28 Feb 2026, 11:37
ވިޕުލް ޝާހްގެ ފިލްމު 'ދަ ކެރަލާ ސްޓޯރީ 2: ގޯސް ބިޔޯންޑް' ރިލީޒްކުރުން މަޑުޖައްސާލުމަށް ނެރެފައިވާ ވަގުތީ އަމުރު ކެރަލާ ހައިކޯޓުގެ ޑިވިޝަން ބެންޗަކުން އުވާލައިފިއެވެ.
ގިނަ ދުވަސްތަކެއް ވަންދެން ކުރިއަށްދިޔަ ގާނޫނީ ބަހުސްތަކަށްފަހު، ޕްރޮޑިއުސަރު ވިޕުލް އަމްރުތުލާލް ޝާހްގެ މި ފިލްމަށް މިވަނީ ބޮޑު ކުރިއެރުމެއް ލިބިފައެވެ. މި ފިލްމަކީ މީގެ ކުރިން ބޮޑު ބަހުސެއް އުފެދުނު 'ދަ ކެރަލާ ސްޓޯރީ' ގެ ސީކުއަލްއެކެވެ.
ޖަސްޓިސް އެސް.އޭ. ދަރްމަދިކާރީ އާއި ޕީ.ވީ. ބާލަކްރިޝްނަން ހިމެނިވަޑައިގަންނަވާ ބެންޗުން މި ނިންމުން ނިންމެވީ ފިލްމުގެ ޕްރޮޑިއުސަރު ހުށަހެޅި އިސްތިއުނާފާ ގުޅިގެން، ކުރިން ސިންގަލް ބެންޗުން ނެރުނު އަމުރު ބާތިލު ކުރުމަށްފަހުއެވެ.
ފިލްމު 'ދަ ކެރަލާ ސްޓޯރީ 2: ގޯސް ބިޔޯންޑް'ގެ ޑައިރެކްޓަރު ވިޕުލް ޝާހްގެ--ފޮޓޯ/ބޮލީވުޑްހަންގާމާ
މީގެ ކުރިން ޖަސްޓިސް ބެޗޫ ކޫރިއަން ތޯމަސް ވަނީ ދެ ހަފުތާގެ މުއްދަތަށް ފިލްމު ރިލީޒްކުރުން ފަސްކުރުމަށާއި، ސެންސަރު ބޯޑުން ދީފައިވާ ހުއްދަ އަލުން މުރާޖައާ ކުރުމަށް އަމުރުކޮށްފައެވެ.
ކޯޓުގެ މި ނިންމުމާ ގުޅިގެން ޕްރޮޑިއުސަރު ވިޕުލް ޝާހް ބުނީ، މި ފިލްމަކީ ނުވަތަ އޭނާގެ ޓީމަކީ ކެރަލާ ސްޓޭޓާ ނުވަތަ އެތަނުގެ ރައްޔިތުންނާ ދެކޮޅު ބައެއް ނޫން ކަމަށެވެ.
ކެރަލާއަކީ ވަރަށް ރީތި، ދީންވެރި އަދި އަދަބުވެރި ބަޔަކު އުޅޭ ތަނެއް ކަމަށާއި، ނަމަވެސް އެ ތަނުގައި ހިނގާ ނުރަނގަޅު ކަންކަން ފާހަގަކޮށް، އެ ކަންކަން އިސްލާހުކުރުމަށް މަސައްކަތް ކުރުމަކީ އެ މީހުންގެ މަގުސަދު ކަމަށް ވިޕުލް ވަނީ ބުނެފައެވެ. އަދި ފިލްމު ބަލާލުމުން ކެރަލާއާ ބެހޭ ގޮތުން ނޭދެވޭ އެއްވެސް ވާހަކައެއް ދައްކާފައި ނުވާނެކަން ސާފުވާނެ ކަމަށާއި، މި ފިލްމުގައި ހާމަކޮށްދެނީ ބައެއް ކުށްވެރިންގެ ވާހަކަ ކަމަށްވެސް ޕްރޮޑިއުސަރު ވިޕުލް ޝާހު ވަނީ ބުނެފައެވެ.
ޝާހް އިތުރަށް ފާހަގަކުރި ގޮތުގައި، ކެރަލާގެ އިތުރުން އިންޑިއާގެ މަދްޔަ ޕްރަދޭޝް އާއި ރާޖަސްތާނުގައި ވެސް ކުށްވެރިން އުޅޭ ކަމަށާއި، ފިލްމަށް "ދަ ކެރެލާ ސްޓޯރީ 2، ގޯސް ބިޔޯންޑް"ގެ ނަން ދިނީ ވެސް އެ ސަބަބަށްޓަކައެވެ. ފިލްމުގެ ސައްހަކަން ކޯޓުގެ ނިންމުމުން ވެސް ހާމަވާ ކަމަށް ބުނެ، އޭނާ ވަނީ ކޯޓުގެ ފަނޑިޔާރުންނަށް ޝުކުރު އަދާކޮށްފައެވެ.
ކަމާކްޔާ ނާރަޔަން ސިންގް ޑައިރެކްޓްކޮށްފައިވާ 'ދަ ކެރަލާ ސްޓޯރީ 2: ގޯސް ބިޔޯންޑް' އިންޑިއާގެ ސިނަމާތަކުގައި ރިލީޒްކުރުމަށް މީގެކުރިން ހަމަޖެހިފައިވަނީ 27 ފެބްރުއަރީގައެވެ. ނަމަވެސް ކެރެލާ ހައިކޯޓުގައި އޮތް މައްސަލަ ވަގުތީ އަމުރެއްގެ ދަށުން އުވާލުމާ ގުޅިގެން މި ފިލްމު މިއަދު ވަނީ ސިނަމާތަކުގައި ދައްކަން ފަށާފައެވެ.
ފިލްމީ ތަރިން ކަމަށްވާ އުލްކާ ގުޕްތާ، އައިޝްވާރްޔާ އޯޖްހާ އަދި އަދިތީ ބާޓިއާ ލީޑް ރޯލްތައް ކުޅެފައިވާ މި ފިލްމުގެ ވާހަކަ ވެސް ބިނާކޮށްފައި ވަނީ ވިޕުލް ޝާހް 2023 ވަނަ އަހަރު ހަމަ އެ ނަމުގައި ގެނެސްދިން ފިލްމުގެ ވާހަކައާ ދާދި އެއްކަހަލަ ގޮތަކަށެވެ.
ފުރަތަމަ ފިލްމުގައި ވެސް ދައްކުވައިދީފައި ވަނީ އިންޑިއާގެ ކެރެލާއަށް ނިސްބަތްވާ ހިންދޫ ދީނުގެ އަންހެން ކުދިންތަކެއް އޮޅުވާލައިގެން ލޯބީގެ މަޅީގައި ޖެއްސުމަށްފަހު އިސްލާމްދީނަށް ވައްދައި ފަހުން އެ އަންހެން ކުދިން އައިއެސްއައިއެސްގެ ހަރުކަށި ފިކުރުތަކަށް ތަބާވާން މަޖުބޫރުކުރުވާ މަންޒަރެވެ.
މި އަހަރު ރިލީޒްކުރާ ފިލްމާ ދެކޮޅަށް ގިނަ ބަޔަކު ސޯޝަލް މީޑިއާގައި އަޑުއުފުލަމުން އަންނައިރު "ދަ ކެރެލާ ސްޓޯރީ 2" އަކީ ކެރެލާގެ ރައްޔިތުންގެ މެދުގައި އޮތް އެއްބައިވަންތަކަން ގުޑުވާލާން ބަޔަކު މީހުން ހިންގާ ބޮޑު ޕްރޮޕެގެންޑާއެއް ކަމަށް ގިނަ ބަޔަކު ވަނީ ސިފަކޮށްފައެވެ.