06 Jun 2026, 03:52
ކިންގްސް ކަޕް ފުޓްސަލް މުބާރާތުގައި ރޭ ކުޅުނު މެޗުން މޮޅުވެ އެސްޓީއޯ އިން ގްރޫޕުގެ އެއްވަނަ މަގާމު ކަށަވަރުކޮށްފިއެވެ.
ނަމަވެސް، މި ގްރޫޕުގައި ހިމެނޭ އެންމެ ފަހުގެ ޗެމްޕިއަން ރޯޑް ރިކްރިއޭޝަން ކްލަބް (އާރްއާރްސީ) ރޭގެ މެޗުން މޮޅުވި ނަމަވެސް، މުބާރާތުގައި ކުރިއަށް ދިއުމުގެ އުންމީދު ކުޑަވެފައެވެ.
ފުވައްމުލަކު ފިސްޑާއާ ވާދަކޮށް އާރްއާރްސީ ރޭގެ މެޗު ކާމިޔާބުކުރީ 4-3 ގެ ހަނި ނަތީޖާއަކުންނެވެ. ކުއާޓާގެ އުންމީދު އަމިއްލަ ބާރުގައި ދަމަހައްޓަން ބޮޑު ތަފާތަކުން މޮޅުވާން މަޖުބޫރުވެފައި އޮތް ނަމަވެސް، މި ހަނި މޮޅާއެކު އެޓީމު މުބާރާތުން ކެޓުމުގެ ބިރު މިހާރު ވަނީ އިންތިހާއަށް ބޮޑުވެފައެވެ.
މި ގްރޫޕުގެ އަނެއް މެޗުގައި އެސްޓީއޯ އިން ވަނީ 1-0 ގެ ނަތީޖާއަކުން ތާވަލުގެ އެއްވަނައިގައި އޮތް ހޯކްސް ބަލިކޮށްފައެވެ.
ކްލަބް މޯލްޑިވްސް ކިންގްސް ކަޕުގައި އެސްޓީއޯއާއި ހޯކްސް ބައްދަލުކުރި މެޗުގެ ތެރެއިން-- ފޮޓޯ: ފޮޓޯ މާސްޓާ
ގްރޫޕުގެ ފަހުގެ ރޭންކިންގް:
1 ވަނަ: އެސްޓީއޯ (9 ޕޮއިންޓް)
- 2 ވަނަ: ހޯކްސް (6 ޕޮއިންޓް)
- 3 ވަނަ: އާރްއާރްސީ (3 ޕޮއިންޓް، ގެއްލުން 2 ގޯލް)
- 4 ވަނަ: ފިސްޑާ (0 ޕޮއިންޓް - މުބާރާތުން ވަނީ ކަޓާފައި)
އާރްއާރްސީއަށް ކުއާޓާގެ ޖާގައެއް ލިބުމުގެ ހަނި ފުރުސަތު އޮތް ގޮތް
މާދަމާރޭ (ހޮނިހިރު ދުވަހުގެރޭ) ގްރޫޕް އޭގައި ހިމެނޭ އޭދަފުށީގެ އެއިޓީފޯ އެފްސީ އާއި އުތީމު އެފްސީ ބައްދަލުކުރާ މެޗުން ކޮންމެވެސް އެއް ޓީމަކުން ބޮޑު ތަފާތަކުން މޮޅުވުމެވެ. އެނޫން ކޮންމެ ނަތީޖާއަކުން (މެޗު އެއްވަރުވިޔަސް) ތިންވަނައިގައި އޮތް އާރްއާރްސީ މުބާރާތުން ކަޓައި، އެއިޓީފޯ އާއި އުތީމަށް ކުއާޓާގެ ޖާގަ ލިބޭނެއެވެ.
މި މުބާރާތުގެ ކުއާޓާ ފައިނަލަށް ހޮވޭނީ ކޮންމެ ގްރޫޕެއްގެ އެންމެ ކުރި ހޯދާ ދެ ޓީމުގެ އިތުރުން، ތިންވަނައަށްދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމެވެ.
ކްލަބް މޯލްޑިވްސް ކިންގްސް ކަޕުގައި އާރުއާރުސީއާއި ފިސްޑާ ބައްދަލުކުރި މެޗުގެ ތެރެއިން-- ފޮޓޯ: ފޮޓޯ މާސްޓާ
ގްރޫޕް ސްޓޭޖުގެ ފަހު ދެ މެޗު ހޮނިހިރު ދުވަހުގެރޭ 8:30 ގައި ފަށާއިރު، ފުރަތަމަ މެޗުގައި ބައްދަލުކުރާނީ އެޗްޕީއެސްއެން އާއި އެމްޓީސީސީއެވެ. ދެވަނަ މެޗުގައި ކުޅޭނީ އެއިޓީފޯ އާއި އުތީމެވެ.
އާރްއާރްސީއަކީ އެންމެ ފަހުގެ ކިންގްސް ކަޕްގެ އިތުރުން ކްލަބް މޯލްޑިވްސްގެ ވެސް ޗެމްޕިއަނުންނެވެ. މިދިޔަ އަހަރު އެ ދެ މުބާރާތް ވެސް އެޓީމުން ކާމިޔާބުކުރީ އެއްވެސް މެޗަކުން ބަލިނުވެއެވެ. މިއަހަރުގެ މުބާރާތަށް ވެސް އެޓީމުން ނުކުތީ ރާއްޖޭގެ ފުންނާބުއުސް ގިނަ ތަރިންތަކަކާއެކުގައެވެ.
މިއަހަރުގެ މުބާރާތުގެ ބްރޯޑްކާސްޓިން ޕާޓްނަރަކީ ސަން ސިޔާމް މީޑިއާއެވެ. މުބާރާތުގެ ހުރިހާ މެޗެއް ސަން ޕްލޭއިން ވަގުތުން ގެނެސްދޭއިރު، އެސްއެސްޓީވީ އަދި އެސްއެސްޓީވީ ފޭސްބުކް ޕޭޖް މެދުވެރިކޮށް ވަގުތުން ގެނެސްދިނުމަށް ވަނީ ހަމަޖެހިފައެވެ.