28 Dec 2025, 08:49
އިއްޔެ ފާހަގަކުރި ސަލްމާން ޚާންގެ 60 ވަނަ އުފަންދުވަހާ ގުޅުވައިގެން އެކްޓަރުގެ އާ ފިލްމު "ބެޓްލް އޮފް ގަލްވާން"ގެ ޓީޒާ ބެލުންތެރިންނަށް ދައްކާލައިފިއެވެ.
ސަލްމާންގެ އުފަންދުވަހުގެ ހާއްސަ ހަދިޔާއެއްގެ ގޮތުގައި އެކްޓަރުގެ ކުރިއަށް އޮތް ފިލްމުގެ ޓީޒާ ގެނެސްދިންއިރު ފިލްމު ސިނަމާތަކަށް ގެންނާނެ ތާރީޚު ވެސް ވަނީ އިއުލާނުކޮށްފައެވެ.
ޝޫޓިންގް ނިމި މިހާރު ޕޯސްޓް-ޕްރޮޑަކްޝަން މަރުހަލާގައި އޮތް "ބެޓްލް އޮފް ގަލްވާން" ބެލުންތެރިންނަށް ގެނެސްދޭން ނިންމާފައި ވަނީ އަންނަ އަހަރުގެ އޭޕްރިލްގައެވެ. އޭޕްރިލް މަހުގެ 17 ވަނަ ދުވަހު ފިލްމު ސިނަމާތަކަށް ދޫކޮށްލާނެކަން އިއުލާނުކުރިއިރު ސަލްމާންގެ ފިލްމު މި ފަހަރު ގެނެސްދޭނީ ފިތުރު އީދާ ދިމާކޮށް ނޫންކަން ފާހަގަކޮށްލެވެއެވެ.
ފިލްމު "ބެޓްލް އޮފް ގަލްވާން"ގެ ބަތަލާ ޗިތުރަންދަގާ--ފޮޓޯ/ޕިންކްވިލާ
ފިލްމު "ބެޓްލް އޮފް ގަލްވާން" އަކީ ސަލްމާން އަލަށް އެކީގައި މަސައްކަތްކުރާ ޑައިރެކްޓަރު އަޕޫރުވާ ލާކިއާގެ ފިލްމެކެވެ. ސަލްމާން އަސްކަރީ އޮފިސަރެއްގެ ރޯލްއިން ފެންނާނެ މި ފިލްމަކީ އިންޑިއާ އާއި ޗައިނާއާ ދެމެދު 2020 ވަނަ އަހަރުގައި ގަލްވާން ވެލީގައި ހިނގި ކުރިމަތިލުންތަކެއްގެ މައްޗަށް ބިނާކޮށް އުފައްދާ ފިލްމެކެވެ.
މި ހާދިސާގެ މައްޗަށް ބިނާކޮށް ލިޔުންތެރިން ކަމަށްވާ ޝިވް އަރޫރް އާއި ރާހުލް ސިންގް ވަނީ "އިންޑިއާސް މޯސްޓް ފިއަލެސް 3"ގެ ނަމުގައި ފޮތެއް ވެސް ނެރެފައެވެ.
ސަލްމާންއާ އެކު "ބެޓްލް އޮފް ގަލްވާން"ގެ ބަތަލާގެ ރޯލްއިން ފެންނާނީ ޗިތުރަންދަގާއެވެ. މިއީ ބަތަލާ ސަލްމާންއާ އެކު މަސައްކަތްކުރާ ފުރަތަމަ ފިލްމެވެ.
ސަލްމާންގެ އެންމެފަހުން ރިލީޒްކުރެވުނު ފިލްމަކީ މި އަހަރުގެ ފިތުރު ޢީދާ ދިމާކޮށް ބެލުންތެރިންނަށް ގެނެސްދިން ފިލްމު "ސިކަންދަރު"އެވެ.