30 Nov 2025, 19:05
ލަންކާއަށް ކުރަމުން އަންނަ ވިއްސާރައިގައި ފެންބޮޑުވި ސަރަހައްދަކުން ދިވެހި ދެ އާއިލާތަކަށް އެހީތެރިކަން ފޯރުކޮށްދީފައިވާ ކަމަށް، އެ ގައުމުގައި ހުންނަ ދިވެހި ސަފީރު މަސްއޫދު އިމާދު މިއަދު ވިދާޅުވެއްޖެއެވެ.
މިހާރު ކުރިއަށްދާ "ސިލޯނާއެކު ދިވެހީން" ޓެލެތޯންގައި ލަންކާ ސަފީރު ވަނީ، އެ ގައުމަށް ކުރަމުން އަންނަ ވިއްސާރައިގެ އެންމެ ފަހުގެ މައުލޫމާތުތައް ހިއްސާކުރައްވާފައެވެ.
އެގޮތުން، ވިދާޅުވީ، އެ ގައުމަށް މިހާރު ވިއްސާރަ ކުރުން ހުއްޓާލައިފައި އޮތް ނަމަވެސް، ކުރިއަށް އޮތް ދެތިން ދުވަހު ކޯރުތަކުގެ ފެންބޮޑުވާނެ ކަން އެ ގައުމުގެ ސަރުކާރުން އަންގާފައިވާ ކަމަށެވެ.
ލަންކާގައި ހުންނަ ދިވެހި ސަފީރު މަސްއޫދު އިމާދު --- ފޮޓޯ/ ޕީއެސްއެމް
ފެންބޮޑުވި ސަރަހައްދެއްގައި ދިރިއުޅުނު ދެ ދިވެހި އާއިލާއަކަށް އެހީތެރިކަން ފޯރުކޮށްދީފައިވާ ކަމަށާއި އެ އާއިލާތައް މިހާރު ހޮޓަލަކަށް ބަދަލުކޮށްފައިވާ ކަމަށް ސަފީރު ވިދާޅުވިއެވެ. ނަމަވެސް އެ އާއިލާގައި ތިބި މީހުންގެ އަދަދާއި، ކުޑަކުދިން ހިމެނޭ ކަމެއް ސަފީރު ހާމަނުކުރައްވައެވެ.
އޭގެއިތުރަށް، ދިވެއްސަކު ކަމެއް ބޭނުންވެއްޖެނަމަ، ވަގުތުން ދަތުރުފަތުރު ފޮނުވައިގެން އެހީތެރިކަން ފޯރުކޮށްދެމުން އަންނަކަން މަސްއޫދު ފާހަގަކުރެއްވިއެވެ.
އިތުރަށް ވާހަކަދައްކަވަމުން މަސްއޫދު ވިދާޅުވީ، ކޮލޮމްބޯ އެއާޕޯޓަށް ޓްރާންސިޓަށް ދާއިރު ވަރަށް ބޮޑެތި އުނދަގޫތަކާ ދިމާވެދާނެ ކަމަށެވެ.
"އެހެންވީމަ ޓްރާންސިޓް ނުކޮށް ދަތުރުކުރެވެންޏާ މި ދުވަސްކޮޅު ހަމަ އެހެން ހެއްދެވިއްޔާ ރަނގަޅުވާނީ،" ސަފީރު ވިދާޅުވިއެވެ.
މަސްއޫދު ވަނީ، ދިވެހީން އެއްވެސް އެހީތެރިކަމެއް ބޭނުންވާނަމަ، ހޮޓްލައިނަށް ގުޅުމަށް އެދިވަޑައިގެންފައެވެ.
ލަންކާގައި ހުންނަ ދިވެހި ރާއްޖޭގެ އެމްބަސީގެ ހޮޓްލައިން ނަންބަރަކީ, 09476991666 އެވެ.
ފާހަގަކުރެވޭ ގޮތުގައި، ލަންކާއަށް ކުރަމުން އަންނަ ވިއްސާރައަށް އެހީތެރިވުމަށް ގިނަ މީޑިއާތަކެއް ގުޅިގެން ވަނީ، ޓެލެތޯނެއް ފަށާފައެވެ.
ޓެލެތޯނުގައި ސަން ސިޔާމް މީޑިއާއިން ވެސް ބައިވެރިވާއިރު، ޓެލެތޯނުގެ އެންމެހާ އަދާހަމަތައް ސަން އޮންލައިނާއި އެސްއެސްޓީވީ މެދުވެރިކޮށް ގެނެސްދޭނެއެވެ.
މި ޓެލެތޯނުގައި ބައިވެރިވުމުގެ ފުރުސަތު މިހާރު ވެސް އޮތީ ހުޅުވާލައިފައެވެ. އެގޮތުން ޖަމިއްޔާ ޖަމާއަތްތަކަށާއި، ސަރުކާރު އޮފީސްތަކުގެ އިތުރުން އަމިއްލަ ކުންފުނިތަކަށް ވެސް އެ ފުރުސަތު އެބައޮތެވެ.
'ސިލޯނާއެކު ދިވެހީން' ޓެލެތޯންއަށް އެހީވެވޭނީ:
ރުފިޔާ އެކައުންޓު ނަން: ސިލޯންއާ އެކު ދިވެހިން
- ރުފިޔާ އެކައުންޓު ނަމްބަރު :7730000796107
- ޑޮލަރު އެކައުންޓު ނަން: ސިލޯންއާ އެކު ދިވެހިން
- ޑޮލަރު އެކައުންޓު ނަމްބަރު: 7730000796106
- ޓީވީ ސްކްރީނަށް އަރާ ކިއުއާރް ކޯޑު
- ޕީއެސްއެމްގައި ބަހައްޓާފައިވާ ފަންޑް ފޮށި
- މާލެ، ހުޅުމާލެ އަދި ވިލިމާލޭގައި ބަހައްޓާފައިވާ ފަންޑް ފޮށިތައް
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި، މި ވިއްސާރައިގައި 200އަށް ވުރެ ގިނަ މީހުން ވަނީ މަރުވެފައެވެ.