20 Feb 2026, 10:37
ގާތްގަނޑަކަށް އަށް އަހަރުގެ މެދުކެނޑުމަކަށްފަހު އަލުން އިންޑިއާގެ ސިނަމާގައި މަސައްކަތްކުރަން ފެށި ބަތަލާ ޕްރިޔަންކާގެ ފިލްމު "ވަރަނަސީ"އަކީ ފިލްމީ ކެރިއަރަށް ބޮޑު ބަދަލެއް ގެނެސްދޭނެ ފިލްމެއް ކަމަށް ބަތަލާ ބުނެފިއެވެ.
މި އަންނަ ބުދަ ދުވަހު އެމެޒޯން ޕްރައިމްގައި ޕްރީމިއާކުރާ ބަތަލާގެ ހޮލީވުޑް ފިލްމު "ދަ ބްލަފް"ގެ ޕްރީމިއާގައި ވާހަކަ ދައްކަމުން ޕްރިޔަންކާ ވަނީ އޭނާ މަސައްކަތްކުރާ އިންޑިއާ ފިލްމު "ވަރަނަސީ"ގެ ޑައިރެކްޓަރު އެސް އެސް ރާޖާމޮލީއަށް ވަރަށް ބޮޑަށް ތައުރީފުކޮށްފައެވެ.
އެގޮތުން ފިލްމު "ވަރަނަސީ" ކުޅެން ނިންމި ނިންމުމަކީ ވަރަށް ބޮޑަށް ވިސްނުމަށްފަހު ނިންމި ނިންމުމެއް ކަމަށާއި އެ ފިލްމަށް އެއްބަސްވީ އެސް އެސް ރާޖާމޮލީގެ ވިޝަންއަށް އޮތް އިތުބާރު ބޮޑުވުމުން ކަމަށް ޕްރިޔަންކާ ވަނީ ބުނެފައެވެ.
ބަތަލާ ޕްރިޔަންކާ ޗޯޕްރާ ފިލްމު "ވަރްނަސީ"ގެ ލީޑް އެކްޓަރުންނާ އެކު--ފޮޓޯ/ހިންދުންސްތާންޓައިމްސް
ރާޖާމޮލީ މިހާތަނަށް ގެނެސްދިން ކޮންމެ ފިލްމަކީ ވެސް ވަރަށް އުފެއްދުންތެރި ބެލުންތެރިންގެ ޝައުގުވެރިކަން އިންތިހާއަށް ދަމައިގަނެފައިވާ ފިލްމުތަކަށް ކަމަށާއި ޕްރިޔަންކާގެ ފިލްމު "ވަރަނަސީ"އަކީ ބެލުންތެރިންނަށް ކަމުދާނެ ބަތަލާގެ ކެރިއަރު މުޅިން ބަދަލުކޮށްލާނެ ފިލްމެއް ކަމަށް ބަތަލާ ވަނީ ބުނެފައެވެ.
ވެރައިޓީއަށް ތަންކޮޅެއް ކުރިން ދީފައިވާ އިންޓަވިއުއެއްގައި ވެސް ޕްރިޔަންކާ ވަނީ އޭނާ މަސައްކަތް ކުރަމުން އަންނަ ފިލްމު "ވަރަނަސީ"އާ ގުޅޭގޮތުން ވާހަކަ ދައްކާފައެވެ.
އެގޮތުން އެ ފިލްމުގައި ކުޅެނީ މިހާތަނަށް ބަތަލާގެ ކެރިއަރުގައި ކުޅެފައިނުވާ ކަހަލަ ކެރެކްޓާއެއް ކަމަށާއި ދުރު ރާސްތާއެއް ކަޑައްތު ކުރުމަށްފަހު ރާޖާމޮލީގެ ފިލްމު ސެޓަށް ދެވުމުން އިހުސާސް ކުރެވެނީ މުޅިން ތަފާތު ދުނިޔެއަކަށް ދެވޭ ކަމުގެ އިހުސާސް ކަމަށް ބަތަލާ ވަނީ ބުނެފައެވެ.
ޕްރިޔަންކާއާ އެކު ފިލްމު "ވަރަނަސީ"އިން ދެން ފެންނާނީ ތެލުގޫ އެކްޓަރު މަހޭޝް ބާބޫ އަދި ޕްރިތުވީރާޖް ސުކުމަރަންއެވެ. އޮސްކާ އެވޯޑު ވެސް ހާސިލުކޮށްފައިވާ އިންޑިއާގެ މިއުޒީޝަން އެމްއެމް ކީރާވަނީ މިއުޒިކް ތައްޔާރުކޮށްދޭ މި ފިލްމު ބެލުންތެރިންނަށް ގެނެސްދޭނީ އަންނަ އަހަރުގެ އޭޕްރިލް މަހު ކަމަށް ރިޕޯޓުތަކުން ބުނެއެވެ.
ޕްރިޔަންކާ އެންމެފަހުން މަސައްކަތްކުރި އިންޑިއާ ފިލްމަކީ 2019 ވަނަ އަހަރު ގެނެސްދިން ފިލްމު "ދަ ސްކައި އިޒް ޕިންކް"އެވެ.