10 Mar 2026, 13:26
އުރީދޫން އެއް އަހަރު ދުވަހުގެ މުއްދަތަކަށް ކުރިއަށްދާ 'ހިނގާ' އޭޓީވީ ޕްރޮމޯޝަންގެ ފުރަތަމަ ނަސީބުވެރިޔަކަށް ނ. ހޮޅުދޫ، ހަސަން ނިޝާން ހޮވިއްޖެއެވެ.
މި އަހަރުގެ ނިޔަލަށް މި ޕްރޮމޯޝަންގެ ދަށުން ޖުމްލަ ހަ އޭޓީވީ ދޭނެ ކަމަށް އުރީދޫއިން ވަނީ ބުނެފައެވެ.
މިގޮތުން، ކޮންމެ ދެ މަހަކުން އެއްފަހަރު ބާއްވާ ގުރުއަތުގައި އޭޓީވީއެއް ލިބޭނެ ކަމަށް އުރީދޫއިން ވަނީ ބުނެފައެވެ.
އުރީދޫއިން ބުނި ގޮތުގައި، މިއީ ކަސްޓަމަރުން ދުވަހުން ދުވަހަށް ބޭނުންކުރާ ޚިދުމަތްތަކުގެ އަގުވަޒަންކުރުމުގެ ގޮތުން ކުރިއަށްދާ ކެމްޕޭނެކެވެ. މި ގުރުއަތުގައި ބައިވެރިވުމަށް އުރީދޫގެ މޮބައިލް (ޕްރިޕެއިޑް ނުވަތަ ޕޯސްޓްޕެއިޑް)، ސުޕަނެޓް، ފަސޭހަ، ނުވަތަ 5ޖީ އެއާ ފައިބާ ފަދަ ޚިދުމަތެއް ބޭނުންކޮށް، ކަނޑައެޅިފައިވާ ޝަރުތުތައް ފުރިހަމަ ކުރަންޖެހޭނެ ކަމަށް އުރީދޫއިން ބުނެއެވެ.
މިގޮތުން، ގުރުއަތުލުމުގެ ކުރިން އަންނަ 60 ދުވަހުގެ ތެރޭގައި، އުރީދޫގެ ޚިދުމަތްތަކަށް މަހަކު މަދުވެގެން 400 ރުފިޔާ ޚަރަދުކޮށްފައިވާ ކަސްޓަމަރުންނަށް ޕްރޮމޯޝަންގައި ބައިވެރިވެވޭނެއެވެ. އަދި، ގުރުއަތުލާ ދުވަހާ ހަމައަށް އެ ކަސްޓަމަރެއްގެ ޚިދުމަތް އެކްޓިވްކޮށް ބަހައްޓަންވާނެ ކަމަށް އުރީދޫއިން ފާހަގަކުރިއެވެ.
މި ޕްރޮމޯޝަން ފަރުމާކޮށްފައި ވަނީ، އުރީދޫ ބޭނުންކޮށް، އަލަށް އެ ޚިދުމަތް ބޭނުންކުރާ ކަސްޓަމަރުންނަށް ވެސް ބައިވެރިވެވޭނެ ގޮތަށް ކަމަށް އެ ކުންފުނިން ވަނީ ބުނެފައެވެ. އަދި، ކޮންމެ ގުރުއަތެއްގައި ނަސީބުވެރިއަކު ހޮވައި، އޭޓީވީއެއް ހަވާލުކުރަން އުރީދޫއިން ވަނީ ނިންމާފައެވެ.
މިފަދަ ހަރަކާތްތަކުގެ ތެރެއިން، އުރީދޫ މޯލްޑިވްސްއިން ދަނީ ކަސްޓަމަރުންގެ ފަރާތުން ލިބޭ އިތުބާރާއި ލޯތްބަށް ޝުކުރު އަދާކޮށްފައެވެ.