28 Jun 2026, 10:49
ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭ ވެހުނީ އއ. ހިމަންދުއަށް ކަމަށް މޫސުމާ ބެހޭ ގައުމީ އިދާރާ މެޓް އޮފީހުގެ ތަފާސްހިސާބުތަކުން ދައްކައިފިއެވެ.
މެޓް އޮފީހުގެ ތަފާސްހިސާބުތަކުން ދައްކާ ގޮތުގައި ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭ ވެހިފައި ވަނީ އއ. ހިމަންދުއަށެވެ. އެ ރަށަށް ވަނީ 63.9 މިލިމީޓަރުގެ ވާރޭ ވެހިފައެވެ. އަދި ދެވަނައަށް އެންމެ ގިނައިން ވާރޭ ވެހުނު ކަމަށް ރެކޯޑު ކުރެވިފައި ވަނީ ފުވައްމުލަށް ސިޓީއަށެވެ. އެގޮތުން އެ ސިޓީއަށް ވަނީ 57.5 މިލިމީޓަރުގެ ވާރޭ ވެހިފައެވެ.
ތަފާސްހިސާބުތައް ދައްކާގޮތުން ދެން އެންމެ ގިނައިން ވަރޭ ވެހިފައި ވަނީ ހުޅުލެއާއި މާލޭގެ އިތުރުން ބ. އަތޮޅު ގޮއިދުއަށެވެ. އެގޮތުން ހުޅުލެއަށް 53.6 މިލިމީޓަރުގެ ވާރޭ ވެހިފައިވާއިރު މާލެއަށް ވެހިފައި ވަނީ 51.6 މިލިމީޓަރުގެ ވާރޭއެވެ. އަދި ގޮއިދުއަށް ވެހިފައި ވަނީ 50.4 މިލިމީޓަރުގެ ވާރޭއެވެ.
މީގެ އިތުރުން އދ. މަހިބަދޫއާއި އއ. ތޮއްޑޫގެ އިތުރުން ހުޅުމާލެއާއި ބ. ދަރަވަންދޫއަށް ވަނީ 40 މިލިމީޓަރަށްވުރެ ގިނައިން ވާރޭ ވެހިފައެވެ.
މެޓުން އާންމުކުރި ވޭތުވެދިޔަ 24 ގަޑިއިރުގެ ތެރޭގައި ވާރޭ ރެކޯޑުކުރެވިފައިވާ ރައްތައް --- ފޮޓޯ: މެޓް އޮފީސް
މެޓުން ވަނީ ވޭތުވެދިޔަ 24 ގަޑިއިރުގެ ތެރޭގައި އާންމު ވައި އަދި ވިލާގަނޑުގައި އެންމެ ވައި ގަދަވި ބާރުމިން ރެކޯޑު ކުރެވިފައިވާ ރަށްތައް ވެސް އާންމުކޮށްފައެވެ.
މެޓް އޮފީހުގެ ތަފާސްހިސާބުތައް ދައްކާ ގޮތުން ނިމުނު 24 ގަޑިއިރުގެ ތެރޭގައި އެންމެ ގަދައަށް ވައި ޖެހުނީ ހުޅުލެއާއި ބ. ދަރަވަންދުއަށެވެ. ހުޅުލެއަށް އެވްރެޖްކޮށް ވައިޖެހޭ މިންވަރު 16 މޭލުގައި ހުރިއިރު ވިލާގަނޑުގައި ވަނީ 47 މޭލަށް ވައި ގަދަވެފައެވެ. އަދި ދަރަވަންދުއަށް އެވްރެޖްކޮށް ވައިޖެހޭ މިންވަރު 13 މޭލުގައި ހުރިއިރު ވިލާގަނޑުގައި އެ ރަށަށް ވެސް ވަނީ 47 މޭލު ބާރުމިނުގައި ވައި ޖެހިފައެވެ.
މެޓުން އާންމުކުރި ވޭތުވެދިޔަ 24 ގަޑިއިރު ވައި ރެކޯޑުވުރެވުނު މިންވަރު --- ފޮޓޯ: މެޓް އޮފީސް
މީގެ އިތުރުން ކުޅުދުއްފުށި ސިޓީއަށް ވިލާގަނޑުގައި 45 މޭލަށް ވައިގަދަވެފައި ވާއިރު، ބ. ގޮއިދުއަށް ވަނީ 41 މޭލަށް ވައިގަދަވެފައެވެ. އަދި ކ. ދިއްފުއްޓަށް 40 މޭލަށް ވައިގަދަވެފައި ވާއިރު، ހދ. ހަނިމާދުއާއި ނ. މާފަރުގެ އިތުރުން އިފުރާއި އއ. ތޮއްޑުއާއި މ. މުލި އަދި ފ. ނިލަންދުއަށް ވަނީ 35 މޭލަށްވުރެ ބާރުމުނުގައި ވައިޖެހިފައެވެ.
މިއަދުގެ އިރު އޮއްސި 18:00 އަށް މޫސުން ލަފާކޮށް މެޓުން ވަނީ ރާއްޖޭގެ ހުޅަނގާއި ހުޅަނގު އުތުރުން ދެކުނުގެ އަތޮޅުތަކަށް ގަޑިއަކު ފަސް މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި އެހެން ހިސާބުތަކަށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށް މެޓް އޮފީހުން ވަނީ ބުނެފައެވެ. އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލު ބާރުމިނަށް ވައިގަދަވާނެ ކަމަށް މެޓުން ވަނީ ލަފާކޮށްފައެވެ.
މެޓް އޮފީހުން ބުނީ މިހާރު ރާއްޖެއަަށް ކުރަމުން މިއަންނަނީ ހުޅުނގު މޫސުމުގެ ވިއްސާރަ ކަމަށެވެ.