01 Sep 2026, 10:58
ސެމްސަންގް އިލެކްޓްރޯނިކްސް އިން އެ ކުންފުނީގެ ލެޕްޓޮޕް ސީރީޒް އިތުރަށް ފުޅާކޮށް، އާންމު ދިރިއުޅުމުގެ ކޮމްޕިއުޓަރުގެ ބޭނުންތަކަށް ޚާއްޞަކޮށްގެން އަގުހެޔޮ 14 އިންޗީގެ އައު "ގެލެކްސީ ބުކް6" ރަސްމީކޮށް އިޢުލާނުކޮށްފިއެވެ.
ފެށޭ އަގަކީ 799 އެމެރިކާ ޑޮލަރު ކަމަށްވާ މި ލެޕްޓޮޕަކީ ގިނަ ބަޔަކަށް ފަސޭހައިން އަތްފޯރާނެ އަގެއްގައި ފުރިހަމަ ތަޖުރިބާއެއް ފޯރުކޮށްދިނުމުގެ މަޤްޞަދުގައި ނެރުނު ޑިވައިސްއެކެވެ.
ސެމްސަންގް އިލެކްޓްރޯނިކްސްގެ އިސްވެރިއެއް ކަމަށްވާ މިންޗިއޮލް ލީ ވިދާޅުވީ، މިއީ ގިނަ ބަޔަކަށް ގެލެކްސީ ބުކްގެ ބޭނުން ހިފުމުގެ ފުރުޞަތު ފަހިކޮށްދިނުމަށް ތަޢާރަފްކުރި އުފެއްދުމެއް ކަމަށެވެ.
މި އައު ލެޕްޓޮޕްގެ އެންމެ ފާހަގަކޮށްލެވޭ އެއް ސިފައަކީ އެއްފަހަރު ޗާޖުކޮށްލައިގެން 25 ގަޑިއިރާ ހަމައަށް ހިފަހައްޓާ 61.2 ވޮޓް-އަވާގެ ވަރުގަދަ ބެޓެރީއެވެ. މީގެ އިތުރުން 45 ވޮޓްގެ ފާސްޓް ޗާޖިން ޓެކްނޮލޮޖީ ސަޕޯޓްކުރާތީ، އެންމެ 30 މިނެޓުގެ ތެރޭގައި ބެޓެރީގެ 33 އިންސައްތަ ޗާޖުކޮށްލެވެއެވެ.
މި ލެޕްޓޮޕްގައި އެއްފަހަރު ޗާޖުކޮށްލައިގެން 25 ގަޑިއިރާ ހަމައަށް ބެޓެރީ ހިފަހައްޓާނެ ---
ޕާފޯމަންސަށް ބަލާއިރު، މި ލެޕްޓޮޕްގައި ހިމަނާފައިވަނީ އިންޓެލްގެ އެންމެ ފަހުގެ ކޯ ސީރީޒް 3 (އިންޓެލް ކޯ 3 އަދި ކޯ 5) ޕްރޮސެސަރެވެ. މިއާއެކު 15 ޓޮޕްސް އާ ހަމައަށް މަސައްކަތްކުރާ އިންޓެލް އެންޕީޔޫ އެއް ހިމަނާފައިވާތީ، ގެލެކްސީ އޭއައިގެ ސްމާޓް ޚިދުމަތްތައް ހަލުވިކަމާއެކު ބޭނުންކުރެވޭނެއެވެ. އޮޕަރޭޓިން ސިސްޓަމެއްގެ ގޮތުގައި ބޭނުންކުރަނީ ވިންޑޯޒް 11 ހޯމް ނުވަތަ ޕްރޯ (25އެޗް2) އަދި ލިނަކްސް ކޮންސޯލްއެވެ.
މި ލެޕްޓޮޕް ފަރުމާކޮށްފައިވަނީ ބޯމިނުގައި 15.7 މިލިމީޓަރު އަދި ބަރުދަނުގައި އެންމެ 1.35 ކިލޯގްރާމް ހުންނަ ގޮތަށް ވަރަށް ލުއިކޮށް، ދަތުރުފަތުރުކުރާއިރު ގެންގުޅެން ފަސޭހަވާނެހެންނެވެ. ގެލެކްސީ ބުކްގެ ތާރީޚުގައި އަލަށް ތަޢާރަފްކުރި ވައިލެޓް ސިލްވާ ކުލައިގެ އިތުރުން ކްލެސިކް ގްރޭ ކުލައިން ވެސް މި ޑިވައިސް ލިބެން ހުންނާނެއެވެ.
ސްކްރީނުގެ ގޮތުގައި ބޭނުންކޮށްފައިވަނީ 16:10 ގެ ރޭޝިއޯ ހިމެނޭ، 1920x1200 ޕިކްސެލްގެ 14 އިންޗީގެ ޑަބްލިޔުޔޫއެކްސްޖީއޭ އެލްސީޑީ ސްކްރީނެކެވެ. މީގެ އަލިގަދަމިން 350 ނިޓްސްގައި ހުންނައިރު، އަލި އެޅުމުން ލޮލަށް އުނދަގޫވިޔަ ނުދިނުމަށް އެންޓި-ރިފްލެކްޓިވް ނުވަތަ އެންޓި-ގްލެއަރ ޓެކްނޮލޮޖީ އެކުލެވިގެންވެއެވެ.
ކަނެކްޓިވިޓީއަށް ބަލާއިރު، އިތުރު އެޑަޕްޓަރުތަކަށް ބަރޯސާވާން ނުޖެހޭ ގޮތަށް އެއްވަރަކަށް ބޭނުންހިފޭ ދެ ޔޫއެސްބީ ޓައިޕް-ސީ ޕޯޓާއި، އެއް ޔޫއެސްބީ ޓައިޕް-އޭ ޕޯޓާއި، 4ކޭ ސަޕޯޓްކުރާ އެޗްޑީއެމްއައި 1.4 ޕޯޓެއްގެ އިތުރުން ހެޑްފޯން އަދި މައިކްރޯފޯން ޖެކެއް ހިމަނާފައިވެއެވެ. މީގެ އިތުރުން ވައިފައި 6އީ އާއި ބްލޫޓޫތު 5.4 ގެ ޚިދުމަތް ވެސް ލިބެއެވެ.
މެމޮރީ އަދި ސްޓޯރޭޖްގެ ގޮތުގައި 8 ޖީބީ ނުވަތަ 16 ޖީބީގެ އެލްޕީޑީޑީއާރް5އެކްސް ރޭމް އަދި 256 ޖީބީ، 512 ޖީބީ ނުވަތަ 1 ޓީބީގެ އެސްއެސްޑީ ސްޓޯރޭޖް އޮޕްޝަންތައް ލިބެން ހުންނާނެއެވެ. ވީޑިއޯ ކޯލްތަކަށް 2 މެގާޕިކްސެލްގެ 1080ޕީ ފުލް އެޗްޑީ ކެމެރާއަކާއި ޑުއަލް އެރޭ މައިކްރޯފޯނުގެ އިތުރުން ޑޮލްބީ އެޓްމޮސް އެކުލެވޭ ސްޓީރިއޯ ސްޕީކަރު ހިމެނެއެވެ.
މި ލެޕްޓޮޕްގައި އޭއައި ސިލެކްޓް، ފޮޓޯތަކުގެ ބެކްގްރައުންޑް ވަކިކޮށްލާ އޭއައި ކަޓް އައުޓް އަދި ނޯޓުތައް ޚުލާޞާކޮށްދޭ ނޯޓް އެސިސްޓް ފަދަ ވިސްނުންތޫނު ފީޗާތައް ހިމެނެއެވެ.
މީގެ އިތުރުން ފޯނާއި ޓެބްލެޓް ފަދަ އެހެން ޑިވައިސްތަކާ ފަސޭހައިން ގުޅުވައިދޭ ކުއިކް ޝެއާ، ސްޓޯރޭޖް ޝެއާ، މަލްޓި ކޮންޓްރޯލް، ޓެބްލެޓް އިތުރު ސްކްރީނަކަށް ބަދަލުކޮށްދޭ ސެކަންޑް ސްކްރީން، ނިއާބައި ޑިވައިސަސް އަދި ލިންކް ޓު ވިންޑޯޒް ވެސް ބޭނުންކުރެވޭނެއެވެ.
މި ލެޕްޓޮޕް ބާޒާރަށް ނެރެފައިވަނީ ވަރުގަދަ ކޮލިޓީ ޓެސްޓުތަކަށް ފަހުގައެވެ. އަދި ގެއްލުންތަކުން ރައްކާތެރިކަން ހޯދައިދިނުމަށް ސެމްސަންގް ކެއާ ޕްލަސްގެ ޚިދުމަތް ވެސް ކަސްޓަމަރުންނަށް ލިބޭނެއެވެ. މި އައު ގެލެކްސީ ބުކް6 މިހާރު ވަކި ޚާއްޞަ މާކެޓުތަކަކަށް ނެރެފައިވާއިރު، ކުރިއަށް އޮތް ތަނުގައި އިތުރު ޤައުމުތަކަށް މި ލެޕްޓޮޕް ތަޢާރަފްކުރަމުން ގެންދާނެ ކަމަށް ސެމްސަންގުން މަޢުލޫމާތު ދެއެވެ.