29 Nov 2025, 21:44
އެކިއެކި މަންޒިލްތަކަށް ދަތުރުކުރާ ފްލައިޓްތަކުގެ ޓިކެޓުތައް، 15 ޕަސެންޓު އަގުހެޔޮ ކޮށްފައިވާ ކަމަށް ގައުމީ އެއާލައިން، މޯލްޑިވިއަންގެ ބެލެނިވެރި ކުންފުނި އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވެއްޖެއެވެ.
މޯލްޑިވިއަންއިން އެތެރެއާއި ބޭރުގެ ގައުމުތަކަށް އެކިއެކި ދަތުރުތައް ކުރާއިރު، ޓިކެޓު އަގުބޮޑު ކަމުގެ ޝަކުވާ ކުރެއެވެ.
ސަރުކާރަށް ދެ އަހަރު ފުރުން ފާހަގަކުރުމަށް ދައުލަތުގެ މީޑިއާއަށް ދެއްވި އިންޓަވިއުއެއްގައި އިޔާސް ވިދާޅުވީ، ރިސޯޓުތަކާ ހޮޓާތަކަށްދާ މީހުންނަށް ކުރިން އެ ކުންފުނީގެ ޓިކެޓު ގަންނަނަމަ ލިބެނީ ތަންކޮޅެއް އަގުބޮޑު ކަމަށެވެ.
އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހީމް އިޔާސް ---- ފޮޓޯ/ ޓްރެވަލް ޓްރޭޑް މޯލްޑިވްސް
އެ ދަތުރުތަކުގެ އަގަށް ވެސް ވަރަށް ބޮޑު ލުޔެއް ގެނެސްފައިވާކަން ފާހަގަކުރައްވައި، އިޔާސް ވިދާޅުވީ، މަންޒިލްތަކުގެ ޓިކެޓުގެ އަގު އެވަރެޖުކޮށް، 15 ޕަސެންޓު ކުޑަކޮށްފައިވާ ކަމަށެވެ.
އެވަރެޖު ގޮތެއްގައި، މަންޒިލްތަކަށް އަޅުގަނޑުމެން މި ވަނީ 15 ޕަސެންޓުގެ އަގުހެޔޮ ވުމެއް ގެނެސްފައި. އަޅުގަނޑުމެން މަސައްކަތް ކުރަނީ އަގުތަކަށް [ހެޔޮ] ބަދަލެއް ގެންނަން،އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހީމް އިޔާސް
އިޔާސް ވިދާޅުވި ގޮތުގައި އެކަން ކުރުމަށްޓަކައި މިވަގުތު މޯލްޑިވިއަންއިން ދަނީ އެއާލައިންތަކާ އެކީ އިންޓަލައިން އެއްބަސްވުންތައް ހަދަމުންނެވެ.
އެ މަސައްކަތުގެ ތެރެއިން، ގަތަރު އެއާވޭސްއާއި، އަޒަރްބައިޖާންއާއި، އެމިރޭޓްސްގެ އިތުރަށް އިއްތިހާދާއެކީ އިންޓަލައިންގެ އެއްބަސްވުންތައް ހެދިފައިވާކަން އިޔާސް ފާހަގަކުރެއްވިއެވެ. އަދި އެހެން އެއާލައިންތަކާ އެކީ އެއްބަސްވުން ހެދުމުގެ މަސައްކަތް ކުރަމުން އަންނަ ކަމަށް މޯލްޑިވިއަންގެ އެމްޑީ ވިދާޅުވިއެވެ.
އޭނާ ވިދާޅުވި ގޮތުގައި، އިންޓަލައިންގެ ފައިދާއަކީ، އެއްބަސްވުން ހަދާ ބޭރުގެ އެއާލައިންއިން ދަތުރުކުރާ ކޮންމެ މަންޒިލަކުން ރާއްޖޭގެ މަންޒިލްތަކަށް އެއް ޓިކެޓެއްގައި ގަނެވުން ކަމަށެވެ.
"އޭގެ ސަބަބުން މާލެ އެރައިވް ވުމަށްފަހު، ކަނެކްޓިވީ މޯލްޑިވިއަންއިން އެބަ އެންޝުއާ ކޮށްދެވޭ ފަސިންޖަރަކު ބޭނުންވާ ރާއްޖޭގެ މަންޒިލަކަށް ދެވޭނެ ގޮތަށް. އެ ވަރަށް ބޮޑު ލުޔެއް ލިބިގެން އެ ދަނީ" އިޔާސް ވިދާޅުވިއެވެ.