07 Mar 2026, 17:04
ތެހެރާން (7 މާޗް 2026): އެމެރިކާގައި ވެރިކަން ކުރަނީ ޖިންސީ ކުށް ސާބިތުވި ޔަހޫދީ ބިލިޔަނަރު ޖެފްރީ އެޕްސްޓިންގެ ގޭންގުން ކަމަށާއި އެ ގޭންގުގެ ލީޑަރު ކަމަށްވާ އެމެރިކާގެ ރައީސް ޑޮނަލްޑް ޓްރަމްޕްއަށް އީރާނުގެ ވެރިއަކު ކަނޑައެޅުމުގެ ފުރުސަތު ނުދޭނެކަމަށް އީރާނުގެ ޕާލަމެންޓްގެ ރައީސް މުހައްމަދު ބާގިރު ގަލީބާވް ވިދާޅުވެއްޖެއެވެ.
ތެހެރާންގައި ދެއްވި ބަޔާނެއްގައި ބާގިރު ވިދާޅުވީ އީރާނަށް ބޮންއަޅައި އުދުވާން ހިންގައިގެން ގެއްލުން ދެވިދާނެކަމަށާއި ވެރިން ވެސް ޝަހީދުކޮށްލެވިދާނެ ކަމުގައެވެ. ނަމަވެސް އީރާނުގެ ވެރިން އިންތިޚާބު ކުރާނީ އީރާނުގެ ރައްޔިތުންނާއި ރައްޔިތުން އިންތިޚާބު ކޮށްފައިވާ މުއައްސަސާތަކުން ކަމަށާއި ޕްސްޓިންގެ ގޭންގް ލީޑަރު ޓްރަމްޕަށް އެ ފުރުސަތު ނުލިބޭނެ ކަމަށް ބާގިރު ވިދާޅުވިއެވެ.
ކުރީގެ އަސްކަރީ ޕައިލެޓެއްކަމަށްވާ ބާގިރު ވިދާޅުވި ގޮތުގައި އެމެރިކާއާއި ޔަހޫދީ އިސްރާއީލުގެ އުދުވާންގެ ސަބަބުން ކޮންމެ ދުވަހަކު އީރާނުގެ އާންމުންނާއި ސިފައިން ދަނީ ޝަހީދުވަމުންނެވެ. އަދި އަދަދު ކުރަން ދަތިވާ ވަރުގެ ބޮޑެތި މާއްދީ ގެއްލުންތައް އީރާނަށް ދަނީ ލިބެމުންނެވެ.
އެމެރިކާއާއި ޔަހޫދީ އިސްރާއީލުން ހަމަލާ ދޭ ތަންތަނުގެ ތެރޭގައި އީރާނުގެ އަސްކަރީ މަރުކަޒުތަކުގެ އިތުރުން ސްކޫލްތަކާއި ޔުނިވާސިޓީތަކާއި އާންމުންގެ ގެދޮރާއި މިސްކިތް ފަދަ ތަންތަން ހިމެނޭކަމަށް އޭނާ ވިދާޅުވިއެވެ.
ނަމަވެސް މި ތަންތަނަށް ހަމަލާދީ އީރާނުގެ ސިފައިންނާއި އާންމުން ޝަހީދުކޮށްގެން އީރާން އަމާން ދޭނެކަމަށް ޓްރަމްޕާއި ނަތަންޔާހޫއަށް ހީވާނަމަ އެއީ އެ ދެ މުޖްރިމުން ދެކޭ ހުވަފެނެއްކަމަށް ބާގިރު ވިދާޅުވިއެވެ.
ރިޕޯޓްތައް ބުނާގޮތުން އެމެރިކާއާއި އިސްރާއީލުގެ ހަމަލާތަކުގައި އީރާނުގެ ދޮޅު ހާހަށްވުރެގިނަ އާންމުން ވަނީ ޝަހީދުކޮށްލާފައެވެ. މީގެތެރޭގައި އަންހެނުންނާއި ކުޑަކުދިންވެސް ހިމެނެއެވެ.
އީރާނުގެ ޕާލަމެންޓްގެ ރައީސް މުހައްމަދު ބާގިރު ގަލީބާވް
އެމެރިކާއާއި އިސްރާއީލު އެންމެ ފުރަތަމަ ޙަމަލާ ދިން ތަންތަނުގެ ތެރޭގައި އީރާނުގެ ދެކުނުގެ މީނާބް ސަރަހައްދުގެ އަންހެން ކުދިންގެ ސްކޫލެއް ހިމެނެއެވެ. އެމެރިކާއާއި ޔަހޫދީން މި ސްކޫލަށް ހަމަލާދިނީ ގަސްދުގައިކަން ތަހުގީގްތަކުންވަނީ ހާމަވެފައެވެ. އިސްރާއީލުގެ ބޮޑުވަޒީރަކީ ޣައްޒާގެ ގަތުލުއާންމުގެ މައްސަލައިގައި ބައިނަލްއަގްވާމީ ކޯޓުން ހައްޔަރު ކުރުމުގެ އަމުރު ނެރެފައި ވަނިކޮށް ފިލައިގެން އުޅޭ މީހެކެވެ.
ޖެފްރީ އެޕްސްޓިންގެ ފައިލްތަކުގައި ތަކުރާރުކޮށް ޓްރަމްޕްގެ ނަން އޮތްއިރު، ކުޑަކުދިންނަށް ޖިންސީ ގޯނާކުރުމުގެ ތުހުމަތުތައް ޓްރަމްޕަށް ކޮށްފައިވެއެވެ.
އެމެރިކާގެ ވެރިކަމާ ޓްރަމްޕް ހަވާލުވީވެސް އެމެރިކާގެ ކޯޓުތަކުގައި ޓްރަމްޕްގެ މައްޗަށް ސާބިތުވެފައިވާ މަކަރު ހެދުމާއި އޮޅުވާލުމާއި ރިޝްވަތު ދިނުމުގެ 34 މައްސަލަ އޮއްވައެވެ.
ޓްރަމްޕް ވަނީ އީރާނުގެ ވެރިއަކަށް އިންތިޚާބު ކުރަންޖެހޭނީ އޭނާއަށް ކަމުދާ ބޭފުޅެއްކަމަށް ވިދާޅުވެ އެތައް ފަހަރަކު ވާހަކަ ދައްކަވާފައެވެ. އަދި އީރާނުގައި ހުންނަންޖެހޭނީ އޭނާގެ ރުހުން ލިބިފައިވާ ވެރިއެއްކަމަށްވެސް ޓްރަމްޕް ވަނީ ވިދާޅުވެފައެވެ.
ދާދިފަހުން އިރާގުގައި ބޭއްވި އާންމު އިންތިޚާބު ކާމިޔާބުކުރި އިރާގުގެ ޕާޓީ ކަމަށްވާ "ސްޓޭޓް އޮފް ލޯ ކޯލިޝަން" ގެ ލީޑަރު ނޫރީ އަލްމާލިކީ އެ ގައުމުގެ ބޮޑުވަޒީރުކަމަށް އައްޔަން ނުކުރުމަށް އެމެރިކާއިން ވަނީ އިރާގަށް އިންޒާރު ދީފައެވެ. މާލިކީ އިރާގުގެ ބޮޑުވަޒީރުކަމަށް އައްޔަން ކޮށްފިނަމަ އިރާގަށް ބައެއްކަންކަމުގައި ދަތިކުރާނެކަމުގެ އިންޒާރު އެމެރިކާގެ ޚާރިޖީ ވުޒާރާއިން ވަނީ ދީފައެވެ.
އެމެރިކާ ޑިމޮކްރަސީގެ ނަމުގައި ޕްރޮޕަގެންޑާ ކުރާއިރު އެމެރިކާގެ ވެރިން ޕްރެޝަރު ކުރަމުން ގެންދަނީ ގަލްފުގެ އަރަބި ގައުމުތަކުގައި އެމެރިކާ ކޮންޓްރޯލްކުރާ ޝާހީ އާއިލާތަކުގެ މީހުން ވެރިކަމުގައި ބައިތިއްބާ ގޮތަށް، ޑިމޮކްރަސީ އޮންނަ ގައުމުތަކުގައިވެސް އެމެރިކާ ބޭނުންވާ ވެރިން ވެރިކަމަށް އައްޔަން ކުރުމަށެވެ.
ޑިމޮކްރަސީ އޮންނަ ގައުމުތަކުގައިވެސް އެމެރިކާ ބޭނުންނުވާ ވެރިއަކު އިންތިޚާބުކޮށްފިނަމަ އެއީ ޑިމޮކްރަސީ ކަމަށް އެމެރިކާ ގަބޫލެއް ނުކުރާކަން އެމެރިކާގެ ވެރިންގެ ބަހާއި އަމަލުތަކުން ދަނީ ސާފުވަމުންނެވެ.
ދުނިޔޭގައި ޑިމޮކްރެޓިކް ވެރިކަން ވައްޓާލައި އަސްކަރީ އިންގިލާބު ގެނަސްގެން އަސްކަރީ ޑިކްޓޭޓަރުން ވެރިކަމުގައި ބޭތިއްބުމުގެ ރޭވުންތައް އެންމެ ބޮޑަށް ރާވާކަމަށް ތުހުމަތު ކުރެވެނީ އެމެރިކާގެ ޖާސޫސީ މަރުކަޒީ އިދާރާ ސީއައިއޭގެ މައްޗަށެވެ.
މިސްރުގެ އަބްދުލްފައްތާހް އައްސީސީ އާއި ޕާކިސްތާނުގެ ޕަރުވޭޒް މުޝައްރަފް އަދި ޗިލީގެ އޮގަސްޓޯ ޕިނޮޝޭ ފަދަ މިލިޓަރީ ޑިކްޓޭޓަރުން އެގައުމުތަކުގެ ޑިމޮކްރެޓިކް ވެރިކަމުގެ ނިޒާމުތައް ވައްޓާލައި ގެނަސްފައިވާ އިންގިލާބުތަކުގެ ފަހަތުގައިވަނީ އެމެރިކާކަމަށް ކަމާބެހޭ ރިޕޯޓްތައް ބުނެއެވެ.