29 Nov 2025, 21:08
ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިޔާގެ ސިއްޙީ ހާލުކޮޅު ގޯސްވުމާއެކު އައިސީޔޫގައި ފަރުވާ ދޭން ފަށައިފިއެވެ.
އުމުރުން 80 އަހަރުގެ ޚާލިދާ ހޮސްޕިޓަލްގައި ފުރަތަމަ އެޑްމިޓްކުރީ މި މަހުގެ 23 ވަނަ ދުވަހު ފުއްޕާމޭގެ އިންފެކްޝަނެއް އުފެދިފައި ހުރިކަމުގެ އަލާމާތްތައް ފެނުމުންނެވެ.
އޭގެފަހުން އެކަމަނާގެ ހާލުކޮޅު ވަރަށް ސީރިއަސް ކަމަށް އެކަމަނާ ނިސްބަތްވެވަޑައިގަންނަވާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ގެ މެމްބަރަކު ހުކުރު ދުވަހު ވަނީ ބުނެފައެވެ.
"ޚާލިދާ ޒިޔާ އޮންނެވީ އައިސީޔޫގައި، ޑޮކްޓަރުންނާ ކުރަންޖެހޭ މަޝްވަރާ ކުރުން ކުރިއަށް އެބަދޭ،" ވެރިރަށް ޑާކާގައި ހުންނަ ހޮސްޕިޓަލުގައި ހުންނައި ބީއެންޕީ ގެ މެމްބަރު އަހުމަދު އަޒާމް ޚާން ވިދާޅުވިއެވެ.
ހާލުކޮޅު ހަމަޔަކަށް އެޅިއްޖެނަމަ، އިތުރު ފަރުވާއަށް ބަންގްލަދޭޝްއިން ބޭރަށް ގެންދިއުމަށް އެއާ އެމްބިއުލާންސް ތައްޔާރަށް އޮތް ކަމަށްވެސް އަޒާމް ވިދާޅުވިއެވެ.
ބީއެންޕީގެ އިސް ބައެއް ލީޑަރުންނާއި ޚާލިދާއަށް ތާއީދުކުރައްވާ ބައެއް މީހުން ވަނީ ހޮސްޕިޓަލަށް ޒިޔާރަތްކޮށްފައެވެ.
ދަ ޑެއިލީ ސްޓާ އިން ބުނީ ޚާލިދާ އަކީ ހިތުގެ މައްސަލަތަކާއި ފުރަމޭ އާއި ކިޑްނީގެ މައްސަލަތަކާއި ހަކުރުބައްޔާއި ފުއްޕާމޭގެ މައްސަލަތަކާއި އާތުރައިޓިސް އަދި ލޮލާ ގުޅުން ހުރި ބަލިތައް ހުންނަ ބޭފުޅެއް ކަމަށެވެ.
ޚާލިދާއަކީ އިދިކޮޅު މައި ޕާޓީ، ބީއެންޕީގެ އިސްވެރިޔާއެވެ.
އެކަމަނާ ބަންގްލަދޭޝްގެ ފުރަތަމަ އަންހެން ބޮޑުވަޒީރަކަށް ވެވަޑައިގަތީ 1991 ގައެވެ. އެ މަގާމަށް އެކަމަނާ ވަޑައިގަތީ 1977 އިން 1981 އަށް ބަންގްލަދޭޝްގެ ރައީސްކަން ކުރައްވައި، 1978 ވަނަ އަހަރު ބީއެންޕީ އުފެއްދެވި ފިރިމީހާ ޒިޔާއުއް ރަހުމާން އަވަހާރަކޮށްލުމުންނެވެ. ޚާލިދާ ދެވަނަ ފަހަރަށް އެގައުމުގެ ބޮޑުވަޒީރުކަން ކުރެއްވީ 2001 އިން 2006 އަށެވެ.
ދެހާސް ހަ ވަނަ އަހަރު އެކަމަނާގެ ސަރުކާރުގެ ދައުރު ނިމުމުން 2007 ވަނަ އަހަރުގެ ޖެނުއަރީ މަހުގެ އިންތިޚާބު ސިޔާސީ ހަމަނުޖެހުންތަކުގެ ސަބަބުން ފަސްކުރިއެވެ. އަދި އޭގެފަހުން އެ ގައުމުގެ އަސްކަރިއްޔާއިން ވަގުތީ ގޮތުން ވެރިކަމާ ހަވާލުވިއެވެ.
އެ ދުވަސްވަރު ސަރުކާރުން ވަނީ ޚާލިދާއާއި އެކަމަނާއާއި ދެ އެކަމަނާގެ ދެ ބޭފުޅުންގެ މައްޗަށް ކޮރަޕްޝަންގެ ދައުވާ އުފުލައިފައެވެ. ބަންގްލަދޭޝްއަކީ ދުނިޔޭގެ އެންމެ ކޮރަޕްޓް ގައުމު ކަމަށް ކޮރަޕްޝަން ޕާސެޕްޝަން އިންޑެކްސް އިން ދައްކައިފައި ވަނީ ޚާލިދާގެ ވެރިކަމުގައެވެ.
ދެހާސް އަށާރަ ވަނަ އަހަރު އެކަމަނާ ޖަލަށްލީ ކޮރަޕްޝަންގެ ކުށް ސާބިތުވުމާ ގުޅިގެންނެވެ. ނަމަވެސް އެއީ ސިޔާސީ މައިދާނުން އޭނާ ދުރުކުރަން ކުރި ކަމެއް ކަމަށް ޚާލިދާ ތުހުމަތު ކުރައްވައެވެ. ދެހާސް ވިހި ވަނަ އަހަރުގެ މާޗު މަހުން ފެށިގެން އެކަމަނާ ހުންނެވީ ގޭންބަންދުގައެވެ.
ނަމަވެސް ބަންގްލަދޭޝްގެ ކުރީގެ ބޮޑު ވަޒީރު ޝައިޚް ހަސީނާގެ 15 އަހަރުގެ ވެރިކަން މިދިޔަ މިދިޔަ އޮގަސްޓް މަހު ވެއްޓުމާ ގުޅިގެން ޚާލިދާ މިނިވަން ކުރުމަށް ބަންގްލަދޭޝްގެ ރައީސް މުހައްމަދު ޝަހާބުއްދީން ވަނީ އަމުރު ކުރައްވާފައެވެ.