06 Mar 2026, 00:14
އައްޑޫ ސިޓީގައި 15 އަހަރުވަންދެން ވެރިކަން ކުރަމުންދާ މޭޔަރު ނިޒާރަކީ ނާގާބިލް ވެރިޔެއްކަން އެނގިގެންދަނީ މިހާތަނަށް އައްޑޫ ސިޓީ ތަރައްޤީ ކުރެވިފައި ނެތުމުންކަމަށް ފޭދޫ ދެކުނު ދާއިރާގެ މެންބަރު އިބްރާހިމް ދީދީ(އައިބީ) މިރޭ ވިދާޅުވެއްޖެއެވެ.
އައްޑޫ ސިޓީ މާލޭ ޕީއެންސީ ޖަގަހަ ހުޅުވުމަށް މިރޭ ބޭއްވި ރަސްމިއްޔާތުގައި އައިބީ ވިދާޅުވީ، ލާމަރުކަޒީ ނިޒާމު އައުމާއެކުހެން އައްޑޫގެ މޭޔަރުކަމުގައި ނިޒާރު ހުންނެވި ކަމަށެވެ. އަދި ޚާއްސަކޮން މިދިޔަ އެމްޑީޕީގެ ވެރިކަމުގައި އެމްޑީޕީގެ މޭޔަރެއްގެ ގޮތުގައި ހުރެ، އައްޑޫ ސިޓީއަށް ތަރައްގީ ގެނެވިފައި ނުވާކަން އޭނާ ފާހަގަކުރެއްވިއެވެ.
މާލެ ފިޔަވާ އެންމެ ފުރަތަމަ ސިޓީއެއްގެ ދަރަޖަ ލިބުނީ އައްޑޫއަށް. އޭގެ ފަހުން ސިޓީ އެއްގެ ދަރަޖަ ލިބުނު ތަންތަން ވެސް އައްޑޫއަށް ވުރެ ހުރިހާގޮތަކުން ތަރައްގީގައި އުޅެނީ 100 ގުނަ ކުރީގައި. އެއީ ކީއްވެގެންތޯ؟
މި ސަރުކާރުން އައްޑޫ ސިޓީއަށް އެކަށީގެން ވާ ތަރައްޤީ ގެންނަން މަސައްކަތް ނުކުރާ ވާހަކަ މޭޔަރު ނިޒާރު ދައްކަން ލަދުގަންނަން ޖެހޭނެކަން ފާހަގަކުރައްވައި އައިބީ ވިދާޅުވީ މި ސަރުކާރު އައި އިރު އައްޑޫސިޓީގައި ކަރަންޓާއި ފެން އެކަށީގެންވާ ގޮތެއްގައި ނެތް ކަމަށެވެ. އަދި މަގުތައް ވެސް އޮތީ ސުންނާފަތިވެފައިކަމަށާއި، ހެދި މަގެއްވެސް ހަދާފައި އޮތީ މަގު ބޭނުންކުރާ މީހުންނަށް ތުރާލަކަށް ވާ ގޮތަކަށް ކަމަށެވެ.
އައިބީ އިތުރަށް ވިދާޅުވީ ސަރުކާރު ވުޒާރާއެއްގައި ވެސް ނޫޅޭ މިންވަރަށް އައްޑޫސިޓީ ކައުންސިލްގައި މުވައްޒަފުން ތިބޭ ކަމަށާއި، ތަރައްގީގެ މަޝްރޫއުތައް ހިންގުމަށް ބެނުންވާ އޮފީސްތައް ހަމަޖެހިފައި އޮތް އިރު، މޭޔަރު ނިޒާރު ކުރެއްވި ހާވެސް ކަމަކީ ތަޖުރިބާ ހޯދުމަށް ރާއްޖޭން ބޭރަށް ދަތުރު ކުރެއްވުން ކަމަށެވެ. ނަމަވެސް އެ ހޯއްދެވި ތަޖުރިބާއިން އައްޑޫ ސިޓީއަށްވީ ކަމެއް ފެންނަން ނެތްކަމަށް ވެސް އޭނާ ވިދާޅުވިއެވެ.
ކަންކަން އެހެން ހުރުމުން މި ސަރުކާރުން އައްޑޫ ސިޓީއަށް ވެފައިވާ ވައުދުތައް ފުއްދާ ގްރޭޓާ އައްޑޫއަށް ހެދުމަށް މޭޔަރުގެ ގޮނޑި އާއި ކައުންސިލް މެންބަރުންނާއި ޑަބްލިއުޑީސީގެ ގޮނޑިތައް ޕީއެންސީއަށް ދިނުމަށް، އައްޑޫގެ ރައްޔިތުންގެ ކިބައިން އެދޭކަމަށް އައިބީ ވިދާޅުވިއެވެ.