04 Sep 2026, 16:07
އިންޑިއާއިން އަމިއްލައަށް އުފައްދާފައިވާ ރޮކެޓް ޓެކްނޮލޮޖީ ބޭނުންކޮށްގެން އެ ގައުމުގެ ޖައްވީ އިދާރާ (އިސްރޯ) އިން އަނެއްކާވެސް ތާރީޚީ ބޮޑު ކާމިޔާބީއެއް ހޯދައިފިއެވެ. އެގޮތުން އިސްރޯގެ "ނޯޓީ ބޯއީ" ގެ ނަމުން މަޝްހޫރުވެފައިވާ ޖީއެސްއެލްވީ-އެފް17 ރޮކެޓްގައި ދުނިޔެ ބަލަހައްޓާ އެންމެ ޒަމާނީ ސެޓެލައިޓް ކަމަށްވާ އީއޯއެސް-05 ވަނީ ކާމިޔާބުކަމާއެކު ޖައްވަށް ފޮނުވާލާފައެވެ.
އަންދްރަ ޕްރަދޭޝްގެ ސްރީހަރިކޯޓާގައި ހުންނަ ސަތީޝް ދަވަން ސްޕޭސް ސެންޓަރުން މި ރޮކެޓް ވިލާގަނޑު ފޫއަޅުވާލައި ދަތުރުފެށީ ރޭ ފަތިހު 2:55 ގައެވެ. މިއީ ސްރީހަރިކޯޓާއިން ފޮނުވާލި ބޮޑު ރޮކެޓެއްގެ 107 ވަނަ އުދުހުމެވެ.
ރޮކެޓް ޖައްވަށް އަރައިގެން ދިޔަތާ ގާތްގަނޑަކަށް 19 މިނެޓު ފަހުން، ފަތިހު 3:14 ހާއިރު، އީއޯއެސް-05 ސެޓެލައިޓް ވަނީ ކަނޑައެޅިފައިވާ އޯބިޓަށް ކާމިޔާބުކަމާއެކު ދޫކޮށްލާފައެވެ. މި ކާމިޔާބީއާއެކު މިޝަން ކޮންޓްރޯލް ރޫމްތަކާއި ޓްރެކިން ސްޓޭޝަންތަކުގައި މަސައްކަތްކުރަމުންދިޔަ އިސްރޯގެ 16,500 އެއްހާ ސައިންސްވެރިންނާއި އިންޖިނިއަރުންނަށް ވަނީ ބޮޑު އުފަލަކާއި ހިތްހަމަޖެހުމެއް ލިބިގެން ގޮސްފައެވެ.
މި ކާމިޔާބީ ފާހަގަކުރައްވައި އިންޑިއާގެ ސައިންސް މިނިސްޓަރު ޑރ. ޖިތެންދުރަ ސިން ވިދާޅުވީ، މިއީ ޖައްވީ ދާއިރާއިން އިންޑިއާއިން އެޅި އަނެއް ބޮޑު ފިޔަވަޅު ކަމަށެވެ. އަދި އީއޯއެސް-05 އަކީ އިންޑިއާއިން ޖިއޯސިންކްރޮނަސް އޯބިޓަކަށް ފޮނުވި ފުރަތަމަ އިމޭޖިން ސެޓެލައިޓް ކަމަށާއި، މީގެ ސަބަބުން ވިޒިބަލް، އިންފްރާރެޑް، މަލްޓި-ސްޕެކްޓްރަލް އަދި ހައިޕާ-ސްޕެކްޓްރަލް ބޭންޑްތައް މެދުވެރިކޮށް ދުނިޔެ ބެލެހެއްޓުމުގެ މަތީ ފެންވަރުގެ ގާބިލުކަން ލިބިގެންދާނެ ކަމަށް އޭނާ ފާހަގަކުރެއްވިއެވެ.
މި މިޝަންގެ ކާމިޔާބީ އިންޑިއާއަށް ވަކިން ހާއްސަވަނީ، އެ އިދާރާގެ އެންމެ އިތުބާރު ހިފޭ ޕީއެސްއެލްވީ ރޮކެޓް 2025 ވަނަ އަހަރާއި 2026 ވަނަ އަހަރުގެ ޖެނުއަރީ މަހު ވިދިވިދިގެން ނާކާމިޔާބުވެ، ދަތުރުތައް މެދުކަނޑާލާފައިވާ ދަނޑިވަޅެއްގައި ހޯދުނު ކާމިޔާބީއަކަށް ވާތީއެވެ. އެ ނާކާމިޔާބީތަކުގެ ސަބަބުން ޖައްވީ ދަތުރުތަކުގެ ގާބިލުކަމާ މެދު ސުވާލު އުފެދިފައިވަނިކޮށް، ޖީއެސްއެލްވީން ހޯދައިދިން މި ނަތީޖާއަކީ އިސްރޯގެ އަޒުމާއި އަލުން ތެދުވުމުގެ ހިތްވަރު ދައްކުވައިދިން ވަރުގަދަ މެސެޖެކެވެ.
ޖީއެސްއެލްވީ މާކް-2 ރޮކެޓަށް "ނޯޓީ ބޯއީ" ގެ ނަން ދެވިފައިވަނީ އޭގެ ތާރީޚުގައި ދިމާވި ގޮންޖެހުންތަކުގެ ސަބަބުންނެވެ. މިހާތަނަށް ކުރި 19 ދަތުރުގެ ތެރެއިން ހަ ދަތުރެއް ނާކާމިޔާބުވެފައިވީ ނަމަވެސް، މި ރޮކެޓަކީ އިންޑިއާގެ ޓެކްނޮލޮޖީގެ އަމިއްލަ މިނިވަންކަމުގެ ރަމްޒެކެވެ. 1990 ގެ އަހަރުތަކުގައި އެމެރިކާގެ ޕްރެޝަރާއެކު ރަޝިއާއިން އިންޑިއާއަށް ކްރަޔޯޖެނިކް އިންޖީނުގެ ޓެކްނޮލޮޖީ ދިނުން ހުއްޓުވުމުން، އިންޑިއާގެ ސައިންސްވެރިން ވަނީ 20 އަހަރުގެ ބުރަ މަސައްކަތުން އަމިއްލަ ކްރަޔޯޖެނިކް އިންޖީނެއް ތަރައްގީކޮށްފައެވެ.
ހަމައެއާއެކު، 2021 ވަނަ އަހަރުގެ އޮގަސްޓް މަހު ޖީއެސްއެލްވީ-އެފް10 ގައި ފޮނުވާލި ޖީސެޓް-1 ސެޓެލައިޓް، ކްރަޔޯޖެނިކް ސްޓޭޖަށް ދިމާވި މައްސަލައަކާ ހުރެ ނާކާމިޔާބުވެފައިވާއިރު، އީއޯއެސް-05 އަކީ އެދުވަހު ފުރިހަމަނުވެ ދިޔަ ހުވަފެން ހަގީގަތަކަށް ހަދައިދިން މިޝަނެކެވެ.
ބިމުން ފެށިގެން ގާތްގަނޑަކަށް 36،000 ކިލޯމީޓަރު މަތީގައިވާ ޖިއޯސިންކްރޮނަސް އޯބިޓަށް ދަތުރުކުރާ މި ސެޓެލައިޓަކީ އިންޑިއާއަށް ދާއިމީ ގޮތެއްގައި ވަކި ސަރަހައްދެއް މޮނިޓަރ ކުރުމުގެ ފުރުސަތު ހުޅުވާލަދޭނެ އުޅަނދެކެވެ. އާންމުކޮށް ބިމާ ކައިރިން ދައުރުވާ ސެޓެލައިޓްތަކުން ވަކިވަކި ފޮޓޯތައް ލިބުނު ނަމަވެސް، 2,376 ކިލޯގްރާމްގެ ބަރުދަން ހުރި މި ސެޓެލައިޓުން މުޅި އިންޑިއާ ސަބްކޮންޓިނެންޓާއި ވަށައިގެންވާ ކަނޑުގެ ސަރަހައްދުތައް "މެދުކެނޑުމެއްނެތި ފެންނަ ވީޑިއޯއެއް" ފަދައިން ބެލެހެއްޓުމުގެ ގާބިލުކަން ލިބިގެންދާނެއެވެ.
މި ސެޓެލައިޓްގެ ސަބަބުން ބަންގާޅު ކަނޑުއޮޅީގައި އުފެދޭ ތޫފާންތަކާއި، ފެންބޮޑުވުމުގެ ހާދިސާތަކާއި، ޖަންގަލީގައި ރޯވާ އަލިފާނާއި، ދަނޑުވެރިކަމާއި ތިމާވެއްޓަށް އަންނަ ބަދަލުތައް ވަގުތުން ބެލެހެއްޓޭނެއެވެ. މީގެ އިތުރުން މިއީ އިންޑިއާގެ ކަނޑުގެ ސިފައިންނާއި ވައިގެ ސިފައިންނަށް ގައުމީ ސަލާމަތާއި ކަނޑުގެ ސަރަހައްދުގެ ހަރަކާތްތައް ދެނެގަތުމަށް ލިބިގެންދިޔަ "ޖައްވީ ލޮލެކެވެ".
މި ކާމިޔާބީއާ ގުޅިގެން އިސްރޯގެ ޗެއާމަން ޑރ. ވީ ނާރާޔަނަން ވިދާޅުވީ، ބުރަ މަސައްކަތުގެ އިނާމަކީ އިތުރު މަސައްކަތް ކަމަށާއި، މި ކާމިޔާބީ ލިބުނީ މުވައްޒަފުންގެ މެދުގައި އޮތް ހުޅުވާލެވިފައިވާ މަސައްކަތުގެ މާހައުލުގެ ސަބަބުން ކަމަށެވެ. އަދި ހިނގަމުންދާ މާލީ އަހަރުގެ ތެރޭގައި އިތުރު ހަ ލޯންޗެއް ރޭވިފައިވާއިރު، އަހަރު ނިމުމުގެ ކުރިން އިންސާނުން ނުލައި ފޮނުވާ ފުރަތަމަ "ގަގަންޔާން" މިޝަން ކުރިއަށް ގެންދިއުމަށް އިސްރޯއިން ދަނީ ވަރަށް ބޮޑަށް ތައްޔާރުވަމުންނެވެ.