05 Jun 2026, 11:01
ތިމާވެށި ހިމާޔަތް ކުރެއްވުމަށް މިހާރަށްވުރެ ހަރުދަނާ ފިޔަވަޅުތަކެއް އަޅުއްވައި، އެ ކަންކަން ތަންފީޒު ކޮށްދެއްވުމަށް އެމްޑީއޭގެ ރައީސް އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު އިލްތިމާސްކުރައްވައިފިއެވެ.
މިއަދު ފާހަގަކުރާ ތިމާވެށީގެ ދުވަހުގެ މުނާސަބަތުގައި އެ މަނިކުފާނު ފޮނުއްވި ޚިތާބުގައި ވަނީ ދުވަހުގެ ތަހުނިޔާ އަރިސްކުރައްވާފައެވެ.
މިގޮތުން، މިއަދަކީ އަހަރެމެންގެ ވަށައިގެންވާ ނިޒާމާމެދު ފުންކޮށް ވިސްނައި، އެއިން އަގުހުރި ފިލާވަޅުތަކެއް ލިބިގަންނަން ޖެހޭ ދުވަހެއް ކަމަށާއި ތިމާވެއްޓަކީ އަހަރެމެންގެ ބާއްޖަވެރި ދިރިއުޅުމުގެ މައިގަނޑު އަސާސްކަމަށް ސިޔާމް ވިދާޅުވިއެވެ.
ތިމާވެށި ރައްކާތެރިކުރުމުގައި ކުޑަ މިންވަރަކަށް ވެސް އިހުމާލުވުމަކީ ކުރެވެން އޮތް ކަމެއް ނޫންކަން ގަބޫލުކުރަން ޖެހޭކަން އެ މަނިކުފާނު ހަނދާންކޮށްދެއްވިއެވެ.
ސިޔާމް މީހަކާ ސަލާންކުރައްވަނީ: ވިދާޅުވީ، ތިމާވެށި ހިމާޔަތްކުރެއްވުމަށް މިހާރަށް ވުރެ ހަރުދަނާ ފިޔަވަޅުތަކެއް އަޅުއްވައި އެ ކަންކަން ތަންފީޒު ކުރައްވަން ޖެހޭ ކަމަށް -- ސަން ފޮޓޯ/ އަމަން ލަތީފް
އެކަމަކު، އަހަރަމެންގެ އަމަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރުތައް ފެންނަން ފަށާފައިވާކަން ހިތާމައާއެކު، ފާހަގަކުރައްވައި ސިޔާމް ވަނީ އެފަދަ ކަންކަމަށް ވެސް އަލިއަޅުވާލައްވާފައެވެ.
އެގޮތުން، ކަނޑުތަކަށް ކުނި އެޅުމާއި ގޮނޑުދޮށްތަކުން ވެއްޔާއި އަކިރި ނެގުމާއި ހޭޅިފަށުން ރުއްގަސް ކެނޑުމާއި ފަރުތަކާއި ހާހަލަށް ގެއްލުންދޭ ފަދަ އަމަލުތައް ތަކުރާރުވަމުން އަންނަކަން އެ މަނިކުފާނު ފާހަގަކުރެއްވިއެވެ.
އެހެންވެ، އެ ތަންތަން ހިމާޔަތްކުރެއްވުމަށް އެންމެނަށް ސިޔާމް ވަނީ އިލްތިމާސްކުރައްވާފައެވެ. ފަރުދީ ފެންވަރުގައި ތިމާވެއްޓަށް ގެއްލުންދޭ ކަންކަމުން ދުރުވެ، ތިމާވެށި ރައްކާތެރިކުރުމަށް ޚާއްސަ ސަމާލުކަމެއް ދިނުމަށް އެ މަނިކުފާނު ގޮވާލެއްވިއެވެ.
އަޅުގަނޑުގެ އިޚުލާސްތެރި ދުއާއަކީ، ތިމާވެށި ހިމާޔަތްކުރުމަށްޓަކައި، ގައުމީ ފެންވަރުގައި މިހާރަށްވުރެ ހަރުދަނާ ފިޔަވަޅުތަކެއް އަޅައި، ކަމާ ބެހޭ ފަރާތްތަކުން އެ ފިޔަވަޅުތައް ފުރިހަމައަށް ތަންފީޒުކޮށްދެއްވުންމީދޫ ދާއިރާގެ މެންބަރު އަހުމަދު ސިޔާމް މުހައްމަދު
ސިޔާމްގެ ޚިތާބު ނިންމަވާލެއްވީ، ތިމާވެށީގެ ނުރައްކާތެރި ކާރިސާތަކުން ރާއްޖެ ސަލާމަތްކޮށް، ސާފުތާހިރު ވެއްޓެއްގައި ދިރިއުޅުމުގެ ހެޔޮ ތައުފީގު އަހަރެމެންނަށް މިންވަރު ކޮށްދިނުމަށް އެދި ދުއާކުރައްވަމުންނެވެ.
ސިޔާމް އެ ފަދައިން އިލްތިމާސްކުރެއްވިއިރު، ތިމާވެއްޓަށް ނޭދެވޭ އަސަރުތައް ކުރާ އެކި ކަންކަން ރާއްޖޭގައި އަންނަނީ ތަކުރާރުވަމުންނެވެ.
މިގޮތުން، ރާއްޖޭގެ އެކި ސަރަހައްދުތަކުގައި ކުރިއަށްގެންދާ ތަރައްޤީގެ މަޝްރޫޢުތަކުގައި ތިމާވެށި ރައްކާތެރިކުރުމަށް ކަނޑައަޅާފައިވާ ފިޔަވަޅުތަކަށް އިހުމާލުވަމުންދާކަމުގެ ޝަކުވާ ލިބޭތީ، އެ ކަމާ ގުޅޭގޮތުން އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ)އިން މި ފަހުން ވެސް ކަންބޮޑުވުން ފާޅުކުރިއެވެ.