15 May 2026, 16:02
އަންނަ ޖޫންމަހު އެމެރިކާ، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގައި ބައިވެރިވުމަށް އީރާންގެ ގައުމީ ފުޓްބޯޅަ ޓީމަށް ބޭނުންވާ އެމެރިކާގެ ވިސާ އަދި މިހާތަނަށް ދޫކޮށްފައި ނުވާ ކަމަށް އީރާންގެ ފުޓްބޯޅަ ފެޑެރޭޝަނުން ބުނެފިއެވެ.
މިކަން ހާމަކުރައްވާފައިވަނީ އެ ފެޑެރޭޝަންގެ ރައީސް މަހްދީ ތާޖް ބުރާސްފަތި ދުވަހު ދެއްވި ބަޔާނެއްގައެވެ.
އީރާންގެ ދައުލަތުގެ މީޑިއާ އައި.އާރް.އެން.އޭ އިން ރިޕޯޓްކޮށްފައިވާ ގޮތުގައި، ވިސާގެ މައްސަލައިގައި ފީފާއާއެކު މުހިންމު ބައްދަލުވުމެއް ބޭއްވުމަށް ވަނީ ހަމަޖެހިފައެވެ.
"މާދަމާ ނުވަތަ އޭގެ އަނެއް ދުވަހު ފީފާއާއެކު އަޅުގަނޑުމެން ނިންމުންތަކެއް ނިންމާ ބައްދަލުވުމެއް ބާއްވާނަން. ވިސާގެ މައްސަލަ އަދިވެސް ހައްލުނުވާތީ، އެފަރާތުން އަޅުގަނޑުމެންނަށް ޔަގީންކަން ދޭންޖެހޭނެ،" މަހްދީ ތާޖް ވިދާޅުވިއެވެ.
ވިސާ ހޯދުމުގެ މަރުހަލާގެ ތެރެއިން އިނގިލީގެ ނިޝާން ޖެހުމަށް އީރާންގެ ކުޅުންތެރިން ތުރުކީގެ އަންކާރާއަށް ދިއުމަށް ކުރިން ރޭވިފައި އޮތް ނަމަވެސް، އެކަން އަންޓަލްޔާގައި ކުރެވޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާ ކަމަށްވެސް އޭނާ ފާހަގަކުރެއްވިއެވެ.
އީރާނާއި އެމެރިކާއާ ދެމެދު 1980 ވަނަ އަހަރުން ފެށިގެން ސިޔާސީ ގުޅުން ކެނޑިފައިވާތީ، ވިސާގެ ކަންކަމުގައި ގިނަ ގޮންޖެހުންތަކެއް ކުރިމަތިވެއެވެ.
މި މުބާރާތުގައި އީރާންގެ ޓީމު މަޑުކުރާނީ އެމެރިކާގެ އެރިޒޯނާގެ ޓޫސަންގައެވެ. ގްރޫޕް ޖީގައި ހިމެނޭ އީރާންގެ ފުރަތަމަ މެޗު އޮންނާނީ ޖޫން 15 ވަނަ ދުވަހު ލޮސް އެންޖެލެސްގައި ނިއުޒީލެންޑާ ދެކޮޅަށެވެ. މީގެ އިތުރުން މި ގްރޫޕްގައި ބެލްޖިއަމް އަދި މިސްރުވެސް ހިމެނެއެވެ.
އީރާނުން ވަނީ މިދިޔަ ބުދަ ދުވަހު ގައުމީ ޓީމަށް އަލްވަދާއު ކިޔުމުގެ ރަސްމިއްޔާތެއްވެސް ބާއްވާފައެވެ.
ނަމަވެސް ވިސާގެ ކަންކަން އަދިވެސް ނުނިމި އޮތުމަކީ ޓީމުގެ ތައްޔާރީތަކަށް އޮތް ބޮޑު ކަންބޮޑުވުމެކެވެ.