ދޫނިދޫއާ ދިމާލު ބޭރުގައި ދެ ލޯންޗެއް ޖެހި މިރޭ 8:25 އެހާކަންހާއިރު ހިނގި ނުރައްކާތެރި އެކްސިޑެންޓެއްގައި ދެ ލޯންޗުން ދަތުރުކުރި ގިނަ ބަޔަކު ޒަހަމްވެ، ޓޫރިސްޓަކު މަރުވެއްޖެ އެވެ.

ފުލުހުން ބުނީ އެކްސިޑެންޓް ހިނގާފައިވަނީ ހުޅުމާލެއަށް ދަތުރުކުރި ލޯންޗަކާއި ބަނޑޮސް ލޯންޗެއް ޖެހިގެން ކަމަށެވެ. ފުލުހުންގެ މީޑިޔާ އޮފިޝަލް ވިދާޅުވީ މިރޭ ހިނގި އެހާދިސާގައި މަރުވެފައިވަނީ ބަނޑޮހު ލޯންޗުގައި ހުރި ޓޫރިސްޓެއް ކަމަށާއި އެއީ ފިންލޭންޑުގެ ފިރިހެނެއް ކަމަށްވެސް ވިދާޅުވި އެވެ. އަދި ވިދާޅުވީ މަރުވި އެ މީހާ އެކްސިޑެންޓު ހިނގި ވަގުތު މޫދަށް ވެއްޓުނު ކަމަށާއި އޭނާ މޫދުން ނަގައިގެން ހޮސްޕިޓަލަށް ގެންދެވުނު އިރުވެސް މަރުވެފައިވާކަމަށް އައިޖީއެމްއެޗުން މައުލޫމާތު ދީފައިވާ ކަމަށެވެ.

މަރުވި މީހާ ފިޔަވައި އެ ހާދިސާގައި އަނިޔާވި އެންމެން ގެނެސްފައިވަނީ އޭޑީކޭ ހޮސްޕިޓަލަށެވެ. އެ ހާދިސާގައި ޖުމްލަ އަށް މީހަކަށް އެކިވަރުގެ އަނިޔާ ލިބިފައިވާ ކަމަށް އޮފިޝަލް ވިދާޅުވި އެވެ. އޭގެ ތެރޭގައި ހަތަރު އަންހެނަކާއި ހަތަރު ފިރިހެނަކު ހިމެނޭ ކަމަށްވެސް ފުލުހުން ބުންޏެވެ.

އޭޑީކޭ ހޮސްޕިޓަލުގެ މެނޭޖިންގް ޑިރެކްޓަރު އަހުމަދު އައްފާއާލް މިރޭ ވިދާޅުވީ އެހާދިސާގައި އަނިޔާވެގެން ގެނައި އަށް މީހުންގެ ތެރެއިން ދެމީހަކަށް ބޮޑެތި އަނިޔާތަކެއް ލިބިފައިވާ ކަމަށާއި އޭގެ ތެރެއިން އެކެއްގެ ބޮލުގެ ނާށިގަނޑު ފަޅައިގެންގޮސް ބޮޑެތި ގެއްލުންތަކެއް ލިބިފައިވާއިރު އަނެއް މީހާގެ ދަތްދޮޅީގެ ކަށިގަނޑެއް ބިންދައިގެން ގޮސްފައިވާ ކަމަށެވެ.

ސަންގެ ނޫސްވެރިން އޭޑީކޭއަށްދިޔަ އިރު އެހަދިސާގައި ގެއްލުންވި ބައެއް މީހުންވަނީ ވޯޑަށް ބަދަލުކޮށްފަ އެވެ. އޭގެތެރޭގައި ކުދި އަނިޔާތަށް ލިބިފައިވާމީހުންނާއި ބޮޑެތި އަނިޔާތެއް ލިބިފައިވާމީހުން ހިމެނެ އެވެ. އެގޮތުން އަތް ބިދިފައިވާ ދެ ފިރިހެނުންނާއި ބޮލަށް ބޮޑު ގެއްލުމެއް ލިބިފައިވާ ފިރިހެނަކާއި ނިތްކުރި ފަޅައިގެން ގޮސްފައިވާ ދެ އަންހެނުން ހިމެނެއެވެ.

ފުލުހުންބުނީ ހުޅުމާލެ އެކްސްޕްރެސް ލޯންޗުގައި ދަތުރުކޮށްފައިވަނީ 3 ފަޅުވެރިންނާ އެކު 19 ފަސިންޖަރުން ކަމަށާއި، ބަނޑޮސް ލޯންޗް ކަމަށްވާ އޯކިޑް-13 ލޯންޗުން ދަތުރުކުރީ 3 ފަޅުވެރިންނާ އެކު ޖުލްލަ ފަސް ފަސިންޖަރުންނާ އެކު އެވެ.

އިތުރު މީހަކު ވޯޑަށް ނެރެފި، އެއީ އެމްޓީސީސީ ލޯންޗުގެ ފަޅުވެރިއެއް. އޭނާ ވަނީ އައީވީއެއް ގުޅާފައި ނަމަވެސް ބޭރުފުށުން އެެއްވެސް ޒަހަމެއް ފެންނާކަށް ނެތް.

ދެ މީހަކު ވޯޑަށް ބަދަލުކޮށްފި. އެކަކުގެ ބޮލަށް ވަނީ ވަރަށް ބޮޑަށް އަނިޔާވެފައި އަދި އަނެކަކުގެ އަތަށް އަނިޔާވެފައި

އިމަޖެންސީ ރޫމުން ނެރުނު އެކަކުގެ އެެއް އަތް ވަނީ ބިނދިފައި އަދި އަނެކަކުގެ ލޯމަތި ވަނީ ފަޅައިގެން ގޮސްފައި.

ޖުމްލަ އަށް މީހުން އަނިޔާވެގެން ގެނެސްފައިވޭ. އެއީ ހުސްދިވެހިން. އޭގެ ތެރޭގައި ހިމެނެނީ ހަތަރު އަންހެނުންނާއި ހަތަރު ފިރިހެނުން. އޭގެ ތެރެއިން ހަ މީހަކަށް އެމެޖެންސީގައި ފަރުވާދެމުންދާ ކަމަށް ހޮސްޕިޓަލުން ބުނޭ. ދެ މީހަކަށް ވަރަށް ބޮޑެތި އަނިޔާތަކެއް ވަނީ ލިބިފައި. އެކަކުގެ ބޮލުގެ ނާށިގަނޑު ވަނީ ފަޅައިގެން ގޮސްފައި ކަމަށް ހޮސްޕިޓަލުން މައުލޫމާތުދޭ. އަނެކަކުގެ ދަތްދޮޅީގެ ކަށިގަނޑެއް ބިންދައިގެން ގޮސްފައިވޭ.