18 Jun 2026, 09:01
ވޯލްޑް ކަޕް 2026 ގެ ގްރޫޕް ސްޓޭޖުގެ ފުރަތަމަ މެޗުގައި ކެޕްޓަން ހެރީ ކޭން ކާމިޔާބުކޮށްދިން ދެ ގޯލާއެކު ކްރޮއޭޝިއާ ބަލިކޮށް، އިންގްލެންޑުން މުބާރާތުގެ ފެށުން ރަނގަޅުކޮށްފިއެވެ.
އެމެރިކާގެ ޑެލަސް ސްޓޭޑިއަމްގައި ކުޅުނު މި މެޗު އިންގްލެންޑުން ކާމިޔާބުކުރީ 4-2 ގެ ނަތީޖާއަކުންނެވެ.
މެޗުގެ ފުރަތަމަ ލަނޑު 12 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ހެރީ ކޭންއެވެ. މިއީ ނުވަވަނަ މިނެޓުގައި ނޮނީ މަޑުއެކޭއަށް މޮޑްރިޗް ކުރި ފައުލަކަށް ލިބުނު ޕެނަލްޓީއެކެވެ. ކޭން ފުރަތަމަ ފޮނުވާލި ޕެނަލްޓީ ކްރޮއޭޝިއާގެ ކީޕަރު ލިވަކޮވިޗް މަތަކުރި ނަމަވެސް، އޭނާ ގަވައިދާއި ޚިލާފަށް ކުރިއަށް ނުކުތުމުން އަލުން ޖެހި ޕެނަލްޓީ ކޭން ވަނީ ގޯލަށް ފޮނުވާލާފައެވެ.
ކްރޮއޭޝިއާއިން ވަނީ ފުރަތަމަ ހާފުގައި ދެ ފަހަރަށް ނަތީޖާ ހަމަހަމަކޮށްފައެވެ. އެގޮތުން 36 ވަނަ މިނެޓުގައި މާޓިން ބަޓަރީނާ ލަނޑެއް ޖަހާފައިވަނިކޮށް، 42 ވަނަ މިނެޓުގައި ކޭން ވަނީ އިންގްލެންޑަށް ދެވަނަ ފަހަރަށް ލީޑު ހޯދައިދީފައެވެ. ނަމަވެސް ފުރަތަމަ ހާފުގެ އިތުރު ވަގުތުގައި ޕީޓާ މޫސާ ޖެހި ލަނޑާއެކު ފުރަތަމަ ހާފު ނިމުނީ 2-2 އިން އެއްވަރުވެގެންނެވެ.
ދެވަނަ ހާފު ފެށިގެން ދެވަނަ މިނެޓުގައި ޖޫޑް ބެލިންހަމް ވަނީ އިންގްލެންޑަށް އަލުން ލީޑު ހޯދައިދީފައެވެ. އަދި މެޗުގެ 85 ވަނަ މިނެޓުގައި ބުކަޔޯ ސަކާ ދިން ބޯޅައަކުން އިންގްލެންޑުގެ ހަތަރުވަނަ ލަނޑު ޖަހައިދީ މެޗުގެ ނަތީޖާ ކަށަވަރުކޮށްދިނީ ވެސް ބެލިންހަމްއެވެ.
މި މެޗުގައި ކްރޮއޭޝިއާގެ ކީޕަރު ލިވަކޮވިޗް ވަނީ އިންގްލެންޑުގެ ނުރައްކާތެރި ގިނަ ހަމަލާތަކެއް ދިފާއުކޮށްފައެވެ.
ޖަރުމަނުގެ ތަޖުރިބާކާރު ކޯޗު ތޯމަސް ޓުޗެލްގެ އިރުޝާދުގެ ދަށުން އިންގްލެންޑް މި މުބާރާތަށް ނުކުތީ ޒުވާން އަދި ތަޖުރިބާކާރު ކުޅުންތެރިންގެ ވަރުގަދަ ސްކޮޑަކާއެކުއެވެ. މި މޮޅާއެކު އިންގްލެންޑަށް ވަނީ ގްރޫޕް އެލްގައި މުހިންމު ތިން ޕޮއިންޓް ލިބިފައެވެ.