29 Nov 2025, 20:35
ވެރިކަމުގައި ހުންނަވައި ކައިވެނިބައްލަވައިގެން އޮސްޓްރޭލިއާގެ ފުރަތަމަ ބޮޑުވަޒީރަކަށް މިހާރުގެ ބޮޑުވަޒީރު އެންތޮނީ އަލްބަނީޒް ވެވަޑައިގެންފިއެވެ.
ލޯބިވެރިޔާ ޖޯޑީ ހައިޑަންއާ، އަލްބަނީޒް ކައިވެނި ބައްލަވައިގަތީ މިއަދު މެންދުރުފަހު، ވެރިރަށް ކެންބަރާގައެވެ.
"އަހަރެމެންގެ މުސްތަގުބަލު، އާއިލާއާއި އެންމެ ގާތް ރައްޓެހިންނާއެކުގައި ހިއްސާ ކުރުމަކީ އުފާވެރި ކަމެއް،" އަލްބަނީޒް ނެރުނު ކުރު ބަޔާނެއްގައި ވިދާޅުވިއެވެ.
އެ ދެމަފިރިން އެންގޭޖްވީ މިދިޔަ އަހަރު ލޯބިވެރިންގެ ދުވަހުއެވެ. ކައިވެނީގެ ރިސެޕްޝަން ކުރިއަށް ގެންގޮސްފައިވަނީ ރަސްމީ ގެކޮޅު ކަމަށްވާ ދަ ލޮޖްގައެވެ.
ސަލާމަތީ ކަންކަމާހެދި ކައިވެނި ބައްލަވައިގަތުމާ ހަމައަށްވެސް ކައިވެނީގެ ޕްލޭންތައް އޮތީ ސިއްރުކޮށްފައެވެ.
ކައިވެނީގެ ހަފްލާގައި ދެފަރާތުގެ އާއިލާއާއި އަލްބަނީޒްގެ ކެބިނެޓް މިނިސްޓަރުން ވެސް ބައިވެރިވެވަޑައިގަތެވެ.
ދެހާސް ބާވީސް ވަނަ އަހަރުން ފެށިގެން އޮސްޓްރޭލިއާގެ ބޮޑުވަޒީރުގެ މަގާމު އަދާކުރައްވަމުން އަންނަ އަލްބަނީޒްއަކީ އެ ގައުމުގެ 31 ވަނަ ބޮޑު ވަޒީރެވެ.