02 Sep 2026, 15:23
އިންޑިއާގެ ކެރެލާ ސްޓޭޓްގެ ކޮއްލަމްއަށް ނިސްބަތްވާ ރެމާބާއީ އެސް، 2022 ވަނަ އަހަރު ސްކޫލް ހެޑްމިސްޓްރެސްކަމުން ރިޓަޔާކުރުމަށްފަހު ފެށި އާދައިގެ މަސައްކަތެއް ވަނީ ބޮޑު ވިޔަފާރިއަކަށް ބަދަލުވެފައެވެ. ވަގުތު ހޭދަކުރުމުގެ ގޮތުން ގޭގެ ގޯތިތެރޭގައި އިންދަން ފެށި ޑްރެގަން ފުރުޓް ގަސްތަކުގެ ވިޔަފާރި ފުޅާވެ، އެ ގަސްތަކުން ލިބޭ މޭވާ މިހާރު ރާއްޖެއަށް ވެސް ދަނީ އެކްސްޕޯޓުކުރަމުންނެވެ.
ކުރިން ޒުއޮލޮޖީ ޓީޗަރެއްގެ ގޮތުގައި ވެސް މަސައްކަތްކުރި ރެމާބާއީ، އޭނާގެ ގޭގެ ގޯތިތެރެއާއި ޓެރަސްގައި ހިމެނޭ 3،500 އަކަފޫޓުގެ ޖާގައެއްގައި ހައްދަނީ "މެލޭޝިއަން ކިންގް" ވައްތަރުގެ ރަތް ޑްރެގަން ފުރުޓެވެ. މަނީކޮންޓްރޯލްއިން ރިޕޯޓުކޮށްފައިވާ ގޮތުގައި، އޭނާގެ ގޯތިތެރޭގައި ކޮންކްރީޓް ތަނބުތަކުގެ އެހީގައި 360 ގަސް ހައްދާފައިވާއިރު، ޓެރަސްމަތީގައި ފީފާތަކެއްގައި އިތުރު 100 ގަސް ވަނީ ހައްދާފައެވެ. މި ގަސްތައް ހެއްދުމަށް އާންމު ފަސްގަނޑުގެ ބަދަލުގައި ބޭނުންކުރަނީ ކޮމްޕޯސްޓާއި ގެރިގުއިއެވެ.
މޭވާގެ އިތުރުން ގަހުގެ ކުރި ވިއްކައިގެން ވެސް ރެމާބާއީ އާމްދަނީ ހޯދައެވެ. އޭނާ ބުނި ގޮތުގައި، އޭނާގެ ބަގީޗާއިން ލިބޭ ޑްރެގަން ފުރުޓް ގަންނަ 2،500 އަށް ވުރެ ގިނަ ކަސްޓަމަރުން އިންޑިއާއާއި، ރާއްޖެ އަދި ސްރީލަންކާގައި އެބަތިއްބެވެ. މީގެ އިތުރުން، ކޮންމެ ކުރިއެއް ގާތްގަނޑަކަށް 70 ރުޕީސްއަށް ވިއްކާއިރު، ގަސް ހައްދާނެ ގޮތުގެ އިރުޝާދު ވެސް ކަސްޓަމަރުންނަށް އޭނާ ފޯރުކޮށްދެއެވެ.
ރެމާބާއީގެ ބަގީޗާއިން ލިބޭ މޭވާ ގަންނަނީ ހޯލްސޭލްކުރާ ފަރާތްތަކުންނާއި އޯގަނިކް ތަކެތި ވިއްކާ ފިހާރަތަކުންނެވެ. އެންމެ ގިނައިން މޭވާ އަޅާ ދުވަސްވަރު މަހެއްގެ މައްޗަށް 750 ކިލޯގެ ޑްރެގަން ފުރުޓް ލިބޭއިރު، ކިލޯއެއް ވިއްކަނީ ގާތްގަނޑަކަށް 175 ރުޕީސްއަށެވެ. "30ސްޓޭޑްސް" އަށް އޭނާ ދީފައިވާ އިންޓަވިއުއަކާ ހަވާލާދީ މަނީކޮންޓްރޯލްއިން ރިޕޯޓުކޮށްފައިވާ ގޮތުގައި، މޭވާއާއި ގަހުގެ ކުރި ވިއްކައިގެން މަހެއްގެ މައްޗަށް ގާތްގަނޑަކަށް ހަތަރު ލައްކަ ރުޕީސްގެ އާމްދަނީއެއް އޭނާއަށް ލިބެއެވެ. މިއީ ސާފު ފައިދާގެ ބަދަލުގައި، ތަކެތި ވިއްކައިގެން ލިބޭ ޖުމްލަ އާމްދަނީއެވެ.
ޖާގައިގެ ދަތިކަން ހުންނަ ރާއްޖޭގެ ގޭބިސީތަކުގައި ގަސްހައްދާ ފަރާތްތަކަށް މިއީ ރަނގަޅު ނަމޫނާއެކެވެ. ބޮޑެތި ބިންތަކުގެ ބަދަލުގައި، ކުދި ޖާގަތަކުގައާއި ފީފާ ފަދަ ތަކެތީގައި ގަސްހެއްދުމަކީ ރާއްޖެއަށް އެކަށީގެންވާ ގޮތެކެވެ. ނަމަވެސް، މޫސުމާއި، ގަހުގެ ބާވަތާއި، ގަސްހައްދާ މާހައުލުގެ އިތުރުން ބާޒާރުން ލިބެން ހުންނަ ތަކެއްޗަށް ބަލައި ގަސްހެއްދުމުގެ ނަތީޖާ ތަފާތުވެދާނެތީ، މިފަދަ މަސައްކަތެއް ފެށުމުގެ ކުރިން ދަނޑުވެރިކަމުގެ މާހިރުންގެ ލަފާ ހޯދުމަކީ މުހިންމު ކަމެކެވެ.