01 Apr 2026, 21:57
މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ ރައީސް އަދި ދ. މީދޫ ދާއިރާގެ މެންބަރު އަޙްމަދު ސިޔާމް މުޙައްމަދަށް މަރުހަބާ ދަންނަވަން ނުކުތް، އިސްލާމިކް މިނިސްޓްރީގެ ޑެޕިއުޓީ މިނިސްޓަރު އިބްރާހިމް އާސިމް މިއަދު މަގާމުން ވަކިކޮށްފިއެވެ.
'ސަން' އަށް އެނގިފައިވާ ގޮތުގައި އޭނާ މަގާމުން ވަކިކޮށްފައި ވަނީ ކުރިއަށް އޮތް ލޯކަލް ކައުންސިލް އިންތިޚާބަށް ކުރިއަށްދާ އެމްޑީއޭގެ ކެމްޕެއިން ހަރަކާތެއްގައި ސިޔާމް، ދ. އަތޮޅަށް މިވަގުތު ކުރައްވާ ދަތުރުފުޅުގައި އެމަނިކުފާނަށް މަރުހަބާ ދަންނަވަން ނުކުމެ ހުއްޓައެވެ.
އާސިމަކީ މިހާރު ވެސް އެމްޑީއޭގެ މެންބަރެކެވެ. އަދި އޭނާއަކީ އެމްޑީއޭގެ ސްލޮޓެއްގައި ޑެޕިއުޓީ މިނިސްޓަރު ކަމަށް އައްޔަނުކުރެއްވި ބޭފުޅެއް ވެސްމެއެވެ.
އޭނާ އެ މަގާމަށް އައްޔަނުކުރީ 16 ޑިސެމްބަރު 2023ގައެވެ. އަދި މިއަދު އޭނާ ވަނީ މަގާމުން ވަކިކޮށްފައެވެ.
އިސްލާމިކް މިނިސްޓްރީގައި ދެ އަހަރާއި ދުވަސްކޮޅަކަށް މަސައްކަތްކުރިއިރު އާސިމަކީ އެންމެ އިތުބާރު ހިފޭ، އަދި ހީވާގި މަސައްކަތްތަކެއް މިނިސްޓްރީގައި ކުރި ބޭފުޅެއް ކަމަށް އެ މިނިސްޓްރީގެ ބައެއް ވެރިން ވަނީ ފާހަގަކުރައްވައިފައެވެ.