25 Jul 2026, 21:18
އަހަރުތަކެއް ވަންދެން ފިލްމީ ދާއިރާގައި ދުރުގައި ހުރުމަށްފަހު ހޮލީވުޑްގެ މަޝްހޫރު ތަރި ޖޯނީ ޑެޕް އަލުން ފިލްމީ މަސައްކަތްތައް ފަށަން ތައްޔާރުވަމުން އަންނަކަމަށް ރިޕޯޓުތަކުން ބުނެފިއެވެ.
ހޮލީވުޑްގެ ބަތަލާ އަދި ކުރީގެ އަނބިމީހާ އެމްބަ ހާޑްއާ އެކު ކުރި ގާނޫނީ ހަނގުރާމައަށް ފަހު ޖޯނީ އަލަށް ތައްޔާރުވަމުން އަންނަ ފިލްމަކީ "އެބެނީޒަ"ގެ ނަމުގައި އުފައްދާ ފިލްމެކެވެ. މި ފިލްމަކީ، ޗާލްސް ޑިކަންސްގެ 'އޭ ކްރިސްމަސް ކެރޮލް'އަށް ބިނާކޮށް ޑައިރެކްޓަރު ޓައި ވެސްޓް ގެނެސްދޭ ފިލްމެކެވެ.
ޕެރަމައުންޓް ޕިކްޗާސްއިން އުފައްދާ މި ފިލްމުގައި ޑެޕް ކުޅޭނީ އެ ފިލްމުގެ ލީޑު ރޯލު ކަމަށްވާ އިބެނޭޒާ ސްކްރޫޖްގެ ރޯލެވެ.
މިއީ އެމްބާއާ ދެމެދު ހިނގި ގިނަ ދުވަސްވީ ކޯޓު މައްސަލައަށްފަހު ޑެޕް ކުޅޭ ފުރަތަމަ ބޮޑު ހޮލީވުޑް ފިލްމެވެ. އެ ދެމީހުން އެކަކު އަނެކަކަށް ގެވެށި އަނިޔާގެ ތުހުމަތުކޮށްފައިވާއިރު، ޖޫރީން ނިންމާފައިވަނީ ދެމީހުން ވެސް އަބުރުގެ ދައުވާގައި ކުށްވެރިވާ ކަމަށެވެ.
އެގޮތުން ޑެޕްއަށް ބަދަލުގެ ގޮތުގައި 15 މިލިއަން ޑޮލަރު ދިނުމަށް ހުކުމްކުރިއިރު، ހާޑްއަށް ދެ މިލިއަން ޑޮލަރު ދިނުމަށް ވަނީ ހުކުމްކޮށްފައެވެ.
ޖޯނީ ޑެޕް ފިލްމު "ފެންޓާސްޓިކް ބީސްޓްސް: ދަ ސީކްރެޓް އޮފް ޑަމްބްލްޑޯ"ގެ މަންޒަރެއްގައި-- ފޮޓޯ/ ވެރައިޓީ
މި ގާނޫނީ މައްސަލަތަކުގެ ސަބަބުން ޑެޕްގެ ހޮލީވުޑް ކެރިއަރަށް ބޮޑެތި ހުރަސްތަކެއް ކުރިމަތިވިއެވެ. އޭނާ ވަނީ 'ފެންޓާސްޓިކް ބީސްޓްސް' ފްރެންޗައިޒްގެ ތިންވަނަ ފިލްމުން ވަކިކޮށްފައެވެ. އެ ފިލްމުގައި ޑެޕްގެ ބަދަލުގައި ފެނިގެންދިޔައީ މޭޑްސް މިކަލްސަންއެވެ.
އޭގެ ފަހުން ޑެޕް ވަނީ 'މިނަމާޓާ' އަދި 'ޖީން ޑޫ ބެރީ' ފަދަ ބައިނަލްއަގުވާމީ އުފެއްދުންތަކުން ފެނިފައެވެ. އަދި 'މޯޑީ' ކިޔާ ފިލްމެއް ޑައިރެކްޓް ވެސް ކޮށްފައިވެއެވެ. މީގެ އިތުރުން ލަޔަންސްގޭޓްގެ 'ޑޭ ޑްރިންކާ' ކިޔާ އެކްޝަން ފިލްމަކުން ވެސް އޭނާ ފެންނާނެއެވެ.
ފިލްމު "އެބެނީޒަ"ގެ ކާސްޓުންގެ ތެރޭގައި އެންޑްރިއާ ރައިޒްބަރޯ، އިއަން މެކެލެން، ރޫޕަޓް ގްރިންޓް އަދި ޑޭޒީ ރިޑްލީ ފަދަ މަޝްހޫރު ތަރިން ހިމެނެއެވެ.
މި ފިލްމުގެ ޑައިރެކްޓަރު ޓައި ވެސްޓް ބުނި ގޮތުގައި 'އޭ ކްރިސްމަސް ކެރޮލް'ގެ ވާހަކަތަކަކީ އޭނާ ބިރުވެރި ފިލްމުތަކަށް ޝައުގުވެރިކަން އުފެދުނު އެއް ސަބަބެވެ. އޭނާއަކީ 'ޕާލް' އަދި 'މެކްސީން' ފަދަ ބިރުވެރި ފިލްމުތައް އުފެއްދުމަށް މަޝްހޫރު މީހެކެވެ.
ފިލްމު "އެބެނީޒަ" ސިނަމާތަކަށް ނެރުމަށް ހަމަޖެހިފައިވަނީ މިއަހަރުގެ ނޮވެމްބަރު 13ގައެވެ.