29 Nov 2025, 16:46
ދައުލަތުގެ މީޑިއާ، ޕީއެސްއެމްގެ މެނޭޖިން ޑިރެކްޓަރުގެ މަގާމުގައި ހުންނެވި އިބްރާހީމް ނަސްރީން، ސަރުކާރުގެ އެހެން މަގާމަކަށް ބަދަލުކޮށްފިއެވެ.
ނަސްރީން "ސަން"އަށް ވިދާޅުވީ، އޭނާ ޕީއެސްއެމްގެ އެމްޑީގެ މަގާމުން އިސްތިއުފާ ދެއްވައިފައިވާ ކަމަށެވެ. ނަމަވެސް އިތުރު ތަފުސީލެއް ނުދެއްވައެވެ.
'ސަން'އަށް އެނގިފައިވާ ގޮތުގައި، ނަސްރީން މިހާރު ވަނީ ޔޫތު މިނިސްޓްރީގެ މަގާމަކަށް ބަދަލުކޮށްފައެވެ. ނަމަވެސް، އެއީ ކޮން މަގާމެއް ކަމެއް މިހާތަނަށް ސާފުވެފައެއް ނުވެއެވެ.
ނަސްރީން ޕީއެސްއެމްގެ މެނޭޖިން ޑިރެކްޓަރަށް އައްޔަނުކުރީ، އެ މަގާމުގައި ކުރިން ހުންނެވި މުހައްމަދު ސައީދު މިދިޔަ އަހަރުގެ ޑިސެމްބަރު 19ގައި އިސްތިއުފާދެއްވުމުންނެވެ.
އޭގެ ކުރިން އެ މަގާމުގައި ހުންނެވި ޒީނާ ޒާހިރު ވެސް މެނޭޖިން ޑިރެކްޓަރުކަން ކުރެއްވީ ކުރު މުއްދަތަކަށެވެ. އެގޮތުން މިދިޔަ އަހަރުގެ އޮގަސްޓު މަހުގެ 24ގެ ޒީނާ ވަނީ މަގާމުން އިސްތިއުފާދެއްވާފައެވެ.
ނަސްރީނަކީ ޕީއެސްއެމްގައި ޚިދުމަތް ކުރައްވާތާ 20 އަހަރަށް ވުރެ ގިނަ ދުވަސް ވެފައިވާ ބޭފުޅެކެވެ. އޭނާ މަސައްކަތް ފެއްޓެވީ ގްރެފިކްސްގެ ދާއިރާއިން ކަމަށްވާއިރު، އެކި މަގާމުތައް ފުރުއްވައި، ޕީއެސްއެމްގެ ކޮމާޝަލް ހެޑްއަކަށް ވެސް ހުންނެވިއެވެ.
ނަސްރީން ވަނީ މެލޭޝިއާގެ ލިމްކޮކް ޔުނިވާސިޓީން ބެޗްލާސް ޑިގްރީ ހާސިލުކުރައްވައި، ތައިލެންޑުގެ ކޮލެޖް އޮފް އިނޮވޭޝަން އެޓް ތަމަސަޓް ޔުނިވާސިޓީން ސާވިސް އިނޮވޭޝަންގެ ދާއިރާއިން މާސްޓާސް ޑިގްރީ ހާސިލުކުރައްވައިފައެވެ. އަދި ޕީއެޗްޑީ ފައްޓަވައި، މިހާރު މަސައްކަތް މަސައްކަތް ކުރައްވަމުން ގެންދަވަނީ އެންމެ ފަހު މަރުހަލާގައެވެ.
ނަސްރީން ވަނީ ޕީއެސްއެމްއާއި ބޭރުގެ ޖަމިއްޔާތަކުގެ ގުޅުން ވަރުގަދަ ކުރުމަށް އިސް ދައުރެއް އަދާކުރައްވައި، ފްރެންޗައިޒް ޝޯތައް ރާއްޖޭގައި ދެއްކުމަށް ވެސް ގިނަ މަސައްކަތްތަކެއް ކުރައްވައިފައެވެ. އޭގެ ތެރޭގައި މޯލްޑިވިއަން އައިޑަލް އާއި ވޯލްޑް ކަޕް ފަދަ މުބާރާތްތައް ހިމެނެއެވެ.