28 Feb 2026, 11:32
ޑައިރެކްޓަރުންގެ ތެރެއިން ކަރަން ޖޯހަރް، އަނޫރާގް ކަޝްޔަޕް އަދި އަދިތްޔާ ޗޯޕްރާގެ ތެރެއިން މޮޅު ޑައިރެކްޓަރަކު ހޮވަން ބޮލީވުޑްގެ ބަތަލާ އަދި ސިޔާސީ ލީޑަރު ކަންގަނާ ރަނައުތުއަށް ދިން ފުރުސަތަކާ ގުޅިގެން އެކަމަށް އިންކާރުކޮށް، އޭނާގެ މިންގަނޑުތައް އެހާ ދަށު ފަންތިއަކަށް އަދި ނުވެއްޓޭ ކަމަށް ބަތަލާ ބުނެފިއެވެ.
ފިލްމީ ދާއިރާގެ އިތުރުން ސިޔާސީ ދާއިރާގައި ހަރަކާތްތެރިވާ ކަންގަނާ އަކީ އެއްވެސް ޖެހިލުމެއް ނެތި އޭނާގެ ޚިޔާލުތައް ފާޅުކުރާ މީހެއްގެ ގޮތުގައި މަޝްހޫރުވެފައިވާ ފިލްމީ ތަރިއެކެވެ.
ފިލްމު އިންޑަސްޓްރީގެ ނުފޫޒުގަދަ ފަރާތްތަކާ މެދު ދެކޭ ގޮތާއި ހިތްހަމަނުޖެހުންތައް ތަކުރާރުކޮށް އެއްވެސް ޖެހިލުމެއް ނެތި ކަންގަނާ ފާޅުކުރަމުންދާއިރު އެ ނިންމުންތަކާ މެދު އޭނާ ކަންބޮޑުވެ ދެރައެއްވެސް ނުވެއެވެ.
ސަލްމާން ޚާން ބަތަލާ ކަންގާނާއާ އެކު--ފޮޓޯ/އިންޑިއަންއެކްސްޕްރެސް
ދާދި ފަހުން ބޭއްވި އިވެންޓެއްގައި އޭނާ ވަނީ މިދިޔަ އަހަރު ބޮޑު ކާމިޔާބީއެއް ހޯދި ބޮލީވުޑް ފިލްމު "ދުރަންދަރު"އާ ބެހޭގޮތުން ވެސް ވާހަކަދައްކާފައެވެ.
އެގޮތުން "ދުރަންދަރު"، "ދަ ކަޝްމީރު ފައިލްސް" އަދި "އިމަޖެންސީ" ފަދަ ފިލްމުތަކާ ގުޅޭގޮތުން ސުވާލު ކުރުމުން ކަންގަނާ ބުނީ، ފޮތެއް ކަމުގައި ވިޔަސް ނުވަތަ ފިލްމެއް ކަމުގައި ވިޔަސް، ކޮންމެ ފަންނަކީ މުޖުތަމައާ މުއާމަލާތް ކުރެވޭނެ ފެންވަރުގެ އުފެއްދުމަކަށް ވާންޖެހޭނެ ކަމަށެވެ.
ހަމައެއާއެކު އާއްމުންގެ ފަރާތުން ރައްދުވާ ފާޑުކިޔުންތަކަކީ ވެސް މުހިންމު އެއްޗެއް ކަމަށާއި، ނަމަވެސް ފިލްމުތައް މަނާކުރުމާއި، ބޮއިކޮޓް ކުރުމަކީ ގޯސް ކަމެއް ކަމަށް ކަންގަނާ ވަނީ ބުނެފައެވެ.
"ނިއުސް 18 ރައިޒިންގް ބާރަތު ސަމިޓް" ގައި ވާހަކަދައްކަމުން ކަންގަނާ ވަނީ މިހާރު ހޮލީވުޑްގެ ފުރުސަތުތަކާ މެދު ވިސްނަމުންދާ ކަމަށާއި ހޮލީވުޑް ފިލްމަކުން ފުރުސަތު ލިބިފައިވާކަން ވެސް ކަށަވަރުކޮށްދީފައެވެ.
އިންޓަނޭޝަނަލް ޕްރޮޖެކްޓްތަކާ ބެހޭގޮތުން ވާހަކަދައްކަމުން ކަންގަނާ ބުނީ، ބައެއް ފުރުސަތުތައް އެބަހުރި ކަމަށާއި، ނަމަވެސް އެކަމުގައި ގޮތެއް ނިންމާނީ އޭނާގެ ވަގުތާއި ޝައުގުވެރިކަން ހުރި މިންވަރަކަށް ބަލާފައި ކަމަށެވެ.
އެކުވެރިކަމުގެ ނަޒަރަކުން ބަލާއިރު ސަލްމާން ޚާން، ޝާހްރުކް ޚާން އަދި އާމިރު ޚާންގެ ތެރެއިން އިޚްތިޔާރު ކުރާނީ ކާކުތޯ ސުވާލުކުރުމުން ކަންގަނާ ބުނީ، އެއިން އެއްވެސް އެކްޓަރަކީ ބަތަލާގެ އެކުވެރިންކަމެއް ނުދެނެހުރި ކަމަށާއި ނަމަވެސް ސަލްމާން އަކީ ވަރަށް ''ކޫލް'' މީހެއް ކަމަށެވެ.
ޑައިރެކްޓަރުންގެ ތެރެއިން އަނޫރާގް ކަޝްޔަޕް، ކަރަން ޖޯހަރް ނުވަތަ އަދިތްޔާ ޗޯޕްރާގެ ތެރެއިން ޑައިރެކްޓަރުންގެ ތެރެއިން މޮޅު ޑައިރެކްޓަރަކު ހޮވަން ބުނުމުން، ކަންގަނާ ވަނީ ވަކި ޑައިރެކްޓަރެއްގެ ނަން ނުބެނެ އެ ސުވާލަށް ވަރުގަދަ ރައްދެއް ދީފައެވެ.
އެގޮތުން ބަތަލާ ބުނީ، ފިލްމު އުފެއްދުމާއި އެކްޓިންއާ މެދު ދެކޭގޮތާއި ހުންނަ ޝައުގުވެރިކަމާއި މިންގަނޑުތައް އެހާ ދަށް ނޫން ކަމަށާއި ކަންގަނާއަށް ހުށަހެޅި ޑައިރެކްޓަރުންގެ ލިސްޓަށް އެއަށްވުރެ ފެންވަރު ރަނގަޅު މީހުންގެ ނަންތައް އިތުރުކުރަންޖެހޭ ކަމަށެވެ.
ކަންގަނާ އެންމެ ފަހުން ބެލުންތެރިންނަށް ފެނިފައި ވަނީ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ހަޔާތުގެ މައްޗަށް ބިނާކޮށް އުފައްދާފައިވާ "އިމަޖެންސީ" އިންނެވެ.