27 Mar 2026, 11:37
އީރާނުގެ ހަކަތަ އުފައްދާ ވަސީލަތްތަކަށް ދޭން ނިންމާފައިވާ ހަމަލާތައް، އޭޕްރީލް 6 ގެ ނިޔަލަށް އިތުރު 10 ދުވަހަށް ފަސްކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ.
- ޓްރަމްޕް މިހެން ވިދާޅުވީ އީރާނާއެކު ކުރިއަށްދާ ސުލްހައިގެ ވާހަކަތައް "ވަރަށް ރަނގަޅަށް" ކުރިއަށްދާ ކަމަށް އޭނާ ވިދާޅުވަމުންދާ ދަނޑިވަޅެއްގައި.
- ނަން ހާމަނުކުރާ އީރާނުގެ އިސް ލީޑަރަކު ރޮއިޓާސް ނިއުސް އެޖެންސީއަށް މައުލޫމާތު ދެއްވި ގޮތުގައި، އެމެރިކާއިން ވަނީ ސުލްހައިގެ ހުށަހެޅުމެއް ތެހެރާނަށް ފޮނުވާފައި. ނަމަވެސް އެ އޮފިޝަލް އެ ހުށަހެޅުން ސިފަކުރެއްވީ "އެއްފަރާތަކަށް ބުރަވެފައިވާ އަދި ބޭއިންސާފު" ހުށަހެޅުމެއްގެ ގޮތުގައި.
- ހަނގުރާމަ ހުއްޓުވުމަށް މަސައްކަތް ކުރާ މެދުވެރިއެއްގެ ހައިސިއްޔަތުން، އެމެރިކާ އާއި އީރާނުގެ އޮފިޝަލުންގެ މެދުގައި ޕާކިސްތާނުން މެސެޖުތައް ބަދަލުކުރަމުންދާ ކަމަށް އެ ގައުމުގެ ޚާރިޖީ ވަޒީރު އިސްހާގް ދާރު ކަށަވަރުކޮށްދެއްވައިފި. މި މަސައްކަތުގައި ތުރުކީ އާއި މިސްރުން ވެސް ދަނީ އެހީތެރިކަން ފޯރުކޮށްދެމުން.
- އެމެރިކާ އާއި އިސްރާއީލުން އީރާނަށް ދެމުންގެންދާ ހަމަލާތަކުގައި މިހާތަނަށް މަދުވެގެން 1,937 މީހުން މަރުވެފައިވާ ކަމަށް އެ ގައުމުގެ ހެލްތު މިނިސްޓަރުގެ ނައިބު އަލީ ޖަފަރިއާން އަލްޖަޒީރާއަށް ވިދާޅުވެއްޖެ.
- އިސްރާއީލުގެ ބޯޑަރާ ގާތްގަނޑަކަށް 50 ކިލޯމީޓަރު (31 މޭލު) ދުރުގައި އޮންނަ ޒަހްރާނީ ކޯރުގެ ދެކުނުގައި ދިރިއުޅޭ ލުބުނާނުގެ ހުރިހާ ރައްޔިތުން ގެދޮރު ދޫކޮށް ދިއުމަށް އިސްރާއީލުން ވަނީ އަމުރުކޮށްފައި. މި މަހުގެ ދެ ވަނަ ދުވަހުން ފެށިގެން އިސްރާއީލުން ދެމުންދާ ހަމަލާތަކުގައި 1,100 އަށްވުރެ ގިނަ މީހުން މަރުވެފައިވާ ކަމަށް ލުބުނާނުގެ ހެލްތު މިނިސްޓްރީން ރިޕޯޓްކުރޭ.