24 Dec 2025, 10:44
މަސްތުވާތަކެތި ޓްރެފިކް ކުރި ކަމުގެ ތުހުމަތު ކުރެވޭ ވަރަށް, ގިނަ އަދަދެއްގެ މަސްތުވާތަކެއްޗާއެކު ހައްޔަރު ކުރުމުން އެއީ އޭނާ ބޯން ގެންގުޅުނު ތަކެތި ކަމަށް, ދިވެހި ޒުވާނަކު ކޯޓުގައި ބުނެފިއެވެ.
މި މައްސަލައިގެ ތުހުމަތުގައި އިއްޔެ ވަނީ ލ. ގަމަށް ނިސްބަތްވާ އުމުރުން 30 އަހަރުގެ ޒުވާނެއްގެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރު ކޮށްފައެވެ.
ފުލުހުން ކޯޓުގައި ބުނެފައިވަނީ އެ ޒުވާނާގެ އަތުން ފެނުނު މަސްތުވާތަކެތީގެ ވަގުތީ ބަރުދަން, ޓްރެފިކިންގެ މިންގަނޑަށް އަރާ ކަމަށެވެ. އެހެންކަމުން އޭނާގެ މައްޗަށް ތުހުމަތު ކުރެވެނީ ޖިނާއީ ބޮޑު ކުށެއް ކުރި ކަމަށެވެ.
ތުހުމަތު ކުރެވޭ މީހާ ޝަރީއަތުގެ މަޖިލީހުގައި ބުނެފައިވަނީ ފެނުނު މަސްތުވާތަކެއްޗަކީ އޭނާ ބޯން ގެންގުޅުނު ތަކެތި ކަމަށެވެ.
އޭނާގެ ބަންދަށް 10 ދުވަސް ކްރިމިނަލް ކޯޓުން އިއްޔެ ވަނީ ޖަހައިފައެވެ. ބަންދަށް ކުރު މުއްދަތެއް ދީފައި އެ ވަނީ އޭނާ އަތުން ފެނުނު މަސްތުވާތަކެތީގެ ސީދާ ބަރުދަން އަދި އެނގިފައި ނުވާތީ ކަމަށް އަމުރުގައިވެއެވެ.