07 Mar 2026, 14:11
އިނގިރޭސި އެފްއޭ ކަޕުގެ ފަސްވަނަ ބުރުގައި ރޭ ވުލްވްސް ބަލިކޮށް މުބާރާތުގެ ކުއާޓާފައިނަލަށް ލިވަޕޫލް ދަތުރުކޮށްފިއެވެ.
ވުލްވްސްގެ މޮލިނެކްސް ސްޓޭޑިއަމްގައި ކުޅުނު މި މެޗު ލިވަޕޫލުން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
މެޗުގައި މޮޅު ކުޅުމެއް ދައްކާފައިވަނީ ލިވަޕޫލުންނެވެ. އެގޮތުން ގިނަ ފުރުސަތުތަކެއް ތަނަވަސްކޮށް ހަމަލާތަކެއްވެސް އުފެއްދިއެވެ.
ފުރަތަމަ ހާފުގައި ދެޓީމުންކުރެ ޓީމެއްގެ ފަރާތުން ލަނޑެއް ނުފެނުނު ނަމަވެސް ދެވަނަ ހާފު ހަވަނަ މިނެޓުގައި އެންޑީ ރޮބަޓްސަން ވަނީ ލިވަޕޫލަށް ލީޑު ނަގައިދީފައެވެ.
މި ލަނޑު ޖެހިތާ ދެ މިނެޓުފަހުން މުހައްމަދު ސަލާހް ވަނީ ދެވަނަ ލަނޑު ޖަހާފައެވެ. މިއީ އެންޑީ ރޮބަޓްސަން ދިން ޕާހަކުން މުހައްމަދު ސަލާހް ކާމިޔާބުކުރި ލަނޑެކެވެ. އަދި ތިންވަނަ ލަނޑަކީ މެޗުގެ 74 ވަނަ މިނިޓުގައި ކާރޓިސް ޖޯންސް ކާމިޔާބުކޮށްދިން ލަނޑެކެވެ.
މެޗުގައި ވުލްވްސްގެ ހަމައެކަނި ލަނޑު ފެނުނީ މެޗުގެ ފުރިހަމަ ވަގުތު ހަމަވެގެން ރެފްރީ ދެއްކި އިތުރުވަގުތުގެ ތެރޭގައެވެ. މިއީ އި ހްވެން ހީ ޗެންގް ކާމިޔާބުކޮށްދިން ލަނޑެވެ.
މި ސީޒަނުގައި ލިވަޕޫލަށް މާ އެދެވޭ ނަތީޖާތަކެއް ނުނެރެވެއެވެ. އަދި ފެނިގެންދަނީ އެހެން ސީޒަންތަކަށްވުރެ ދަށް ކުޅުމެކެވެ.
ދެން ލިވަޕޫލން މެޗެއް ކުޅޭނީ އަންނަ އަަންގާރަދުވަހުއެވެ. އެއި ޗެމްޕިއަނސް ލީގުގެ ދެވަނަ ބުރުގައި ތުރުކީގެ ގަލަތަސަރާއި އާއި ދެކޮޅަށެވެ.