11 Mar 2026, 11:12
އެމެރިކާގެ އަސްކަރިއްޔާއިން ހޮރްމުޒް ކަނޑުއޮޅީގައި ހަރަކާތްތެރިވަމުން ދިޔަ އީރާނުގެ މައިން އަޅާ 16 އުޅަނދެއް, ގޮއްވާލައި ހަލާކުކޮށްލައިފިއެވެ.
މިއަދު ހިނގި މި ހާދިސާއާއެކު، އީރާނުން ވަނީ އެ ސަރަހައްދުން ތެޔޮ އެކްސްޕޯޓު ކުރުން ހުއްޓުވާނެ ކަމުގެ އިންޒާރު ދީފައެވެ. އީރާނުން ބުނެފައިވަނީ ދުޝްމަނުންނަށް "އެންމެ ލީޓަރެއްގެ ތެޔޮ" ވެސް ފޯރުކޮށްދިނުމަށް ފުރުސަތު ނުދޭނެ ކަމަށެވެ.
ދުނިޔޭގެ ތެލުގެ 20 އިންސައްތަ އުފުލާ މުހިންމު ކަނޑުއޮޅިއާ މެދު ކަންބޮޑުވުންތައް އިތުރުވަމުންދާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ ސޯޝަލް މީޑިއާގައި މިކަމާ ގުޅޭގޮތުން ވާހަކަފުޅުދައްކަވާފައެވެ.
ޓްރަމްޕް ވިދާޅުވީ ހޯމްޒް ކަނޑުއޮޅީގައި އީރާނުން ގޮވާތަކެތި ހަރުކޮށްފައިވާ ކަމުގެ އެއްވެސް ރިޕޯޓެއް އަދި ލިބިފައިނުވާ ކަމަށެވެ. ނަމަވެސް، އެފަދަ ކަމެއް ކޮށްފިނަމަ އީރާނަށް ކުރިން ނުދެކޭ ފަދަ ވަރުގަދަ އަސްކަރީ ރައްދެއް ދެއްވާނެ ކަމުގެ އިންޒާރު އެމެރިކާގެ ރައީސް ދެއްވިއެވެ.
އެމެރިކާގެ ސެންޓްރަލް ކޮމާންޑުން ވަނީ އީރާނުގެ އުޅަނދުތަކަށް ހަމަލާދޭ މަންޒަރު ފެންނަ ވީޑިއޯއެއް ވެސް އާންމުކޮށްފައެވެ.
އެމެރިކާއާއި އިޒްރޭލުން އީރާނާ ދެކޮޅަށް ފަށާފައިވާ ހަނގުރާމައަށް 11 ދުވަސް ވެފައިވާއިރު، މި ހަމަނުޖެހުންތަކުގެ އަސަރު މުޅި މެދުއިރުމައްޗަށް ދަނީ ފޯރަމުންނެވެ. އީރާނުގެ ލީޑަރުން ވަނީ މަޝްވަރާކުރުމަށް ދެކޮޅުހައްދަވައި، ޓްރަމްޕަށް އިންޒާރު ދެއްވާފައެވެ. މީގެ އިތުރުން، އިޒްރޭލަށާއި ގަލްފުގެ ޢަރަބި ގައުމުތަކަށް އަމާޒުކޮށް އީރާނުން ދަނީ އާ ހަމަލާތަކެއް ދެމުންނެވެ.
އެމެރިކާގެ ދިފާޢީ ވަޒީރު ޕީޓް ހެގްސެތު ވެސް ވަނީ އީރާނަށް އަމާޒުކޮށް މިހާތަނަށް ނުދޭހާ ވަރުގަދަ ހަމަލާތަކެއް ދޭނެ ކަމަށް ވިދާޅުވެފައެވެ.
މި ހަމަނުޖެހުންތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އަންނަމުންދާ ކަމަށް ރިޕޯޓުތައް ބުނެއެވެ. އީރާނާ އިންވެގެން އޮންނަ ހޮރްމުޒް ކަނޑުއޮޅިއަކީ ދުނިޔޭގެ އިގުތިސާދަށް ނުހަނު މުހިންމު މަގަކަށް ވާއިރު، މި މަގު ބަންދުވެއްޖެނަމަ ދުނިޔޭގެ ބާޒާރަށް އޭގެ ނޭދެވޭ އަސަރު ފޯރާނެ ކަމުގެ ބިރު ވަނީ ބޮޑުވެފައެވެ.