29 Nov 2025, 21:13
ރާއްޖޭގެ އިތުރުން ބޭރުގެ އެހެން މާކެޓުތަކަށް ހުޅުވާލަން ތައްޔާރު ކަމަށް، ސަން ޓްރެވަލްސްއިން ހާމަކޮށްފިއެވެ.
މިދިޔަ ބުރާސްފަތި ދުވަހުގެރޭ ސަން ޓްރެވަލްސް ރީބްރޭންޑްކުރުމަށް ސަން ސިޔާމް އޮޅުވެލީގައި ބޭއްވި ޚާއްސަ ހަފްލާގައި ވާހަކަ ދައްކަވަމުން ސީއީއޯ ދީޕަކް ބޫނީޑީ ވިދާޅުވީ، ސަން ޓްރެވަލްސްއިން އަމާޒު ހިފަނީ އާ ފުރުސަތުތައް ހުޅުވާލައި، ބޭރުގެ އާ މާކެޓުތަކަށް ރާއްޖެ ހުޅުވާލުމަށް ކަމަށެވެ.
"އަޅުގަނޑުމެން އަމާޒު ހިފަނީ އާ ފުރުސަތުތައް ހުޅުވާލުމަށް. އެގޮތުން ބޭރުގެ އާ މާކެޓުތަކަށާއި އާ މަންޒިލްތަކަށް ފުރުސަތު ހުޅުވާލުމަށް،" ދީޕަކް ވިދާޅުވިއެވެ.
އެގޮތުން ސްރީލަންކާއާއި، މޮރިޝަސްއާއި، ސީޝެލްސް އަދި އިންޑޮނޭޝިއާގެ ބާލީގެ އިތުރުން ޒަންޒިބާރުގެ އިތުރުން އެހެނިހެން މަންޒިލްތަކަށް ރާއްޖޭގެ މާކެޓް ހުޅުވާލުމަކީ ސަން ޓްރެވަލްސްގެ އަމާޒެއް ކަމަށް ދީޕަކް ވިދާޅުވިއެވެ.
ސަން ޓްރެވަލްސްގެ ސީއީއޯ ދީޕަކް ސަން ޓްރެވަލްސް ރީބްރޭންޑްކުރުމަށް ބޭއްވި ހަފުލާގައި ވާހަކަ ދައްކަވަނީ --- ސަން ފޮޓޯ/ މުހައްމަދު ޢަފްވާން ޞަލާހު
ސަން ޓްރެވަލްސްގެ މިޝަން ސާފު ކަމާއި އެއީ ޓްރެވަލް ދާއިރާގެ މުސްތަގްބަލު ބައްޓަންކުރުންކަން ދީޕަކް ފާހަގަކުރެއްވިއެވެ. އޭނާ ވިދާޅުވި ގޮތުގައި ވޭތުވެދިޔަ 30 އަހަރު ސަން ޓްރެވަލްސްއިން މަސައްކަތްކޮށްފައި ވަނީ ދިވެހިރާއްޖެ، ދުނިޔޭގެ އެހެން މާކެޓުތަކާ ގުޅުވާލުމަށެވެ.
ދީޕަކް ވިދާޅުވީ، ސަން ޓްރެވަލްސް ރީބްރޭންޑްކޮށްފައިވަނީ ޑިޖިޓަލް ޒަމާނަށް ފައްކާވެފައިވާ ޕްލެޓްފޯމެއްގެ ގޮތުގައި ކަމަށެވެ. ސަން ޓްރެވަލްސް ޕްލެޓްފޯމް ރީބްރޭންޑްކުރުމުގެ ސަބަބުން ޕާޓްނަރުންގެ ގުޅުންތައް ވަރުގަދަވެ، އޮމާންކަމާއި ފަސޭހަކަމާއެކު ޚިދުމަތް ފޯރުކޮށްދެވިގެން ދާނެ ކަމުގެ ޔަގީންކަން އޭނާ ދެއްވިއެވެ.
ސަން ޓްރެވަލްސްއަކީ 1990 ވަނަ އަހަރު، ޓްރެވަލް އެޖެންސީ އަދި ޓުއާ އޮޕަރޭޓަރެއްގެ ގޮތުގައި އުފެއްދި ކުންފުންޏެކެވެ. އެ ކުންފުނީގެ މައިގަނޑު ވިޔަފާރިއަކީ އިންބައުންޑް ޓޫރިޒަމެވެ.
ކުޑަކުޑަ ވިޔަފާރިއަކުން ފަށައި، މިހާރު ރާއްޖޭގެ އެންމެ ކުރިއަރާފައިވާ އެއް ޓޫރިޒަމް ކުންފުންޏަށް ސަން ޓްރެވަލްސް ވަނީ ވެފައެވެ. ހަމައެއާއެކު ސަން ޓްރެވަލްސްއަކީ ދުނިޔޭގެ އެކި ކަންކޮޅުތަކުގެ ޓުއާ އޮޕަރޭޓަރުންނާއެކު ވަރުގަދަ ގުޅުމެއް ބާއްވަމުންދާ ކުންފުންޏެކެވެ.
ފާހަގަކޮށްލެވޭ ގޮތުގައި ސަން ސިޔާމް ގްރޫޕަށް 35 އަހަރު ފުރުން ފާހަގަކުރުމުގެ ގޮތުން މިއަހަރުގެ ސެޕްޓެމްބަރު އެއްވަނަ ދުވަހު ވަނީ ސަން ސިޔާމް ރިސޯޓުތައް ވެސް ރީބްރޭންޑް ކޮށްފައެވެ.
ސަން ސިޔާމް ގުރޫޕުގެ ދަށުން, ރާއްޖޭގައި އަންނަނީ ވަރަށް ފެންވަރު ރަނގަޅު ފަސް ރިސޯޓެއް ހިންގަމުންނެވެ. އޭގެ ތެރޭގައި ހިމެނެނީ ސިޔާމް ވޯލްޑާއި, އިރުފުއްޓާއި ވިލުރީފުގެ އިތުރުން އިރުވެއްޔާއި އޮޅުވެއްޔެވެ. މީގެ އިތުރުން ސްރީ ލަންކާގައި ވެސް ރިސޯޓެއް ހިންގައެވެ.