16 Apr 2026, 09:52
ޓެބްލެޓެއް ފަދަ ފުޅާ ސްކްރީނެއް އެކުލެވޭ ސެމްސަންގުގެ އާ "ޓްރައި-ފޯލްޑް" ޑިޒައިން ދައްކާލައިފިއެވެ.
ފަށްޖެހޭ ފޯނުތައް އުފެއްދުމުގައި ދުނިޔޭގެ އެންމެ ކުރީގައި އުޅޭ ސެމްސަންގުން، "ޓްރައި-ފޯލްޑް" ޑިޒައިނެއްގެ މަސައްކަތް ކުރަމުން އަންނަކަން ދާދިފަހުންއާންމުވި ޕޭޓަންޓަކުންހާމަވެފައިވެއެވެ. މި އާ ޕޭޓަންޓާއެކު، 2025 ވަނަ އަހަރު ސެމްސަންގުން ބާޒާރަށް ނެރޭނެ ކަމަށް ބެލެވޭ "ގެލެކްސީ ޒީ ޓްރައިފޯލްޑް" ފޯނަކީ މިހާރު ހުންނަ ފޯނުތަކަށްވުރެ މާ ފުޅާ ޑިސްޕްލޭއެއް ހިމެނޭނެ ފޯނެއްކަމަށް ބެލެވެއެވެ.
އެމެރިކާގެ ޕޭޓަންޓް އެންޑް ޓްރޭޑްމާކް އޮފީސް (ޔޫއެސްޕީޓީއޯ) އަށް ސެމްސަންގުން ހުށަހަޅާފައިވާ މި ޕޭޓަންޓުގައިވާ ގޮތުން، މި ޑިވައިސްގައި ހިމެނެނީ ތިން ބަޔަކަށް ބެހިފައިވާ ފަށްޖެހޭ މެކޭނިޒަމެކެވެ.
މިއީ އާންމުކޮށް މިހާރު ފެންނަން ހުންނަ ފަށްޖަހާ ފޯނުތަކާ ޚިލާފަށް، ސްކްރީންގެ ބޮޑުމިނުގެ ފައިދާ އެންމެ ފުރިހަމައަށް ނެގޭނެ ގޮތަކަށް ފަރުމާކޮށްފައިވާ ޑިޒައިނެކެވެ.
މި ފޯނު ފަށްކޮށްލާފައި އޮންނައިރު މެދުގައިވާ ބައި ހުންނާނީ އަނެއް ދެބައިގެ ދޭތެރޭގައި ފޮރުވިފައެވެ. އަދި އެއް ބައިގެ ސްކްރީން ބޭރަށް ފެންނަން ހުންނާނެތީ، ފޯނު ފަށްކޮށްފައި އޮންނަ ވަގުތުތަކުގައި އެބައި ކަވާ ސްކްރީންގެ ގޮތުގައި ބޭނުންކުރެވޭނެއެވެ.
މީގެ އިތުރުން، މި ފޯނު "ޓެންޓެއް" ގެ ސިފައިގައި ބަހައްޓައިގެން އަތްނުލައި ބޭނުންކުރެވޭނެ ގޮތްތަކާއި، ފަހަތުގައިވާ ތިން ކެމެރާގެ ސިސްޓަމްވެސް ޕޭޓަންޓުގެ ކުރެހުންތަކުން ފެންނަން އެބަހުއްޓެވެ.
ތިން ފަހަރަށް ފަށްޖެހޭ ފޯނަކަށް ވުމާއެކު، ސްކްރީނަށް ލިބިދާނެ ގެއްލުމަކުން ސަލާމަތްކުރުމަށްޓަކައި ޚާއްޞަ ރައްކާތެރިކަމުގެ ފިޔަވަޅުތަކެއް މި ޑިޒައިނުގައި ވަނީ ހިމަނާފައެވެ. އޭގެ ތެރޭގައި ސްކްރީނުގެ އަރިމަތިތައް ހިމާޔަތްކޮށްދޭ ބައިތަކާއި، ގިނަގިނައިން ފޯނު ފަށްކުރުމުގެ ސަބަބުން ސްކްރީނަށް ކުރާ ބާރު ކުޑަކޮށްދޭނެ ބަފަރުތައް ހިމެނެއެވެ.
މި އާ ހޯދުމާއެކު، ސެމްސަންގުން "ގެލެކްސީ ޒީ ފޯލްޑް 8 ވައިޑް"ގެ ނަމުގައި އާ ފޯނެއް އުފައްދަމުންދާ ކަމުގެ ވާހަކަތައް ދަނީ ފެތުރެމުންނެވެ. ނަމަވެސް، ކުންފުނިތަކުން ރަޖިސްޓްރީކުރާ ހުރިހާ ޕޭޓަންޓްތަކަކީ އޭގެ އަސްލު ސިފައިގައި ބާޒާރަށް ނެރޭ އުފެއްދުންތަކަށް ނުވެދާނެތީ، މި ފުޅާ ފޯނު އާންމުންނާ ހަމައަށް އަންނާނެ ދުވަހެއް އަދި ކަށަވަރެއް ނުވެއެވެ.