މިއަދު ހަވީރު ދިވެހި ޕްރިމިއާ ލީގުގައި ކުޅުނު މެޗުގައި އޮޑި ސްޕޯޓްސްގެ ކެޕްޓަން އަދި ޑިފެންޑަރު މުހައްމަދު ރަޝީދު (ހޮކޭ) ފިޓުޖެހިގެން ވެއްޓި، އޭޑީކޭ ހޮސްޕިޓަލްގެ އެމަޖެންސީގައި ފަރުވާދޭން ފަށައިފިއެވެ.

ޓީސީ ސްޕޯޓްސް ކްލަބާ ދެކޮޅަށް ގައުމީ ފުޓްބޯޅަ ދަނޑުގައި އޮޑި ސްޕޯޓްސްއިން މިއަދު ކުޅުނު މެޗުގެ 66ވަނަ މިނެޓުގައި ހޮކޭ ވެއްޓުނީ، މެދު ބޮޅުގެ ތެރެއިން ބޯޅައިގައި ބޮލުން ޖަހަން އޭނާ މައްޗަށް ފުންމާފައި އެރި ވަގުތެވެ.

އޭނާއަށް ފަރުވާ ދޭން އެހީތެރިން ދަނޑަށް އަރައި ދަނޑުމަތީ ފަރުވާދިނުމަށް ފަހު އަށިގަނޑުގައި ދަނޑުން ބާލައި، ގެންދިޔައީ އޭޑީކޭއަށެވެ.

މި މެޗުން އޮޑި ސްޕޯޓްސް ކްލަބް މޮޅުވީ 3-0 ގެ ނަތީޖާއަކުންނެވެ.

މީގެ ކުރިން ނޭވާހިއްލުމުގެ އުނދަގޫވެސް ތަހައްމަލުކުރި ހޮކޭ ފުރަތަމަ ޑިވިޝަންގައި އަލުން ކުޅެން ފެށީ ހަތަރު އަހަރުގެ މެދުކެނޑުމަކަށް ފަހެވެ. ނޭވާހިއްލުމުގެ މައްސަލައިގައި މީގެ ކުރިންވެސް ހޮކޭއަށް ފަރުވާދީފައިވެއެވެ.

އެ ސަބަބާ ހެދި ފުޓްބޯޅަ ކުޅުން ހުއްޓާލަން ނިންމި ހޮކޭ ވަނީ ފަހުން އެ ނިންމުން ބަދަލުކޮށް، އެންމެ ފަހުގެ ދެވަނަ ޑިވިޝަން މުބާރާތުން ފެށިގެން އަލުން ކުޅެން ފަށައިފައެވެ.

ދެވަނަ ޑިވިޝަނުން ފުރަތަމަ ޑިވިޝަނަށް އޮޑި ޕްރޮމޯޓްވުމުގައި ހޮކޭގެ ހިއްސާ ބޮޑެވެ.