29 Nov 2025, 20:58
އިދިކޮޅު މައި ޕާޓީ އެމްޑީޕީން މިވަގުތު ތަހައްމަލުކުރަމުން ދަނީ ދަތި ދުވަސްތަކެއް ކަމަށާއި، އެ ޕާޓީގެ ގިނަ މެންބަރުން މިއަދު ބޭނުންވަނީ ޕާޓީ އެކަތިގަނޑަކަށް ވާން ކަމަށް، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
ޙުސައިން ޞަލާޙުއްދީންގެ ޅެން ބައިތެއް ހިއްސާކުރައްވައި މިއަދު މެންދުރުފަހު 'އެކްސް'ގައި ނަޝީދު ލިޔުއްވި ޕޯސްޓެއްގައި ވަނީ އެމްޑީޕީން މިވަގުތު ދަނީ ދަތި ދުވަސްތަކެއް ތަޖުރިބާކުރަމުން ކަމަށް ވިދާޅުވެފައެވެ. ނަމަވެސް މި ހާލަތުން އެ ޕާޓީ އަރައިގަންނާނެ ކަމާމެދު އެއްވެސް ޝައްކެއް ނުކުރައްވާ ކަމަށް ނަޝީދު ވިދާޅުވިއެވެ.
"މިއަދު އެމްޑީޕީގެ ވަރަށް ގިނަ މެންބަރުން އެ ބުނަމުން ދަނީ މުހިންމީ ޕާޓީގެ ޔުނިޓީ ކަމަށް،" އެމްޑީޕީގެ ޗެއާޕާސަންކަމާއި ރައީސްކަންވެސް މީގެ ކުރިން ކުރެއްވި ނަޝީދުގެ ޕޯސްޓުގައިވެއެވެ.
ދިވެހިރާއްޖޭގެ ފުރަތަމަ ރައީސް މުޙައްމަދު އަމީން ދީދީ 1933ވަނަ އަހަރު ލިޔުއްވި "މޮޓަރުބޯޓުގެ ގަޑުބަޑު"ގައި، "އެންމެ މުހިންމީ ކެބިނެޓްގެ ޔުނިޓީ"ކަން އަމީން ލިޔުއްވި ކަމަށް ނަޝީދު ވިދާޅުވިއެވެ. އެހެންކަމުން އެންމެން އެކަތިގަނޑަކަށްވެ މަސައްކަތްކުރުން ދޭހަވާ ފަދަ ގޮތަކަށް ނަޝީދުގެ ޕޯސްޓުގައި ވަނީ ވިދާޅުވެފައެވެ.
"ފަހުން ދެ ފަރީދާއި އަމީން ނޫން އެންމެންނަށް ޖެހުނީ މޮޓަރުބޯޓުގައި ކޮޅުނބަށް (ސްރީލަންކާގެ ކޮލަމްބޯއަށް) ދާން، ދެން އެތާ ކެބިނެޓު އެއް އަހަރު ތިބި،" ނަޝީދު ވިދާޅުވިއެވެ.
އެ ދަތުރުގައި އޭރުގެ ބަނޑާރަނައިބު އަދި މަޝްހޫރު އަދީބު ޙުސައިން ޞަލާޙުއްދީން ލިޔުއްވި ޅެން ބައިތެއްވެސް ނަޝީދު ހިއްސާކުރެއްވިއެވެ. އެ ޅެންބައިތުގައި ވަނީ:
"އުނިކަންނުވާ މާތް ދޫފުޅުން، އެ ދުވަހު ވިދާޅުވީ،
ޔުނިޓީއަކީ ފަހެ ހަސަދަޔާ، މަކަރަށް ނުވާނެބާ،" އެ ޅެން ބައިތުގައިވެއެވެ.
ނަޝީދާއި ފައްޔާޒް އެމްޑީޕީ ސަޕޯޓަރުންނާ އެކު --- ފޮޓޯ/ އެމްޑީޕީ
ފާހަގަކުރެވޭ ގޮތުގައި އޭރު ވެރިކަމުގައި ހުންނެވި ރައީސް އިބްރާހީމް މުހައްމަދު ޞާލިޙާއި، އެ ޕާޓީގެ ރައީސްކަމުގައި ހުންނެވި ނަޝީދާ ދެމެދު ޚިޔާލު ތަފާތުވެ، ޕާޓީގައި ދެ ފެކްޝަނެއް އުފެދުނެވެ.
ކަން އެހެން އޮއްވައި މިފަހުން މެއި 23، 2022ގައި އެމްޑީޕީގެ ޗެއާޕާސަންކަމާ ހަވާލުވެވަޑައިގެންނެވި، ފައްޔާޒު އިސްމާއީލް، އެ މަގާމުން ވަނީ އިސްތިއުފާދެއްވައިފައެވެ. ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު އެކަން ހާމަކުރެއްވީ މިދިޔަ އާދީއްތަ ދުވަހުގެ ރޭ އެ ޕާޓީން ބޭއްވި ގައުމީ މަޖިލީހުގެ ޖަލްސާގައެވެ.
އެއާއެކު ދެން ފެނިގެން ދިޔައީ ވެސް ޞާލިޙާއި ނަޝީދަށް ތާއީދުކުރައްވާ ދެ ފެކްޝަނުން އެ ޕާޓީގެ ޗެއާޕާސަން ކަމަށް ދެ ބޭފުޅަކު ނެރުއްވަން އުޅުއްވި މަންޒަރެވެ. މަޖިލީހުގެ ރައީސްކަން ކުރެއްވި، ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު އަސްލަމްގެ ނަން ހުށަހަޅަން މަޝްވަރާކުރީ ޞާލިހަށް ތާއީދުކުރައްވާ ފެކްޝަންގެ ތެރެއިންނެވެ. ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަން ހުށަހެޅީ، ކުރީގެ ރައީސް މުޙައްމަދު ނަޝީދަށް ތާއީދުކުރައްވާ ފެކްޝަނުގެ ތެރެއިންނެވެ.
ނަމަވެސް އަސްލަމުގެ ނަން ހުށަހަޅައިފައެއް ނުވެއެވެ. އެއީ އެމްޑީޕީގެ ލީގަލް ޑައިރެކްޓަރު މުޙައްމަދު މައުރޫފް ދެއްވި ލަފާގައި، ޗެއާޕާސަންގެ މަގާމަށް ވަގުތީގޮތުން ހަމަޖައްސާ މީހަކީ، ގައުމީ މަޖިލީހުގެ މެންބަރުންގެ ތެރެއިން އިންތިހާބީ މެންބަރަކަށްވުން ލާޒިމުކުރާ ކަމަށް އޮތުމުންނެވެ. ވަހީދު ވަގުތީ ޗެއާޕާސަންކަމަށް އައްޔަންކުރަން ފެނޭތޯ ގައުމީ މަޖިލީހުގެ މެންބަރުންގެ ތެރޭ ވޯޓަށް އެހުމުން ލިބުނީ 47 ވޯޓެވެ. ނަމަވެސް ފެންނަކަމަށް ކަނޑައަޅަން 48 ވޯޓު ބޭނުންވެއެވެ. އެހެންވެ އޭނާ ވެސް ނުހޮވުނެވެ.
ޞާލިޙާއި ފައްޔާޒާއި ނަޝީދު -- ފޮޓޯ/ އެމްޑީޕީ
ހަމައެއާއެކު ޖަނަވަރީ 28، 2023ގައި ބޭއްވި ޕްރައިމަރީން ޞާލިޙް ކާމިޔާބުވުމުން ދެ ފެކްޝަންގެ ކޯޅުން އިތުރަށް ގޯސްވެ، ނަޝީދަށް ތާއިދު ކުރައްވާ ބޭފުޅުން އެ އަހަރުގެ މެއި މަހުގެ މެދުތެރެއިން އެމްޑީޕީއާ ވަކިވިއެވެ. ނަޝީދަށް ކުރިމަތިވި ނާކާމިޔާބީއާ ގުޅިގެން އެ މަނިކުފާނު އެމްޑީޕީން ވަކިވެވަޑައިގަތީ ޖޫން 21، 2023ގައެވެ.
އެއަށްފަހު ނަޝީދާއި އެ މަނިކުފާނަށް ތާއިދުކުރައްވާ ބޭފުޅުން އުފެއްދެވި ދަ ޑިމޮކްރެޓްސްއިން ރިޔާސީ އިންތިޚާބުގައި ވާދަކުރި ނަމަވެސް، ދަ ޑިމޮކްރެޓްސްގެ ކެންޑިޑޭޓަށް ފުރަތަމަ ބުރުގައި ލިބުނީ ހަތް އިންސައްތަ ވޯޓެވެ.
ދެވަނަ ބުރަށް ނުދިއުމުން ވެސް އެމްޑީޕީއާ ގުޅިގެން މަސައްކަތްކުރަން ޑިމޮކްރެޓްސްއިން ދެކޮޅު ހެދިއެވެ. އެއީ އެމްޑީޕީއަށް ލިބުނު ގެއްލުމަކަށްވެ، ޞާލިޙު އިންތިޚާބުން ނާކާމިޔާބުވީއެވެ.
އޭގެ ފަހުން ނަޝީދު އެމްޑީޕީއާ ގުޅިވަޑައިގަތީ މިއަހަރުގެ ޖޫން މަހުގެ 23ވަނަ ދުވަހުގައެވެ.
ނަޝީދު އެމްޑީޕީއާ ގުޅިވަޑައިގެންނެވިތާ ސީދާ ފަސް މަސް ފަހުން، އެމްޑީޕީގެ ޗެއާޕާސަންކަމުގައި ހުންނެވި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވަނީ މަގާމުން އިސްތިއުފާދެއްވައިފައެވެ. ފައްޔާޒް އިސްތިއުފާދެއްވައި އެމްޑީޕީގެ ގައުމީ މަޖިލީހާ ހިއްސާކުރެއްވި ސިޓީގައިވާ ގޮތުން، އިސްތިއުފާދެއްވި އެއް ސަބަބެއް ކަމަށް ފާހަގަކުރެއްވީ އޭރު އުފެދުނު ޚިޔާލުތަފާތުވުންތަކުގެ ސަބަބުން އެމްޑީޕީ ދެބަޔަކަށް ބެހިގެން ދިޔަ ދިއުމެވެ.