22 Jun 2026, 15:27
ޓްރީ ޓޮޕް ހޮސްޕިޓަލުން މި އަހަރު ބޭއްވުމަށް ހަމަޖެހިފައިވާ މަލްޓި-ސްޕެޝަލްޓީ ހެލްތު ކޭމްޕްތަކުގެ ތެރެއިން ދެވަނަ ކޭމްޕް ލާމު އަތޮޅު ގަމުގައި ކާމިޔާބުކަމާއެކު ނިންމާލައިފިއެވެ.
ޓްރީ ޓޮޕް ހޮސްޕިޓަލުން ލާމުގައި ކުރިއަށް ގެންދިއަ މަލްޓި-ސްޕެޝަލްޓީ ހެލްތު ކޭމްޕްތަކުގެ ތެރެއިން... ފޮޓޯ/ ޓްރީ ޓޮޕް
މި ކޭމްޕަކީ ރާއްޖޭގެ އެކި ސަރަހައްދުތަކަށް ސްޕެޝަލިސްޓް ސިއްޚީ ހިދުމަތްތައް ފޯރުކޮށްދިނުމަށް އެ ހޮސްޕިޓަލުން ކުރަމުންދާ މަސައްކަތުގެ ދަށުން ކުރިއަށް ގެންދިޔަ ހަރަކާތެކެވެ.
ޖޫން 19 އިން 20 އަށް ކުރިއަށްދިޔަ މި ހެލްތު ކޭމްޕަކީ ގަމު ރީޖަނަލް ހޮސްޕިޓަލާއި، ހައްދުންމަތީ ގަމު ކައުންސިލް އަދި ގަމު އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ގުޅިގެން ކުރިއަށް ގެންދިޔަ ކޭމްޕެކެވެ.
ޓްރީ ޓޮޕް ހޮސްޕިޓަލުން ލާމުގައި ކުރިއަށް ގެންދިއަ މަލްޓި-ސްޕެޝަލްޓީ ހެލްތު ކޭމްޕްތަކުގެ ތެރެއިން... ފޮޓޯ/ ޓްރީ ޓޮޕް
ދެ ދުވަހުގެ މުއްދަތަށް ކުރިއަށްދިޔަ މި ޕްރޮގްރާމުގައި ޖުމްލަ 492 ސްޕެޝަލިސްޓް ކޮންސަލްޓޭޝަން ފޯރުކޮށްދީފައިވެއެވެ. މީގެ ސަބަބުން މާލެއަށް ދަތުރުކުރުމަކާ ނުލައި ރަށުގައި ތިބެގެން މާހިރުންގެ ސިއްހީ ލަފާ ހޯދުމުގެ ފުރުސަތު އެ ސަރަހައްދުގެ ރައްޔިތުންނަށް ލިބިގެންދިޔައެވެ.
މި ކޭމްޕުގައި ހިތުގެ ބަލިތައް، އެންޑަކްރިނޮލޮޖީ، ކަންފަތް، ނޭފަތް، ކަރު، އާންމު ސާޖަރީ، ކަށީގެ ބަލިތައް، ފުއްޕާމޭގެ ބަލިތައް އަދި ކުޑަކަމުދާ ނިޒާމުގެ ބަލިތަކަށް ހާއްސަ ޑޮކްޓަރުން ބައިވެރިވެވަޑައިގެންނެވިއެވެ.
ޓްރީ ޓޮޕް ހޮސްޕިޓަލުން ލާމުގައި ކުރިއަށް ގެންދިއަ މަލްޓި-ސްޕެޝަލްޓީ ހެލްތު ކޭމްޕްތަކުގެ ތެރެއިން... ފޮޓޯ/ ޓްރީ ޓޮޕް
ކޮންސަލްޓޭޝަންތަކުގެ އިތުރުން ހެލްތު ސްކްރީނިންގް އާއި ސިއްޚީ ހޭލުންތެރިކަން އިތުރުކުރުމުގެ ޚިދުމަތްތައް ވެސް ވަނީ ފޯރުކޮށްދީފައެވެ.
ބަލިމީހުން ބެލުމުގެ އިތުރުން، ދުޅަހެޔޮ ދިރިއުޅުމަކަށް ބާރުއެޅުމުގެ ގޮތުން ގަމުގެ ދަރިވަރުންނަށް ހާއްސަ ސެސަނެއް ވެސް ކުރިއަށް ގެންގޮސްފައިވެއެވެ.
އަދި ގަމު ރީޖަނަލް ހޮސްޕިޓަލުގެ ނަރުހުންނަށް އަމާޒުކޮށްގެން ފަންނީ ތަރައްގީގެ ސެސަނެއް ބާއްވައި، ސިއްހީ ދާއިރާގެ މައުލޫމާތާއި ތަޖުރިބާ ހިއްސާކޮށްފައިވެއެވެ.
ޓްރީ ޓޮޕް ހޮސްޕިޓަލުން ލާމުގައި ކުރިއަށް ގެންދިއަ މަލްޓި-ސްޕެޝަލްޓީ ހެލްތު ކޭމްޕްގެ ބައިވެރިން... ފޮޓޯ/ ޓްރީ ޓޮޕް
މިއީ ޓްރީ ޓޮޕް ހޮސްޕިޓަލުން އިންތިޒާމުކޮށްގެން ބޭއްވި 18 ވަނަ އައުޓްރީޗް މަލްޓި-ސްޕެޝަލްޓީ ހެލްތު ކޭމްޕެވެ.
މީގެ ކުރިން މ، ދ، ތ، ގއ، ގދ، ހއ، ލ އަދި ށ, އަތޮޅުގައި ވެސް މިފަދަ ކޭމްޕްތައް ވަނީ ބާއްވާފައެވެ.
ޓްރީ ޓޮޕް ހޮސްޕިޓަލުން ބުނީ ކުރިއަށް އޮތް ތަނުގައި ވެސް ރާއްޖޭގެ އެކި ކަންކޮޅުތަކުގައި ސިއްހީ ހިދުމަތްތައް ފުޅާކޮށް، މުޖުތަމައުތައް ބާރުވެރިކުރުވުމަށް މަސައްކަތް ކުރާނެ ކަމަށެވެ.