13 Jun 2026, 08:33
ބޮލީވުޑްގެ ބަތަލާ ޝްރައްދާ ކަޕޫރު ނެށުންތެރިއެއްގެ ގޮތުގައި ފެންނާނެ ފިލްމު "އީތާ" މި އަހަރުގެ އޮގަސްޓް މަހު ސިނަމާތަކަށް ގެންނާނެކަން އިއުލާނުކޮށްފިއެވެ.
މި ފިލްމަކީ، ލަކްޝްމަން އުޓޭކަރު ޑައިރެކްޓްކޮށް ދިނޭޝް ވިޖަންގެ މެޑޮކް ފިލްމްސްއިން އުފައްދާ ބައޮޕިކްއެކެވެ. ފިލްމުގައި ޝްރައްދާ ފެންނާނީ އިންޑިއާގެ ކުރީގެ މަރާޓީ ނެށުންތެރިޔާ ވިތާބާއީ ނަރަޔަންގާއޮންކަރުގެ ކެރެކްޓާއިންނެވެ.
ވިތާބާއީ ނަރަޔަންގާއޮންކަރަކީ މަހާރާޝްތުރާގެ ފޯކް ތިއޭޓަރުގައި 'ލަވަނީ' އަދި 'ތަމާޝާ' ނެށުމުގެ ރޮނގުން ފާހަގަކޮށްލެވޭ ފުންނާބު އުސް ފަންނާނެކެވެ. ސަގާފީ ފަންނަށް އޭނާ ކޮށްދިން ޚިދުމަތުގެ އަގުވަޒަންކުރުމުގެ ގޮތުން 1957 އަދި 1990 ވަނަ އަހަރު ވަނީ ރިޔާސީ މެޑަލް އަރުވާފައެވެ.
މި ފިލްމުން ޝްރައްދާގެ އިތުރުން ކުޅަދާނަ އެކްޓަރު ރަންދީޕް ހުޑާ އަދި ފިލްމީ ތަރި މުހައްމަދު ޒީޝާން އައްޔޫބު ވެސް މުހިއްމު ރޯލްތަކުން ފެންނާނެއެވެ.
ސިދާތުގެ ފިލްމު "ވީވަން" އަދި ޝްރައްދާގެ ފިލްމު "އީތާ"ގެ ޕޯސްޓަރެއް--ފޮޓޯ/ފޭސްބުކް
މި ފިލްމަކީ "ސްޓްރީ" ފްރެންޗައިޒްގެ ކާމިޔާބީއަށްފަހު، ޝްރައްދާ އާއި ދިނޭޝް ވިޖަން އެކުގައި މަސައްކަތްކުރާ ދެވަނަ ޕްރޮޖެކްޓެވެ. ދިނޭޝް ވިޖަން އާއި ޑައިރެކްޓަރު އުޓޭކަރު ވަނީ މީގެ ކުރިން ވިކީ ކޯޝަލް ހިމަނައިގެން "ޗާވާ"ގައި ވެސް އެކުގައި މަސައްކަތްކޮށްފައެވެ
ޝްރައްދާގެ ފިލްމު "އީތާ" ރިލީޒްކުރާ ތާރީޚުގައި ސިދާތު މަލްހޯތުރާ އާއި ތަމަންނާ ބާޓިއާގެ "ވީވާން - ފޯސް އޮފް ދަ ފޮރެސްޓް" ރިލީޒްކުރާތީ ބޮކްސް އޮފީހުގައި ދެ ތަރިންގެ ވާދަވެރި ކުރިމަތިލުމެއް ހިނގާނެ ކަމަށް ބެލެވެއެވެ.
ޕްރޮޑިއުސަރު އެކްތާ ކަޕޫރުގެ ބާލާޖީ ބޭނާގެ ދަށުން އުފައްދާ މި ފިލްމަކީ ދީޕަކް މިޝްރާ ޑައިރެކްޓްކޮށް ގެނެސްދޭ ފިލްމެކެވެ. މި އަހަރު ރިލީޒްކުރާ ފިލްމުތަކުގެ ތެރެއިން ގިނަ ބަޔަކު އިންތިޒާރުކުރާ މި ފިލްމަކީ، އިންޑިއާގެ ތާރީޚީ ވާހަކަތަކެއް ގެނެސްދީ، އިންޑިއާގެ ބިޔަ ޖަންގަލިތަކުގައި ފޮރުވިފައިވާ ސިއްރު ވާހަކަތަކުގެ މައްޗަށް ބިނާކޮށް އުފައްދާ ބިރުވެރި އެކްޝަން ތުރިލާއެކެވެ.