރިއްޔާއަށާއި މަޖިލީހަށް ހުށަހަޅަންވާނެ ކަމަށް ބިލުގައިވެ އެވެ.
ސަރުކާރުގެ ފަރާތުން މަޖިލީހަށް ހުށަހެޅި "މީހުން ޓްރެފިކް ކުރުން ހުއްޓުވުމުގެ ބިލް"ގެ ސުރުހީ މަޖިލީހަށް އިއްވާފައިވެ އެވެ. ނަމަވެސް އެ ބިލާ ބެހޭ ގޮތުން އަދި މަޖިލީހުގެ ތަޅުމުގައި ބަހުސްކޮށްފައެއް ނުވެ އެވެ. އެ ބިލް ގާނޫނަކަށް ވާނީ މަޖިލީހުގެ ކޮމެޓީން ބިލް ދިރާސާ ކުރެއްވުމަށް ފަހު މަޖިލީހުގެ ތަޅުމަށް ފޮނުވުމުން، މަޖިލީހުގެ މެންބަރުންގެ އަޣުލަބިއްޔަތުން ފާސްކޮށް، ރައީސުލްޖުމްހޫރިއްޔާ ތަސްތީގު ކުރެއްވުމުންނެވެ.