01 Mar 2026, 10:10
އެމެރިކާއިން ކިއުބާއާ މަޝްވަރާ ކުރަމުންދާ ކަމަށާއި އެކުވެރިކަމާއެކު ކިއުބާ ހިފާފާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ނަމަވެސް އެކަމުގެ ތަފްސީލެއް ނުދެއްވައެވެ.
ޓެކްސަސްއަށް ދަތުރަކަށް ފުރާވަޑައިގަންނަވަމުން ވައިޓް ހައުސްގެ ބޭރުގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ ސެކްރެޓަރީ އޮފް ސްޓޭޓް މާކޯ ރޫބިއޯ ކިއުބާގެ ލީޑަރުންނާ އެކު ވަރަށް މަތީ ފެންވަރެއްގައި މަޝްވަރާ ކުރައްވަމުން ގެންދަވާ ކަމަށެވެ.
"ކިއުބާ ސަރުކާރުން އަޅުގަނޑުމެންނާ ވާހަކަ ދައްކަނީ. އެމީހުންގެ އަތުގައި ފައިސާއެއް ނެތް. މިވަގުތު އެމީހުންގެ އެއްވެސް އެއްޗެއް ނެތް. ފަހަރެއްގައި އަހަރެމެންނަށް އެކުވެރިކަމާއެކު ކިއުބާ ޓޭކްއޯވާ ކުރެވިދާނެ." ޓްރަމްޕް ވިދާޅުވިއެވެ.
އަދި ކިއުބާއަކީ ނާކާމިޔާބު ގައުމެއް ކަމަށާއި އެމީހުން އެމެރިކާގެ އެހީތެރިކަން ބޭނުންވާ ކަމަށްވެސް ޓްރަމްްޕް ވިދާޅުވިއެވެ.
ކިއުބާގެ އެކުވެރި ވެނެޒުއޭލާގެ ރައީސް ނިކޮލަސް މަދޫރޯ މިދިޔަ މަހު ހައްޔަރު ކުރުމަށްފަހު، ކިއުބާ ހިފުމަކީ ޓްރަމްޕް ބޭނުންފުޅުވެފައިވާ ކަމެއް ކަމަށް ރިޕޯޓުތައް ބުނެއެވެ. އިގްތިސާދު ބަލިކަށިވެފައި އޮތުމުން ކިއުބާއަށް އަސްކަރީ ފިޔަވަޅު އަޅަން ޖެހިދާނެ ކަމަށް މަދޫރޯ ހައްޔަރު ކުރުމަށްފަހު ޓްރަމްޕް ވަނީ ވިދާޅުވެފައެވެ.
އެމެރިކާއިން ވަނީ ކިއުބާއަށް ވިޔަފާރީގެ ގޮތުން ހަރުކަށި ދަތިކުރުމުގެ ފިޔަވަޅުތަކެއް 1962 ވަނަ އަހަރުން ފެށިގެން އަޅާފައެވެ.
ކިއުބާއަށް ތެޔޮ ވިއްކައި ނުވަތަ އެ ނޫން ވެސް ގޮތަކުން ތެޔޮ ފޯރުކޮށްދޭ ގައުމުތަކުގެ މުދަލުން ޓެރިފް ނެގުމުގެ އުސޫލެއް ކަނޑައެޅުމަށްވެސް ރަސްމީ އަމުރެއްގައި ޖެނުއަރީ މަހުގެ ފަހުކޮޅު ޓްރަމްޕް ވަނީ ސޮއިކުރައްވާފައެވެ. އެ އަމުރުގައި ކިއުބާ ސަރުކާރަކީ އެމެރިކާގެ ގައުމީ ސަލާމަތަށް އާދަޔާ ޚިލާފަށް އޮތް ނުރައްކަލެއް ކަމަށް ސިފަކޮށްފައިވެއެވެ.
މި ފިޔަވަޅަކީ އެމެރިކާގެ ގައުމީ ސަލާމަތާއި ޚާރިޖީ ސިޔާސަތުގެ މަސްލަހަތު ހިމާޔަތްކުރުމަށް ކުރާ ކަމެއް ކަމަށް ވައިޓް ހައުސްގެ ފެކްޓް ޝީޓެއްގައި ބުނެފައިވެއެވެ.
އެމެރިކާގެ ގައުމީ ސަލާމަތީ ކަންކަމާ ގުޅިގެން ގްރީންލޭންޑް ހިފަން ބޭނުންވާ ކަމަށްވެސް ޓްރަމްޕް ވަނީ ތަކުރާރުކޮށް ވިދާޅުވެފައެވެ.