15 Jun 2026, 08:44
އެމެރިކާއާއި އީރާނާ ދެމެދު ހިނގަމުންދާ އަސްކަރީ ހަމަލާތައް ހުއްޓާލުމަށް ދެ ޤައުމުން ސުލްހައިގެ އެއްބަސްވުމަކަށް އައިސްފިއެވެ.
ބޭރުގެ މީޑިއާތައް ބުނާގޮތުން މި އެއްބަސްވުމުގައި ރަސްމީކޮށް ސޮއިކުރުމަށް ހަމަޖެހިފައިވަނީ އަންނަ ހުކުރު ދުވަހު ސްވިޒަލޭންޑްގައެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ މި ތާރީޚީ އެއްބަސްވުމުގެ ސަބަބުން، ހުއްޓިފައިވާ ތެލުގެ ވިޔަފާރި އަލުން ފެށިގެންދާނެކަމަށް ވިދާޅުވެފައެވެ.
ޤަތަރުގެ މެދުވެރިންނާއެކު 14 ވަރަކަށް ގަޑިއިރުގެ ދިގު މަޝްވަރާތަކެއް ތެހެރާންގައި ކުރިއަށް ގެންދިއުމަށްފަހު، އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބާބާދީ ވަނީ މި އެއްބަސްވުން ފައިނަލްވެފައިވާކަން ދައުލަތުގެ ޓީވީ މެދުވެރިކޮށް ޔަޤީންކޮށްދެއްވާފައެވެ. އީރާނުގެ އަސްކަރިއްޔާއިން މިކަން ސިފަކުރަނީ އެމީހުންނަށް ލިބުނު ބޮޑު ކާމިޔާބީއެއްގެ ގޮތުގައެވެ.
މި އެއްބަސްވުމުގެ ސަބަބުން މުޅި ސަރަޙައްދަށް ބޮޑެތި ބަދަލުތަކެއް އަންނާނެކަމަށް ބެލެވެއެވެ. ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވި ގޮތުގައި، މިއެއްބަސްވުމުގެ ދަށުން ލުބުނާންވެސް ހިމެނޭހެން ހުރިހާ ފްރަންޓެއްގައި ހިނގަމުންދާ އަސްކަރީ އޮޕަރޭޝަންތައް ހުއްޓާލެވޭނެއެވެ.
މީގެ އިތުރުން އީރާނުގެ މީޑިއާތަކުން ރިޕޯޓުކުރާ ގޮތުގައި އެއްބަސްވުމުގެ ދަށުން އެމެރިކާއިން އީރާނަށް އަޅާފައިވާ ކަނޑުގެ ބްލޮކޭޑް 30 ދުވަސް ތެރޭގައި ނިމުމަކަށް އަންނާނެއެވެ.
ޓްރަމްޕް ވިދާޅުވެފައިވަނީ ހުކުރު ދުވަހު އެއްބަސްވުމުގައި ސޮއިކުރުމާއެކު ހުރްމޫޒް ކަނޑުއޮޅި ދާއިމީކޮށް ހުޅުވިގެންދާނެ ކަމަށެވެ. ދުނިޔޭގެ ތެލުގެ ބޮޑު ބައެއް އުފުލާ މި މުހިންމު ކަނޑުއޮޅި ހުޅުވޭނެކަމުގެ ޚަބަރާއެކު، އޭޝިއާގެ ބާޒާރުގައި ތެލުގެ އަގު މިހާރުވެސް ވަނީ 3.8 ޕަސެންޓް ދަށްވެފައެވެ.
މި ސުލްހައިގެ އެއްބަސްވުމަށް ބައިނަލްއަޤްވާމީ މުޖުތަމަޢުން ދަނީ މަރުޙަބާ ކިޔަމުންނެވެ. އިނގިރޭސިވިލާތް، ފަރަންސޭސިވިލާތް، ޖަރުމަނު އަދި އިޓަލީން ވަނީ މިކަމަށް ތާއީދުކޮށްފައެވެ.
އިނގިރޭސި ބޮޑުވަޒީރު ކިއާ ސްޓާމާ ފާހަގަކުރެއްވި ގޮތުގައި މިއީ ސަރަޙައްދީ ހަމަޖެހުމަށާއި ދުނިޔޭގެ އިޤްތިޞާދަށް ލިބުނު ވަރަށް މުހިންމު ކުރިއެރުމެކެވެ. މީގެ އިތުރުން، އީރާނުން ނިއުކްލިއާ ހަތިޔާރު އުފެއްދުން ހުއްޓުވުމާ ގުޅޭގޮތުން ހަރުދަނާ ފިޔަވަޅުތަކެއް މި އެއްބަސްވުމުގެ ދަށުން އެޅިގެންދާނެ ކަމަށް އެމެރިކާއިން އުއްމީދުކުރެއެވެ.
އެއްބަސްވުމުގެ ފުރިހަމަ ތަފްސީލުތައް ކުރިއަށް އޮތް ދުވަސްތަކުގައި އިތުރަށް ހާމަވެގެންދާނެ ކަމަށް ބެލެވެއެވެ.