03 Mar 2026, 23:44
ޕްރޮސިކިއުޓާ ޖެނެރަލް (ޕީޖީ) އޮފީހުން، 2024 ވަނަ އަހަރު މާލީ ކަންކަން ކޮށްފައި ވަނީ ރަނގަޅަށް ކަމަށް، އެ އޮފީހުގެ 2024 ވަނަ އަހަރުގެ އޮޑިޓް ރިޕޯޓުގައި ބުނެފިއެވެ.
އެ އޮފީހުގެ 2024 ވަނަ އަހަރުގެ މާލީ ކަންކަން ކޮށްފައި ވަނީ ރަނގަޅަށް ކަމަށް އެ އަހަރުގެ އޮޑިޓް ރިޕޯޓުގައި ފާހަގަކޮށްފައިވާއިރު، އެ އަހަރުގެ ބޮޑު ބައެއްގައި ޕްރޮސިކިއުޓާ ޖެނެރަލްގެ މަގާމުގައި ހުންނެވީ، ކުރީގެ ޕީޖީ ހުސައިން ޝަމީމްއެވެ. ޝަމީމް ވަނީ އެ އަހަރުގެ އޮގަސްޓް މަހުގެ ފަހުކޮޅު މަގާމުން އިސްތިއުފާ ދެއްވައިފައެވެ.
ދެހާސް ސައުވީސް ވަނަ އަހަރުގެ ޕީޖީ އޮފީހުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައި ވަނީ އެ އަހަރު އެ އޮފީހުން މައިގަނޑު ގޮތެއްގައި ޚަރަދުތައް ކޮށްފައި ވަނީ، އެ އޮފީހަށް ފާސްކޮށްފައިވާ ބަޖެޓުގައި ކަނޑައަޅާފައިވާ ކަންކަމަށް، ކަނޑައަޅާފައިވާ މިންވަރަށް، މާލިއްޔަތު ގާނޫނާ އެއް ގޮތަށް ކަމަށެވެ.
އެ އަހަރަށް ޕީޖީ އޮފީހަށް މަޖިލީހުން ކަނޑައެޅީ 68 މިލިއަން ރުފިޔާގެ ބަޖެޓެކެވެ. އަހަރު ނިމުނުއިރު ބަޖެޓުން ވަނީ 236،421 ރުފިޔާ ބާކީވެފައެވެ.
ކޮމްޕްލަޔަންސް އޮޑިޓަކީ، ވަކި އިދާރާއަކުން ނުވަތަ މުއައްސަސާއަކުން އަމަލުކުރަންޖެހޭ ޤާނޫނުތަކާއި، ގަވާއިދުތަކާއި، އުސޫލުތަކާއި އަދި އިރުޝާދުތަކާ އެއްގޮތަށް އެ ތަނެއްގެ މަސައްކަތްތަކާއި މާލީ މުއާމަލާތްތައް ހިންގަމުންދޭތޯ ބަލައި ދިރާސާކުރުމެވެ.
ދިވެހިރާއްޖޭގެ އޮޑިޓް ޤާނޫނުގެ ދަށުން އޮޑިޓާ ޖެނެރަލް ހިންގަވާ އޮޑިޓްތަކުގެ ތެރޭގައި ކޮމްޕްލަޔަންސް އޮޑިޓް ހިމެނެއެވެ. މީގެ މައިގަނޑު ބޭނުމަކީ ދައުލަތުގެ މުއައްސަސާތަކުން ކަންކަން ކުރަނީ ކަނޑައެޅިފައިވާ އިމުގެ ތެރެއިންތޯ ބެލުމެވެ.
ކޮމްޕްލަޔަންސް އޮޑިޓެއްގައި މައިގަނޑު ގޮތެއްގައި ބަލާނެ ކަންކަމުގެ ތެރޭގައި ދައުލަތުގެ މާލިއްޔަތުގެ ޤާނޫނާއި އެ ޤާނޫނުގެ ދަށުން ހެދިފައިވާ ގަވާއިދުތަކަށް އަމަލުކުރޭތޯ ބެލުމާއި ކަނޑައެޅިފައިވާ ބަޖެޓަށްވުރެ އިތުރަށް ޚަރަދުކޮށްފައިވޭތޯ ނުވަތަ ހުއްދަ ނޫން ގޮތަކަށް ފައިސާ ބޭނުންކޮށްފައިވޭތޯ ބެލުން ހިމެނެއެވެ. މީގެ އިތުރުން މަސައްކަތްތައް ނިންމުމުގައި ނުވަތަ ތަކެތި ގަތުމުގައި ކަނޑައެޅިފައިވާ އުސޫލުތަކާ ޚިލާފުވެފައިވޭތޯ ބެލުމާއި އިދާރީ ހިންގުމުގައި ހުރި ނުރަނގަޅު ކަންކަން ފާހަގަކޮށް، އެކަންކަން އިސްލާހުކުރުމަށް ލަފާދިނުން ހިމެނެއެވެ.
މިފަދަ އޮޑިޓެއްގެ ސަބަބުން މުއައްސަސާތަކުގެ ނަޒާހަތްތެރިކަން އިތުރުވެ، ޒިންމާދާރުކުރުވުމަށް މަގުފަހިވެގެންދެއެވެ. އޮޑިޓް ރިޕޯޓްތަކުގައި ފާހަގަކުރާ ކަންކަމަށް ރިއާޔަތްކޮށް، ޤާނޫނާ ޚިލާފު ކަމެއް ފެނިއްޖެނަމަ އެކަމެއް ތަހުގީގީ އިދާރާތަކަށް ހުށަހެޅުމުގެ ބާރު އޮޑިޓާ ޖެނެރަލަށް ލިބިގެންވެއެވެ.