30 Dec 2025, 08:58
ބޮލީވުޑްއިން މި އަހަރު ގެނެސްދިން ފިލްމުތަކުގެ ތެރެއިން ބޮޑު ކާމިޔާބީއެއް ހޯދާނެ ކަމުގެ އުއްމީދުގައި ގިނަ ބަޔަކު ސިނަމާއަށް ބަލަ ދިޔަ ބައެއް ފިލްމުތަކަކީ އުއްމީދުވެސް ނުކުރާހާ ބޮޑަށް އޯޑިއަންސް މާޔޫސްކުރުވި ފިލްމުތަކެކެވެ.
ބައެއް ފިލްމުތަކަކީ މި އަހަރު ރިލީޒްކުރާނެ އެންމެ އުއްމީދީ ފިލްމުތަކަށް ވުމުގެ ފަހަތުގައި ފޮރުވިފައިވާ ސިއްރަކީ އެ ފިލްމުތަކުގެ ލީޑް އެކްޓަރުންނާއި ފިލްމުތައް ގެނެސްދިން ވަރުގަދަ ނަން މަޝްހޫރު ޕްރޮޑަކްޝަން ކުންފުނިތަކެވެ. އެގޮތުން ފާހަގަކޮށްލެވޭ ބައެއް ފިލްމުތަކަށް ބަލައިލާނަމެވެ.
ސިކަންދަރު
ބޮލީވުޑްގެ އެންމެ މަގުބޫލު އަދި އެންމެ ވަރުގަދަ އެކްޓަރު ސަލްމާން ޚާން ލީޑް ރޯލް ކުޅުނު ފިލްމު "ސިކަންދަރު" ބެލުންތެރިންނަށް ގެނެސްދިނީ މި އަހަރުގެ ފިޠުރު ޢީދާ ދިމާކޮށެވެ. މާޒީއަށް ބަލާލާއިރު އާއްމުކޮށް ޢީދާ ގުޅުވައިގެން ސަލްމާން ޚާން ގެނެސްދީފައިވާ ގިނަ ފިލްމުތަކަކީ ބޮކްސް އޮފީހުގައި ވެސް ހިޓް ފިލްމުތަކެކެވެ.
އެހެންކަމުން ފިލްމު "ސިކަންދަރު" ރިލީޒްކުރުމުގެ މާކުރިން އެ ފިލްމާ މެދު ބެލުންތެރިންގެ ކުރި އުއްމީދު ވަރަށް ބޮޑެވެ. ނަމަވެސް އޭ އާރް މުރުގަދޯސް ޑައިރެކްޓްކޮށް ސާޖިދު ނަދިއަދުވާލާ ޕްރޮޑިއުސްކުރި މި ފިލްމަށް ހީކުރިވަރާ ގާތަށް ވެސް އާމްދަނީ ހޯދިފައެއް ނުވެއެވެ.
ފިލްމުގެ ރިވިއުސްތަކަށް ބަލާއިރު ގިނަ ބަޔަކު ބުނެފައި ވަނީ "ސިކަންދަރު" އެއީ މިހާތަނަށް ސަލްމާންގެ އެންމެ ބަލިކަށި އެކްޓިންގް ބެލުންތެރިންނަށް ފެނުނު ފިލްމު ކަމަށެވެ. މި ފިލްމު އުފައްދަން ހޭދަކުރި ޚަރަދު ވެސް ފޫނުބެދި ފިލްމަށް ބޮކްސް އޮފީހުގައި ހޯދުނީ 182.7 ކްރޯޑު ރުޕީސްއެވެ.
އިމަޖެންސީ
އެތައް ފަހަރެއްގެ މަތިން ރިލީޒްކުރާނެ ތާރީޚު ބަދަލުވެ އެންމެ ފަހުން މި އަހަރުގެ ޖަނަވަރީ މަހު ސިނަމާތަކަށް ގެނެސްދިން ބަތަލާ ކަންގަނާ ރަނާވަތުގެ ފިލްމު "އިމަޖެންސީ" އަކީ ސިޔާސީ ލީޑަރެއްގެ ހަޔާތާ ގުޅުންހުރި ގިނަ ވާހަކަތަކެއް ގެނެސްދިން ތާރީޚީ ބައޮގްރަފިކަލް ޑްރާމާ ފިލްމެކެވެ.
ކަންގަނާ ޑައިރެކްޓަރެއްގެ ގޮނޑީގައި އިށީނދެ އިނދެ ލީޑް ރޯލް ވެސް ކުޅުނު މި ފިލްމުން ކަންގަނާ ގެނެސްދިން ވާހަކަ ބެލުންތެރިން މާ ގަޔާނުވީ ބަތަލާ އަކީ ސިޔާސީ ދާއިރާގައި މަސައްކަތް ކުރަމުން އަންނަ މީހަކަށްވުން ވެސް އެކަށީގެންވާ ކަމަށް ރިޕޯޓުތަކުން ބުނެއެވެ.
ބެލުންތެރިންގެ ތެރެއިން ގިނަ ބަޔަކު ސިޔާސީ މައުޟޫއުތަކާ ދުރުގައި ތިބެން ބޭނުންވުމުގެ ނަތީޖާއަކަށްވީ "އިމަޖެންސީ"އަށް ބޮކްސް އޮފީހުގައި އުއްމީދުކުރިވަރާ ގާތަށް ވެސް އާމްދަނީ ނުލިބުމެވެ. ފިލްމަށް ކުރިމަތިވި ނާކާމިޔާބީއާ ގުޅިގެން ކަންގަނާގެ ފާޑުކިޔުންތައް ފިލްމު އިންޑަސްޓްރީގެ ވެސް ގިނަ ބަޔަކަށް އޭރު އަމާޒުވިއެވެ.
ވޯ 2
މި އަހަރު ބެލުންތެރިންނަށް ގެނެސްދޭނެކަން އިއުލާނުކުރި ފިލްމުތަކުގެ ތެރެއިން އެންމެ ގިނަ ބައެއްގެ އުއްމީދުތައް ގުޅުނު އެއް ފިލްމަކީ ޔަޝް ރާޖް ފިލްމްސްއިން އޮގަސްޓް މަހު ގެނެސްދިން ފިލްމު "ވޯ 2"އާއެވެ.
ފިލްމުގެ ކާސްޓުގައި ރިތިކް ރޯޝަން ހިމެނުމުގެ އިތުރުން ތެލުގޫ އެކްޓަރު އެންޓީއާރް ޖޫނިއާ އަދި ބަތަލާ ކިއާރާ އަދުވާނީ ހިމެނޭކަން އިއުލާނުކުރުމާ އެކު މިއީ ބެލުންތެރިން މާޔޫސްކޮށްނުލާނެ ފިލްމަކަށްވާނެ ކަމަށް ގިނަ ބަޔަކު އުއްމީދުކުރިއެވެ. ނަމަވެސް ކަންދިމާކުރީ މުޅީން އެއާ އިދިކޮޅަށެވެ.
ފިލްމު "ވޯ 2"އަކީ 2019 ވަނަ އަހަރު ވައިއާރްއެފްއިން ގެނެސްދިން ބްލޮކް ބާސްޓަ ފިލްމުގެ ސީކުއަލްއަށް ވުމުން އެ ފިލްމުގެ ވާހަކަ ރީތިވެ ޒަމާނީ ފެންވަރަށް ފިލްމުގެ އެކްޝަން ސީންތައް ވެސް މޮޅުވެފައި އުފެއްދުންތެރިވާނެ ކަމަށް ގިނަ ބަޔަކު އުއްމީދުކުރިއެވެ.
ހާއްސަކޮށް އަޔާން މުކަރުޖީ ފިލްމު ޑައިރެކްޓްކުރަން ހަވާލުވުމުން އާ ކަންކަން "ވޯ 2"އިން ތަޖުރިބާކޮށްލެވޭނެ ކަމަށް ބެލުންތެރިން އުއްމީދުކުރިއެވެ.
އެހެންނަމަވެސް ފިލްމު ބެލުމަށްފަހު ބެލުންތެރިން މާޔޫސްވެ ތިބެ ބުނީ މި ފިލްމަކީ މިހާތަނަށް ވައިއާރްއެފްއިން ގެނެސްދިން އެންމެ ދަށް ކޮލިޓީ ފިލްމު ކަމަށެވެ. ހާއްސަކޮށް ތެލުގޫގެ ނުފޫޒުގަދަ އެކްޓަރު އެންޓީއާރް ޖޫނިއަގެ ބޭނުން އެންމެ ރަނގަޅު ގޮތުގައި ފިލްމުގައި ހިފާފައި ނުވުމުން ވަރަށް ގިނަ ބަޔަކު ވަނީ އެކަމާ ފާޑުކިޔާފައެވެ.
ސަން އޮފް ސަރުދާރު 2
މި އަހަރުގެ އޮގަސްޓް މަހު ބެލުންތެރިންނަށް ގެނެސްދިން "ސަން އޮފް ސަރުދާރު 2"އަކީ އެތައް ބަޔަކު ހެއްވާލި ފިލްމު "ސަން އޮފް ސަރުދާރު"ގެ ސީކުއަލްއެކެވެ. ދެވަނަ ފިލްމު އިއުލާނު ކުރުމާ އެކު އިހު ބެލުންތެރިން ހެއްވާލި ޖާދޫ ސީކުއަލްގައި ވެސް ބޭނުންކުރާނެ ކަމަށް ގިނަ ބަޔަކު އުއްމީދުކުރިއެވެ.
އެހެންނަމަވެސް އަޖޭ ދޭވްގަން ލީޑް ރޯލްއިން މިފަހަރުވެސް ފެނުނު ފިލްމު "ސަން އޮފް ސަރުދާރު 2" ބެލުމަށްފަހު އޯޑިއަންސްގެ ފަރާތުން ހިނިތުންވުމުގެ ބަދަލުގައި ފެނުނީ ފުސް މޫނެވެ. އެހެންނުވާންވީ ސަބަބެއް ނެތެވެ.
އެތައް ބަޔަކު ހެއްވާލި 2012 ވަނަ އަހަރުގެ ފިލްމުގައި ފެނުނު ފަދަ އެއްވެސް ކަހަލަ ހެއްވާ މަޖާ މަންޒަރެއް ދެވަނަ ފިލްމުން ފެންނަން ނެތުމަކީ އެ ސީކުއަލްއަށް ވެސް ލިބުނު ވަރަށް ބޮޑު ވެއްޓުމެއް ކަމަށް ބެލުންތެރިން ވަނީ ބުނެފައެވެ.
ބާޣީ 4
މިހާތަނަށް މި ނަމުގައި ތިން ފިލްމެއް ގެނެސްދިންއިރު "ބާޣީ"އަކީ އެކްޓަރު ޓައިގާ ޝްރޮފްގެ ފިލްމީ ކެރިއަރުގެ އެންމެ ބޮޑު ކާމިޔާބީއެއް ހޯދި ފިލްމުތަކުގެތެރޭ ހިމެނޭ ފިލްމެކެވެ. އެހެންވެ "ބާޣީ 3" ވެސް އެއީ ރީތި އެކްޝަން ފިލްމަކަށްވާނެ ކަމަށް ގިނަ ބަޔަކު އުއްމީދުކުރިއެވެ.
ފިލްމުގައި ޓައިގާ ކުޅުނު ކެރެކްޓާއަށް ބެލުންތެރިންގެ ތައުރީފު އޮހުނު ނަމަވެސް ކުރީގެ ތިން ފިލްމާ ޚިލާފަށް ހަތަރުވަނަ ފިލްމަކީ މުޅިންވެސް ތަޅާ ފޮޅުންތަކެއް ދައްކުވައިދިން ވަރަށް ހަލަބޮލި ފިލްމެއްގެ ގޮތުގައި ބެލުންތެރިން ވަނީ ސިފަކޮށްފައެވެ.
ހަމައެއާއެކު މިއީ ޑައިރެކްޓަރު ސަންދީޕް ރެޑީ ވަންގާގެ ފިލްމު "އެނިމަލް"ގައި ފެނުނު ކަހަލަ މަންޒަރުތަކެއް ދައްކުވައިދޭން މަސައްކަތްކުރި ފިލްމެއްގެ ގޮތުގައި ގިނަ ބަޔަކު ވަނީ "ބާޣީ 4" ސިފަކޮށްފައެވެ.