24 Jul 2026, 11:22
ކަނޑުމަގުން ރާއްޖެއަށް އެތެރެކުރަން އުޅުނު 3.1 ކިލޯއަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސްއިން ބުނި ގޮތުގައި، މި ތަކެތި އަތުލައިގަނެފައިވަނީ އިއްޔެއެވެ. މަސްތުވާތަކެތި އަތުލައިގެން ގޮތުގެ ތަފްސީލެއް ނުދެއެވެ.
މި އޮޕަރޭޝަނުގައި އަތުލައިގަތް މަސްތުވާތަކެތީގެ ތަފްސީލުތަކަށް ބަލާއިރު، ފުރަތަމަ މަރުހަލާގައި ކަސްޓަމްސްއިން ކުރި ތަހުލީލުތަކުން އެ ތަކެތި ވަނީ ސިންތެޓިކް ކެތިނޯންއަށް ޕޮޒިޓިވްވެފައެވެ. ކަސްޓަމްސްއިން ބުނި ގޮތުގައި، އަތުލައިގަތް މަސްތުވާތަކެތީގެ ޖުމްލަ ބަރުދަނުގައި 3،110 ގްރާމް (3.1ކިލޯ) ހުއްޓެވެ. އަދި މި ތަކެތީގެ މަގުމަތީ އަގު 5.6 މިލިއަން ދިވެހި ރުފިޔާއަށް ވުރެ އިތުރުވާނެ ކަމަށް އެ އިދާރާއިން ލަފާކުރެއެވެ.
ސިންތެޓިކް ކެތިނޯންއަކީ ފަހަކަށް އައިސް ރާއްޖެއަށް އެތެރެކުރާ މިންވަރު އިތުރުވެފައިވާ، އިންސާނާގެ ސިކުނޑިއަށާއި ހަށިގަނޑަށް ނުހަނު ނުރައްކާތެރި ކެމިކަލް މާއްދާތަކެއް އެކުލެވޭ މަސްތުވާތަކެތީގެ ބާވަތެކެވެ. މި ބާވަތުގެ މަސްތުވާތަކެތި އާންމުގޮތެއްގައި އެތެރެކުރަނީ އެކި ބާވަތުގެ މުދަލުގެ ތެރޭގައި ފޮރުވައިގެން، އޮޅުވާލައިގެންނެވެ.
ރާއްޖެއަށް މަސްތުވާތަކެތި އެތެރެވުން ހުއްޓުވުމަށްޓަކައި ކަސްޓަމްސްއިން އަންނަނީ ބޯޑަރު ބެލެހެއްޓުމުގެ ފިޔަވަޅުތައް ވަރަށް ބޮޑަށް ވަރުގަދަކުރަމުންނެވެ. އެގޮތުން، ވައިގެ މަގުންނާއި ކަނޑުމަގުން އަންނަ އުޅަނދުފަހަރާއި މުދާ ބަލައިފާސްކުރުމުގެ މަސައްކަތް ޒަމާނީ ވަސީލަތްތަކުގެ އެހީގައި ފުޅާކޮށްފައިވާ ކަމަށް ކަސްޓަމްސްއިން ބުނެއެވެ.
މީގެ އިތުރުން، އިންޓެލިޖެންސް މައުލޫމާތުގެ މައްޗަށް ބިނާކޮށް، ޝައްކުކުރެވޭ އުޅަނދުފަހަރާއި މުދާ ވަކިން ހާއްސަ ސަމާލުކަމެއް ދީގެން ބަލައިފާސްކުރުމުގެ މަސައްކަތްވެސް އެ އިދާރާއިން ކުރިއަށްގެންދެއެވެ.
މިގޮތަށް އަތުލައިގަންނަ މަސްތުވާތަކެތީގެ މައްސަލަ އިތުރަށް ތަހުގީގުކުރުމަށްޓަކައި، އެ ތަކެތި ހަވާލު ކުރަނީ ފުލުހުންނާއެވެ.
މި މައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައިވާ ކަމެއް އަދި ހާމަކޮށްފައެއް ނުވެއެވެ.