05 Mar 2026, 22:20
ލ. ފޮނަދޫ ލިންކުރޯޑުގައި ކާރެއް ކޮންޓްރޯލްނުވެ، މަގުބައްތިއެއްގައި ޖެހިގެން މިއަދު އެކްސިޑެންޓެއް ހިނގައި، ދެ މީހުންނަށް އަނިޔާވެއްޖެއެވެ.
ފުލުހުން 'ސަން'އާ ހިއްސާކުރި މެސެޖެއްގައި ވަނީ، ބްރެޒިލް އަވަށު ލިންކު ރޯޑުން ލ. ކައްދުއިން ފޮނަދޫއަށް ދަތުރުކުރި ކާރެއް ކޮންޓްރޯލްނުވެ އެކްސިޑެންޓުވި މައްސަލައެއް މިއަދު 14:35 ހާއިރު ރިޕޯޓުކޮށްފައިވާ ކަމަށެވެ.
ފުލުހުން ބުނި ގޮތުގައި، އެކްސިޑެންޓުވީ ކާރު ކޮންޓްރޯލްނުވެ މަގުގެ ޑިވައިޑަރަށް އަރައި، މަގު ބައްތިއެއްގައި ޖެހިގެނެވެ.
މި އެކްސިޑެންޓުގައި ކާރުގައި ތިބި ދެމީހުންނަށް އެކި ވަރުގެ އަނިޔާތައް ލިބިފައިވާއިރު، އެ މީހުންނަށް އަންނަނީ ހޮސްޕިޓަލުގައި ފަރުވާ ދެމުންނެވެ.
ފޮނަދޫ ލިންކު ރޯޑުގައި ހިނގި އެކްސިޑެންޓުގައި ކާރު މަގުގެ ޑިވައިޑާއަށް އަރާފައި --- ފޮޓޯ/ ލާމު އެމްވީ
އޭގެއިތުރުން، މި ކާރު ދުއްވާފައި ވަނީ، އެ ކެޓެގަރީގެ އުޅަނދު ދުއްވުމުގެ ލައިސަންސް އޮންނަ މީހެއް ކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
މި ހާދިސާއާ ގުޅިގެން ދައުރުވާ ފޮޓޯތަކުން ފެންނަ ގޮތުގައި، އެކްސިޑެންޓުވީ ރަތް ކުލައިގެ ކާރަކެވެ. އެ ކާރުގެ ކުރީ ބަޔަށް ވަނީ ބޮޑެތި ގެއްލުންތަކެއް ލިބިފައެވެ.
ފޮނަދޫގައި އެކްސިޑެންޓެއް ހިނގިއިރު، މާލެ ސަރަހައްދުގައި އެކްސިޑެންޓުތައް ހިނގާ މިންވަރު މަދެއް ނޫނެވެ. އެގޮތުން، މިދިޔަ ރޯދައިގެ ފުރަތަމަ ހަފުތާއަށްވުރެ، މި އަހަރުގެ އެ މުއްދަތުގައި ހިނގާފައިވާ އެކްސިޑެންޓުތައް އިތުރު ކަމަށް ފުލުހުންގެ ތަފާސްހިސާބުތަކުން ވަނީ ދައްކާފައެވެ.