22 Jun 2026, 23:07
އާޖެންޓީނާގެ ކެޕްޓަން ލިއޮނަލް މެސީ، ފިފާ މެންސް ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ދުނިޔޭގެ ރެކޯޑް މުގުރާލައި، ފުޓްބޯޅައިގެ ރަސްގެފާނުގެ މަގާމު އަނެއްކާވެސް ކަށަވަރުކޮށްފިއެވެ.
ވޯލްޑް ކަޕްގެ ގްރޫޕް ސްޓޭޖުގައި އޮސްޓްރިއާއާ ދެކޮޅަށް ކުޅުނު ފޯރިގަދަ މެޗުގެ 38 ވަނަ މިނެޓުގައި މެސީ ކާމިޔާބުކުރި ހިތްގައިމު ލަނޑާއެކު، އޭނާ ވަނީ ވޯލްޑް ކަޕް މުބާރާތްތަކުގައި ޖުމްލަ 17 ލަނޑު ހަމަކޮށްފައެވެ.
މިއާއެކު، ޖަރުމަނުގެ ކުރީގެ މަޝްހޫރު ފޯވާޑް މިރޮސްލާވް ކްލޯޒާ 16 ލަނޑާއެކު 12 އަހަރު ވަންދެން ހިފަހައްޓަމުން އައި ރެކޯޑް މިހާރު ވަނީ މެސީގެ ނަމަށް ބަދަލުވެފައެވެ.
މެޗުގެ ކުރީކޮޅު ލިބުނު ޕެނަލްޓީއެއް ނާކާމިޔާބުވި ނަމަވެސް، މެސީ ވަނީ އޭނާގެ ފެންވަރު ދައްކާލައި އޭނާގެ ރަސްމީ ފައި ކަމަށްވާ ވައަތު ފައިން ފޮނުވާލި ހަމަލާއަކުން ތާރީޚީ ރެކޯޑް އާކޮށްފައެވެ.
މި ފަހަރުގެ 2026 ގެ މުބާރާތަކީ އުމުރުން 38 އަހަރުގެ މެސީގެ ކެރިއަރުގެ 6 ވަނަ ވޯލްޑް ކަޕް މުބާރާތެވެ.
މުބާރާތުގެ ފުރަތަމަ މެޗުގައި އަލްޖީރިއާ ކޮޅަށް ހެދި ހެޓްރިކާއެކު ކްލޯޒާގެ ރެކޯޑާ އަރާ ހަމަކުރި މެސީ، މިހާރު ވަނީ ޖުމްލަ 28 މެޗުން 17 ލަނޑު ހަމަކޮށްފައެވެ. މިއީ ވޯލްޑް ކަޕްގެ ތާރީޚުގައި ކުޅުންތެރިއަކު އެންމެ ގިނަ މެޗު ކުޅުމުގެ ރެކޯޑްވެސްމެއެވެ.
2006 ވަނަ އަހަރު ވޯލްޑް ކަޕްގައި ފުރަތަމަ ލަނޑު ޖެހި މެސީ، 2022 ވަނަ އަހަރު އާޖެންޓީނާއަށް މުބާރާތް ކާމިޔާބުކޮށްދިނުމުގައި 7 ލަނޑު ޖެހިއެވެ.
މިފަހަރުގެ މުބާރާތުގައި މިހާތަނަށް ޖަހާފައިވާ 4 ލަނޑާއެކު، އިތުރު ލަނޑުތަކެއް ފެނުމުގެ ފުރުސަތު ބޮޑެވެ.