22 Feb 2026, 09:36
މިއަދުގެ ސަން ބަދިގެ ސެގްމެންޓްގައި މި ގެނެސްދެނީ ދިވެހީންގެ މެދުގައި ވަރަށް އާއްމުކޮށް ކައްކައިއުޅޭ ދިވެހިވަންތަ ރިހައެއް ކަމަށްވާ ކުޅި ރިހަ ކައްކާނެ ގޮތެވެ.
ދިވެހި ރަހަތަކަކީ އާއްމުގޮތެއްގައި ވަރަށް އަވަހަށް ގެއްލިގެންދާ ރަހަތަކެއް ނަމަވެސް މިއަދުގެ ސަން ބަދިގެ ސެގްމެންޓްގައި މި ގެނެސްދޭ ކުޅި ރިހަ ތައްޔާރުކުރާ ގޮތް ގެނެސްދޭނީ އޭގެ އަސްލު ނުގެއްލޭ ގޮތަށެވެ.
ބޭނުންވާ ތަކެތި
500 ގްރާމް ތާޒާ ކަނޑުމަސް ( 2/1 އިންޗިއަށް ކޮށާފައި)
01 ފިޔާ – މެދު ސައިޒުގެ ( ހިމަދިގުކޮށް ކޮށާފައި)
03 ލޮނުމެދު (ހިމުންކޮށް މުގުރާފައި)
2/1 އިންޗި ހުންނަވަރުގެ އިނގުރު (ހިމުންކޮށް މުގުރާފައި)
2/1 އިންޗި ހުންނަވަރުގެ ފޮނިތޮށި
04 ބިލަމަގު ( ދެފަޅިއަށް ފަޅާފައި)
02 ސައިސަމުސާ ލޮނުމިރުސް ހަވާދު
04 ޖޯޑު ފެންކިރު
01 ޖޯޑު ބޯކިރު
05 ކާފޫރުތޮޅި
01 ގިތެޔޮމިރުސް ( 4 ފަޅިއަށް ފަޅާފައި)
ހިކަނދިފަތް/ ރާނބާފަތް
ރަހަލާވަރުގެ ލޮނުކޮޅެއް
ޝެފް ނަހީޒު ކުޅި ރިހަ ތައްޔާރުކުރާ ގޮތް ގެނެސްދެނީ--ފޮޓޯ/ފޭސްބުކް
ތައްޔާރު ކުރާނެގޮތް
ތެއްޔެގެތެރެޔަށް ތެޔޮފޮދެއް އަޅާ ހޫނުކޮށްލުމަށް ފަހު ކޮށާފައި ހުރި ފިޔާ، ހިކަނދިފަތް، ރާނބާފަތް، ފޮނިތޮށި، ކާފޫރުތޮޅި އަޅާލުމަށްފަހު ފިޔާ ކޮޅު ރަތް ކޮށްލާށެވެ. ފިޔާކޮޅު ރަތްވީމާ އޭގެއިން އެއްބައި ބޯކިރު ޖޯޑުތެރެޔަށް އަޅާފައި ދެންބާކީހުރި ބައިގެ ތެރެއަށް ލޮނުމިރުސް ހަވާދު އަޅާ އެއްކޮށްލުމަށްފަހު ފެންކިރު، ލޮނުމެދު، އިނގުރު، ބިލަމަގު، ގިތެޔޮމިރުސް އަޅާލުމަށްފަހު ކައްކާލާފައި މަސް އަދި ލޮނު އަޅާފައި ރަގަނޅަށް ކައްކާލާށެވެ.
މަސްކޮޅު ރޯފިލީމާ ބޯކިރުކޮޅު ރަގަނޅަށް އެއްކޮށްލުމަށްފަހު ކެކެމުންއައި ރިހަކޮޅުގެ ތެރެއަށް އަޅާ އެއްކޮށްލުމަށްފަހު ކުޑަކޮށްކައްކާލާފައި އުދުންނިއްވާލާށެވެ. މި ކުޅި ރިހަ އަކީ ބަތް އަދި ރޮށްޓާ އެކު ވެސް ވަރަށް މީރުކޮށް ކެވިދާނެ ބާވަތެކެވެ. އިތުރަށް ކެއުމަށް ފުރިހަމަކަމެއް ގެންނަން ބޭނުންނަމަ ކޮޕީފަތު ސަޓަނި މި ރިހައާ އެކު ހިމަނާލެވިދާނެއެވެ.