Last Updated: 1 decade 3 year ago

Last Updated:
1 decade 3 year ago

ފިލްމާ ދެކޮޅަށް ރާއްޖޭގައިވެސް މުޒާހަރާ ކޮށްފި

    ބުލޮގު ޚުލާސާ
    *** އިސްލާމް ދީނަށާއި ރަސޫލާއަށް ފުރައްސާރަކޮށް އެމެރިކާގެ ބަޔަކު އުފެއްދި ފިލްމް، "އިނޮސެންސް އޮފް މުސްލިމްސް"އާ ދެކޮޅަށް ރާއްޖޭގައިވެސް މިއަދު މުޒާހަރާ ކުރަމުން އެބަދެ އެވެ.

    މުސްލިމު ގައުމުތަށް ކަމަށްވާ ލީބިޔާ، މިސްރު އަދި ޔަމަންގައިވެސް އަންނަނީ އެ ފިލްމާ ދެކޮޅު ހެދުމުގެ ގޮތުން ބޮޑެތި މުޒާހަރާތައް ކުރަމުންނެވެ. އެ މުޒާހަރާތައް ހަމަނުޖެހުމަކަށް ބަދަލުވެ ލީބިޔާގައި، ހުންނަ އެމެރިކާ އެމްބަސީއަށް ހަމަލާދީ އެ ގައުމުގައި ހުންނެވި އެމެރިކާ ސަފީރުވެސް ވަނީ މިހަފްތާ އަވަހާރަކޮށްލައިފަ އެވެ.

    ރާއްޖޭގައި އެ ފިލްމާ ދެކޮޅު ހެދުމުގެ ގޮތުން މުޒާހަރާ ކުރަމުން ދަނީ ރާއްޖޭގައި ހުންނަ އދ ގެ މައި އިދާރާ ހިމެނޭ ސަރަހައްދުގަ އެވެ. ނަމަވެސް އެ އިމާރާތް ކައިރި ފުލުހުން މިހާރު ވަނީ ބަންދުކޮށްފަ އެވެ. އެހެންކަމުން މުޒާހަރާ ކުރާ މީހުން ޝުއޫރުފާޅުކުރަމުން ގެންދަނީ ބިލޮގު ސްކޫލް ކައިރިން އަމީނީ މަގުގަ އެވެ.

    އެމީހުން އަންނަނީ އެމެރިކާ އާއި އިޒްރޭލާ ދެކޮޅަށް އަޑުއުފުލަމުންނެވެ. އެގޮތުން ދާދިފަހުން ދާރުލްއާސާރަށް އެމެރިކާއިން ދިން އެހީ އަބުރާ އެމެރިކާ ސަރުކާރާ ހަވާލުކުރުމަށް އެމީހުން އަންނަނީ ދިވެހި ސަރުކާރަށް ގޮވާލަމުންނެވެ.

    17:32

    ޝައިހް ތޮއްޔިބު މުޒާހަރާގައި ތަގުރީރު ކުރައްވަން ފެއްޓެވުމުން އޭނާއާވެސް ދެކޮޅަށް އަޑުއުފުލައި މުޒާހަރާގެ ތެރޭގައި ދެބަސްވުން ހިނގައި މުޒާހަރާ ހުއްޓާލިކަން އިއުލާންކޮށްފި. ނިންމާލީ އެކަމާ ދެކޮޅަށް އިތުރު ހަރަކާތްތައް އަދިވެސް ބާއްވާނެ ކަމަށް ބުނަމުން. އެ ސަރަހައްދުން މަޑުމަޑުން މީހުން ދާން ފަށައިފި.
    17:28

    މުޒާހަރާއަށް މަޑުމަޑުން މީހުން އަންނަނީ ޖަމާވަމުން. މުޒާހަރާގެ ބައިވެރިން މިވަގުތު ތިބީ މަގުމަތީގައި އިށީީންދެގެން. މުޒާހަރާގައި އަންހެނުން ބައިވެރިވަމުން އަންނަ އިރު އެމީހުން ތިބީ އަމީނީ މަގުން ބިލޮބޮންގް ސްކޫލާ ހިސާބުގައި. ރަސޫލާގެ ހަޔާތްޕުޅާ ބެހޭ ގޮތުން ދީނީ އިސްލްމްވެރިއަކު އަންނަނީ ވާހަކަ ދައްކަވަމުން. އެއީ ކޮން އިލްމުވެރިއެއްކަން ސާފެއް ނުވޭ.
    17:14

    މުޒާހަރާޔާ ދެކޮޮޅަށް އިސްލާމިކް މިނިސްޓާ ޝަހީމް ވާހަކަދެއްކެވި ކަމަށް ބުނެ އެކަމާ ދެކޮޅު ހަދައި، ޝަހީމް އިސްތިއުފާއަށް މުޒާހަރާގެ ބައިވެރިން އަންނަނީ ގޮވަމުން. އެ މީހުން ބުނަނީ އަޑުއުފުލަނީ ޕާޓީއެއްގެ ފިކުރުގައި ނޫން ކަމަށާއި އިސްލާމްދީން ހިމާޔަތް ކުރުމަށް ކަމަށް.
    17:10

    މުޒާހަރާ ކޮންޓްރޯލް ކުރުމަށް ރަޔަޓް ފުލުހުންވެސް މިހާރު އެ ސަރަހައްދަށް އައިސްފި.
    17:06

    އެ ސަރަހައްދުން މީހުން ދުރުކުރަން ފުލުހުން އަންނަނީ މަސައްކަތް ކުރަމުން. ނަމަވެސް މީހުން ދުރަށް ދާކަށް ނޫޅޭ.
    16:55

    މުޒާހަރާ ކުރާ މީހުން މިހާރުވަނީ ޔޫއެން ބިލްޑިންގް ދޮރުމައްޗާ ހިސާބަށް ކުރިއަށް ޖެހިފައި. އެ ސަރަހައްދުގައި ތިބެ އެމީހުން އަންނަނީ އެމެރިކާގެ ދިދަ އަންދާ ހަނދަމުން.
    16:42ޔޫއެން ބިލްޑިންގް ކައިރިން

    މުޒާހަރާ ކުރާމީހުން ބެރިކޭޑް ފަޅާލައި ކޯޑަން ތެރެއަށް ވަންނަން އުޅުމުން ފުލުހުން ޕެޕާ ސްޕްރޭޖަހައިފި. އެ މީހުން އަންނަނީ އައްލާހު އަކުބަރުގެ ޝުއޫރާ އެކު އެމެރިކާ އާއި ހުޅަނގުގެ ގައުމުތަކަށް ވަރަށް ބޮޑަށް ފާޑުކިޔާ ރުޅިވެރި ކަމުގެ ޝުއޫރު ފާޅުކުރަމުން.