17 Apr 2026, 22:29
އަމިއްލައަށް ވިސްނައިގެން ފަރުމާކުރުމުގެ ގާބިލުކަން ލިބިފައިވާ "ކޭންވާ އޭއައި 2.0" ދުނިޔެއަށް ދައްކާލައިފިއެވެ.
ކެލިފޯނިއާގެ ލޮސް އެންޖެލިސްގައި ބޭއްވި "ކޭންވާ ކްރިއޭޓް 2026" އިވެންޓުގައި ތައާރަފުކުރި މި އައު ނިޒާމަކީ، މީހަކާ ވާހަކަދައްކައިގެން ކަންކަން ކުރާ ފަދައިން ބޭނުންކުރެވޭނެ އެހީތެރިއެކެވެ. މިއާއެކު ކޭންވާ ބޭނުންކުރާ ފަރާތްތަކަށް ޑިޒައިން ކުރުމުގެ ތަޖުރިބާ މުޅިން އައު ހަރުފަތަކަށް ގެންގޮސްދޭނެއެވެ.
މި އައު އަޕްގްރޭޑާއެކު ކޭންވާގެ އޭއައި އަށް ލިޔުމުން، އަޑުން ނުވަތަ ކުރަހާފައިވާ އާދައިގެ ސްކެޗެއް ދީގެން ވެސް ބޭނުންވާ ޑިޒައިނެއް ފުރިހަމަކޮށްލެވޭނެއެވެ. އަދި އެއްފަހަރު ދޭ އިރުޝާދުގެ މަތިން ހަނދާން ބަހައްޓައިގެން، އެކި މަރުހަލާތަކަށް ބަހާލައިގެން ޑިޒައިނަށް ބަދަލުތައް ގެނައުމުގެ ގާބިލުކަން ވެސް މި ނިޒާމަށް ވަނީ ލިބިފައެވެ.
އެންމެ ޕްރޮމްޕްޓަކުން ގިނަ ކަންކަން މިހާރު ކޮށްލެވޭނެ ---
މީގެ އިތުރުން އެންމެ ޕްރޮމްޕްޓަކުން އެކި ޕްލެޓްފޯމުތަކަށް ގުޅޭ ގޮތަށް މުޅި ކެމްޕޭނެއްގެ ޑިޒައިންތައް ވެސް އެއްފަހަރާ އުފައްދައިލެވޭނެއެވެ.
މި ނިޒާމުގައި ހިމެނޭ "ލޭޔާޑް އޮބްޖެކްޓް އިންޓެލިޖެންސް" ގެ ސަބަބުން، ޑިޒައިންގެ އެހެން ބައިތަކަށް އަސަރު ނުކުރާނެހެން ވަކި ލޭޔަރަކަށް ނުވަތަ އެއްޗަކަށް ބަދަލު ގެނެވޭނެއެވެ. މިސާލަކަށް، މުޅި ޑިޒައިން ބަދަލުނުކޮށް ހަމައެކަނި އަކުރުގެ ސްޓައިލް ނުވަތަ ފަހަތުގެ އަލިކަން ބަދަލުކޮށްލަން އޭއައިއަށް އެންގިދާނެއެވެ.
އަލަށް ތައާރަފުކުރި "މެމަރީ ލައިބްރަރީ" ގެ ދަށުން، ޔޫޒަރުންގެ ބްރޭންޑް ސްޓައިލްތަކާއި އިޚުތިޔާރުތައް އޭއައި އަށް ދަސްވެ، ހަނދާން ހުންނާނެއެވެ. މީގެ ސަބަބުން ކުރިމަގުގައި ކުރާ ޑިޒައިންތައް އަވަސްވެ، ޔޫޒަރާ ގުޅޭ ގޮތަށް ޑިޒައިންތައް އުފައްދައި ދިނުމަށް މި ފީޗާ އެހީތެރިވެދޭނެއެވެ.
މީގެ އިތުރުން ސްލެކް، ޖީމެއިލް، ގޫގުލް ކަލަންޑަރު އަދި ޒޫމް ފަދަ އެޕްލިކޭޝަންތަކާ ކޭންވާ ގުޅުވާލުމުގެ ފުރުސަތު ވެސް ވަނީ ފަހިކޮށްދީފައެވެ. އަދި އިންޓަނެޓުން މައުލޫމާތު ހޯދައިގެން ޑިޒައިންތަކަށް އެ މައުލޫމާތުތައް އަމިއްލައަށް އިތުރުކުރުމުގެ ގާބިލުކަން ވެބް ރިސާޗް ފީޗާ މެދުވެރިކޮށް ލިބިގެންދާނެއެވެ.
އޮފްލައިންކޮށް ހުންނަ ވަގުތުތަކުގައި ވެސް މަސައްކަތްކުރާނެހެން އޭއައި ލައްވާ ޓާސްކުތައް ޝެޑިއުލް ކުރުމުގެ އައު ފީޗާއެއްވެސް މީގައި ހިމެނެއެވެ.
ކޭންވާއިން މަޢުލޫމާތު ދޭގޮތުގައި، މި އައު ފީޗާތައް ކުރިއަށް އޮތް ހަފްތާތަކުގެ ތެރޭގައި ދުނިޔޭގެ އެކި ކަންކޮޅުތަކުގައި ތިބި ސަބްސްކްރައިބް ކޮށްފައިވާ ޔޫޒަރުންނަށް ލިބެން ފަށާނެއެވެ.