21 Dec 2025, 08:35
ދާދި ފަހުން ރިލީޒްކުރުން ފަސްކުރިކަން އިއުލާނުކުރި ބޮލީވުޑްގެ ފިލްމު "އިއްކީސް"ގެ އެންމެ ފަހުގެ ޓްރެއިލާ ބެލުންތެރިންނަށް ދައްކާލައިފިއެވެ.
މި ފިލްމަކީ ނެޝަނަލް އެވޯޑް ކާމިޔާބުކޮށްފައިވާ ކުޅަދާނަ ޑައިރެކްޓަރު ސްރީރާމް ރަގްވަން ޑައިރެކްޓްކޮށް ގެނެސްދޭ އަސްކަރީ ފިލްމެކެވެ. ފިލްމު "އިއްކީސް" ބިނާކޮށްފައިވަނީ 1971ވަނަ އަހަރުގައި އިންޑިއާ އާއި ޕާކިސްތާނާ ދެމެދު ހިނގި އަސްކަރީ ހަނގުރާމައިގައި ޝަހީދުވި ޢުމުރުން އެންމެ 21 އަހަރުގެ އަސްކަރީ އޮފިސަރު އަރޫން ކެތުރިޕާލްގެ ހަޔާތުގެ މައްޗަށެވެ.
މި ފިލްމުގައި އަރޫންގެ ރޯލް ކުޅެފައި ވަނީ ފިލްމު "ދަ އާޗީސް"އިން ފިލްމީ ދާއިރާއަށް ތައާރަފްވި ޒުވާން އެކްޓަރު އަގަސްތިޔާ ނަންދާއެވެ. އަގަސްތިޔާއަކީ އިންޑިއާގެ އެންމެ މަގުބޫލު ފިލްމީ އާއިލާ ބައްޗަން އާއިލާއަށް ނިސްބަތްވާ މެންބަރެކެވެ.
ފިލްމު "އިއްކީސް"ގެ މަންޒަރެއްގައި ކުރީގެ އެކްޓަރު ދަރުމެންދްރަ--ފޮޓޯ/ބޮލީވުޑްހަންގާމާ
އިންޑިއާގެ ލެޖެންޑަރީ އެކްޓަރު އަމީތާބް ބައްޗަންގެ ކާފަ ދަރިފުޅު އަގަސްތިޔާގެ މިއީ ފުރަތަމަ ބޮޑު ސްކްރީން ފިލްމެވެ. ފިލްމު "އިއްކީސް" މިހާރު ބެލުންތެރިންނަށް އެންމެ ޚާއްސަވާ އެއް ސަބަބަކީ މިދިޔަ މަހުގެ 24ގައި ދުނިޔެ ދޫކުރި އިންޑިއާގެ އައިކޮނިކް އެކްޓަރު ދަރުމެންދްރަ(ދަރޭ) މި ފިލްމުގެ ޚާއްސަ ރޯލަކުން ފެންނާތީއެވެ.
މި ފިލްމަކީ ދަރޭ މަރުވުމުގެ ކުރިން މަސައްކަތް އެއްކޮށް ނިންމާލާފައިވާ ފިލްމެކެވެ. ދަރޭގެ ކެރިއަރުގެ އެންމެ ފަހު ފިލްމުގައި އަމީތާބްގެ ކާފަ ދަރިފުޅު ހިމެނޭއިރު ފާހަގަކޮށްލަންޖެހޭ ކަމަކީ އަމީތާބާއި ދަރޭއަކީ އެކީގައި ވަރަށް ގިނަ ފިލްމުތަކުގައި މަސައްކަތްކޮށްފައިވާ ހަގީގީ ދިރިއުޅުމުގައި ވެސް ވަރަށް ގާތް ދެ ރަޙުމަތްތެރިން ކަމެވެ.
ފިލްމު "އިއްކީސް"ގެ މުހިއްމު ރޯލްތަކުން ފެންނާނެ އިތުރު ތަރިންގެ ތެރޭ ޖައިދީޕް އަހްލަވާތު، ރާހުލް ދޭވް، ވިވާން ޝާހް، ސިކަންދަރު ކޭރް އަދި އެކަވަލީ ކަންނާ ވެސް ހިމެނެއެވެ.
މި ފިލްމުގައި ބަތަލާގެ ރޯލް ކުޅޭ ސިމަރް ބާޓިއާއަކީ އެކްޓަރު އަކްޝޭ ކުމާރަށް ބޮޑު ބޭބެ ކިޔާ މީހެކެވެ. މިއީ ސިމަރު ބޮލީވުޑަށް ތައާރަފުވާ އޭނާގެ ފުރަތަމަ ފިލްމެވެ. ފިލްމު "އިއްކީސް" ސިނަމާތަކަށް ގެންނާނީ މިފެށޭ އަހަރުގެ ޖަނަވަރީ އެއްވަނަ ދުވަހެވެ.