30 Nov 2025, 19:46
ތިން މީހުންނާއެކު ދަތުރުކުރަމުން ދިޔަ، މުދާ އުފުލާ ދޯންޏެއް އަޑިއަށްދާތީ ފުލުހުން ހަރަކާތްތެރިވާން ފަށައިފިއެވެ.
ފުލުހުން އެކްސްގައި ކުރި ޕޯސްޓެއްގައި ބުނީ، ވިލިގިއްޔާއި ވާދޫއާ ދިމާ ބޭރަށް "ފެހިލާ" ނަމަކަށްކިޔާ މުދާ އުފުލާ ދޯންޏެއް އަޑިއަށްދާކަމުގެ މައުލޫމާތު 16:59 އެހާކަންހާއިރު ފުލުހުންނަށް ލިބިފައިވާ ކަމަށެވެ.
އެ ރިޕޯޓާ ގުޅިގެން މެރިން ފުލުހުން ހަރަކާތްތެރިވަމުން އަންނަ ކަމަށް އެ މުއައްސަސާއިން ބުންޏެވެ. އެގޮތުން ދޯނި ކަފު ޖަހައިގެން ގުޅީފަޅަށް ވެއްދުމުގެ މަސައްކަތް މިހާރު ކުރަމުން އަންނަ ކަމަށް ފުލުހުން ބުންޏެވެ.
މޫސުން ގޯސްވެފައިވާ މި ދުވަސްވަރު، ކަނޑުމަތީގެ އިތުރު ހާދިސާއެއް ވެސް މިއަދު ހިނގައިފައިވެއެވެ. އެގޮތުން ފަތުރުވެރިންތަކެއް ގޮވައިގެން އދ. މަހިބަދޫން މާލެ ދަތުރުކުރަމުން ދިޔަ ލޯންޗެއް ރާޅެއްގައި ޖެހި، ބިއްލޫރިގަނޑު ތަޅައިގެން ގޮސް ހަތަރު މީހަކަށް އަނިޔާވިއެވެ.
ފުލުހުން ބުނީ އެ ހާދިސާގައި އަނިޔާވި ތިން ފަތުރުވެރިންނަށް، މާލެއާ ކައިރި ކްރޮސްރޯޑްސްއިން ފަރުވާދިން ކަމަށެވެ. އަދި އަނިޔާވި، ލޯންޗުގެ ފަޅުވެރިޔާއަށް އޭޑީކޭ ހޮސްޕިޓަލުގައި ފަރުވާދެމުން އަންނަ ކަމަށް ފުލުހުން ބުނެފައިވެއެވެ.
މޫސުމާ ބެހޭ ގައުމީ އިދާރާއިން މިހާރު ވެސް އޮތީ މެދުރާއްޖެ ތެރެއަށް ވައިޓް އެލާޓް ނެރެފައެވެ. އެގޮތުން ރ. އަތޮޅުން ފެށިގެން ތ. އަތޮޅަށް ނެރެފައިވާ އެލާޓްގައި ވަނީ، ހަވީރު 4:30 އިން ފެށިގެން ރޭގަނޑު 10:30 އަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކޮށްފައެވެ.